Iesu pala kö e Ierusalema göne la Feet Ne Ihmelekap. Nge nyidrëti a madrine laka, ‘ala nyimu la itre ka lapaune koi nyidrë.’ Ngo tha madrine kö itre hene hmi. Matre angatr a upe pi la itretre thup, itre ka nyi polis i hmi, troa xolouthi Iesu. (Ioane 7:31, 32) Ngo tha zae kö Iesu.

Nyidrëti pe a catre hamë ini qëmekei nöjei atr e Ierusalema, me hape: “Eni pala kö a troa pane lapa me nyipunie, qëmekene tro ni a tro kowe la Atre upi ni. Matre, tro nyipunieti a thele ni, ngo tha tro pi kö nyipunie a öhnyi ni. Nge thatreine kö nyipunieti tro kowe la götran hnenge hna tro kow.” (Ioane 7:33, 34) Ngo tha trotrohnine kö angetre Iudra, matre angatr a isa hnyinge me hape: “Angeic a tro ië matre thatreine së troa öhnyi angeic? Tro kö angeic a tro kowe la itretre Iudra ka mele nyipine la angetre Geres, me inine fe la angetre Geres? Nge nemene la aliene lo angeic a qaja ka hape, ‘Tro nyipunie a thele ni, ngo tha tro pi kö nyipunie a öhnyi ni me öhne la götran hnenge hna tro kow’?” (Ioane 7:35, 36) Iesu a qaja la mec me mele hmaca i nyidrë e hnengödrai, götran hna thatreine tro kow hnei itre ka methinë nyidrë.

Traqa ha la hnaasevene drai ne la Feet. E nöjei hmakany ngöne la ijine feet, hnene la atre huuj hna majemine fi la ita ne huuj hnene la tim hna tha e Siloama, nge kola neni lai tim kowe la trepene lai ita ne huuj. Matre maine jë, Iesu a mekune la ewekë celë lo nyidrëti a suene ka hape: “Maine ketre atr a pi ij, loi e tro angeic a tro koi ni me hane ij! Ke ame la atre lapaune koi ni, tro hë angeic a tune lo hna qaja hnene la hna cinyihan ka hape: ‘Tro ha neni thei angeic la itre timi ne mel.’ ”—Ioane 7:37, 38.

Iesu a qaja la ijine tro la uati hmitrötr a iëne la itretre drei nyidrë, me aijijë angatr troa kapa elany la mel ka pë pun e hnengödrai. Tro lai a traqa ngöne la Penetekos thupene la meci Iesu. Tro la itretre drenge a cainöjëne la nyipici, nge tro lai a tune la itre tim ka neni lapa.

Eje hi, hna ketre hnyawa la hni ne la itre xan hnene la itre ini hna hamën hnei Iesu, matre  öni angatr: “Angeice hnyawa hi la ketre Perofeta.” Angatr a qaja lo perofeta hna thingehnaean nge ka draië kö hui Mose. Nge öni itre xan: “Angeice hi lo Keriso.” Ngo sa jë hi itre xan ka hape: “Tha ka fetra kö Keriso qaa Galilaia, eje hi? Ke hapeu, tha hnene kö la hna Cinyihan hna qaja ka hape, tro la Keriso a ketre matra i Dravita, nge tro nyidrë a fetra qaa Bethelema, lo traone i Dravita?”—Ioane 7:40-42.

Kola isazikeu la mekuna ne la ka ala nyim. Nge ngacama itre xan a ajan troa xolouthi Iesu, ngo tha eatre ju kö la mekuna i angatr. Ame hë la itretre thup a bëeke koi itre atre huuj me itre Faresaio, öni angatr: “Hnauëne laka, tha xolouthi angeic kö hnei nyipunie?” Sa jë hi itretre thup ka hape: “Pëkö ketre atr ka hane ewekë tune la.” Matre hnei itre hene ne hmi hna ahmahmanyi angatr me hape: “Ke nemen, hna hane fe amenu nyipunie? Pëkö atre mus nge pëkö Faresaio ka hane lapaune koi angeic, eje hi? Ngo ame la ka ala nyimu celë, itre ka thatre la Wathebo, matre ka hnëjin angatr.”—Ioane 7:45-49.

Ame hna mejë hnei Nikodremo, ketre Faresaio me atrene la Hnakootr Ka Tru i Angetre Iudra. Angeic a cile jë troa isigöli Iesu. Lue macatre qëmeken, hnei Nikodremo hna tro koi Iesu e jidr me amamane la lapaune i angeic koi nyidrë. Enehila öni angeic: “Thenge la hna amekötin hnene la Trenge Wathebo së, maine aja së troa amekötine la ketre atr, hapeu, tha qa së kö troa pane drei angeic matre atre la hnei angeic hna kuca, eje hi?” Matre nemene hë la mekuna angatr? Öni angatr: “Tha atre Galilaia kö eö? Nga thele jë matre öhne jë kö eö ka hape, pëkö perofeta ka troa xulu qaa Galilaia.”—Ioane 7:51, 52.

Eje hi, tha hna qaja kö hnine la itre hna Cinyihan ka hape, hetre perofeta ka troa traqa qa Galilaia. Ngo Trengewekë i Akötresieti pe a amamane laka, tro Keriso a fetra qa lai; hna perofetane ka hape, tro la “lai atraqatr” a mama e “Galilaia i angetre fen.” (Isaia 9:1, 2; Mataio 4:13-17) Ketre, tune lo hna perofetan, hna hnaho Iesu e Bethelema, nge matra i Dravita nyidrë. Nge ma atre hi itre Faresaio lai, ngo angatre hmaca kö la itre ka sili trengathoi Iesu.