Iesu pala kö e Ierusalema la drai Sabath. Nge ame la nyidrë me itretre dreng a tro hnine la traon, traqa ju hi angatr a öhne la trahmany hna hnahon a timek. Matre öni itretre dreng koi Iesu: “Rabi, drei la ka kuca la ngazo matre hnahone pi a timek, angeic, maine keme me thin?”—Ioane 9:2.

Atre hi la itretre dreng ka hape, tha ketre u kö lai atr qëmekene troa hnahon, matre angatr a mekun laka, ma hetre ka kuca la ngazo lo angeic ngöne hni i thin. Sa jë hi Iesu ka hape: “Tha zö i angeice kö maine keme me thine i angeice pena, ngo tro pe a mama kowe la itre atr la huliwa i Akötresie thei angeic.” (Ioane 9:3) Haawe, tha hnei angeice kö, maine keme me thin la ka kuca la ngazo matre hnahone pi a timek. Ngo thangane pe la ngazo i Adramu, ke hna hnahone la nöjei atr a ka ngazo hë, tune la troa timek. Ngo tro pe la meci angeic a aijijë Iesu troa amamane la itre huliwa i Akötresie, tune lo aqane kuca i nyidrë kowe lo itre xa hna tith hnei mec.

Iesu a amamane jë la enyipiewekëne troa kuca la itre huliwa i Akötresie. Öni nyidrë: “Nyipiewekë tro sa kuca la itre huliwa ne la Atre upi ni e lai petre kö; ke easenyi hë la jidr, nge pë hmaca kö ka atreine huliwa e cili. Matre ame la eni pala kö e celë fen, eni la lai ne la fen.” (Ioane 9:4, 5) Eje hi, tro la meci Iesu a ami nyidrë ngöne la gaa miit, ene la hua, nge pëkö huliwa ka ijij e cili. Ngo ame pe, nyidrëti pala kö la lai ne la fen.

Ngo tro kö Iesu a aloine lai atr? Nge troa tune kaa? Iesu a hnyiju pi me lomëne la itrahnyiju me dro, me hnyathe la luemeke ne lai atr, me hape: “Tro jë a köle ialamek ngöne la tim e Siloama.” (Ioane 9:7) Nge canga tro ju hi lai atr. Matre ame ju hi la angeic a kuca, goe jë hi angeic! Pane mekune jë, angeice petre hi a hane goe!

Kola isa sesëkötr me haine la itre atr ka atre angeic. Öni itre xan: ‘Tha kolo kö lo atre la ka lapa sipo manie la?’ Nge öni itre xan: “Angeice hi,” ngo öni itre xan: “Waea. Ngo kösë pi lo angeice hi.” Matre önine lai atr: “Eni hi.”— Ioane 9:8, 9.

Nge öni angatr: “Nga hna fe tune kaa la luemeke i eö?” Sa jë hi angeic ka hape: “Hnene lo atr hna hëne ka hape, Iesu. Hnei nyidrëti hna xome la dro ka hmu me köle la lue alamekeng me hape, ‘Tro jë kowe la tim e Siloama troa köle ialamek.’ Matre eni a tro ju, me köle ialamek, nge goe ju hi ni.” Öni angatre jë hi: “Ekaa lai atre cili?” Önine lai atr: “Thatre.”—Ioane 9:10-12.

Itre atr a tro sai angeice pi kowe la itre Faresaio, ke aja i angatre fe troa hane atre ka hape,  hna tune kaa matre goe pi angeic. Öni angeic: “Hnei nyidrëti hna köle hnei dro ka hmu la lue alamekeng, nge hnenge hna köle ialamek, nge goe pi hi ni.” Matre maine ju, tro la itre Faresaio a madrine la hna aloine la timek. Ngazo pe, hnei itre xan hna qajangazo Iesu, me hape: “Tha atre i Akötresieti kö la atre cili, ke tha metrötrëne kö angeic la Sabath.” Ngo sa jë hi itre xan ka hape: “Nga hna atreine kuca tune kaa la iamamanyikeu ka tru celë e atre ka ngazo angeic?” (Ioane 9:15, 16) Isazikeu hnyawa la itre mekuna i angatr.

Haawe, pine laka, isazikeu la itre mekuna i angatr, angatr a hnyinge jë kowe la hna aloin ka hape: “Nemene la mekuna i eö göi angeic, ke hna fe la luemeke i eö?” Tha luelu kö angeic, matre öni angeic: “Perofeta hi lai.”—Ioane 9:17.

Ngo xele kö angetre Iudra ma kapa. Angatr a mekune ka hape, hnei Iesu memine la timek hna thë troa kuci iamamanyikeu, matre amenune la itre atr. Matre öni angatr, loi e troa hnyinge kowe la keme me thin i angeic ka hape, ‘nyipi timeke kö angeic?’