Iesu pala kö ezine Ierusalema, nge ala nyimu la angetre Iudra ka traqa koi nyidrë. Hetre ka traqa troa kepe ini, nge hetre ka traqa troa tupathi nyidrë. Ame la ketre, tre ketre trahmany ka atrepengöne hnyawa la Wathebo. Matre öni angeic koi Iesu: “Atre Ini fe, nemene la nyine tro ni a kuca matre hetrenyi ni la mele ka pë pun?”—Luka 10:25.

Trotrohnine hi Iesu ka hape, tha angeice kö a hnying göi troa atre. Ma angeic a thele tro Iesu a sa me qaja la ketre ewekë ka troa amejëne la trenge hni i angetre Iudra. Nge atre fe Iesu ka hape, hetre aqane waiewekë i angeice hë. Matre tro la aqane sa i Iesu a amamane la itre nyipi mekuna i angeic.

Iesu a hnyinge jë me hape: “Nemene la hna cinyihan ngöne la Trenge Wathebo? Nemene la hnei eö hna trotrohnin?” Atre hnyawa hi angeic la itre Wathebo i Akötresie, matre angeic a sa jë thenge la hna qaja ngöne Deuteronomi 6:5 me Levitiko 19:18. Öni angeic: “ ‘Qa i eö troa hnimi Iehova Akötresi eö hnene la hni eö ka pexej, me mele i eö ka pexej, me trengecatre i eö ka pexej, me mekuna i eö ka pexej,’ me ‘hnime la atre lapa easenyi eö tui eö hi.’ ” (Luka 10:26, 27) Meköti kö lai?

Sa jë hi Iesu ka hape: “Ka meköti la hnei eö hna qaja; haawe, catre jë eö trongëne lai, nge tro hë eö a mel.” Ngo hapeu, pune hë lai? Tha aja i angeice kö tro hi a sa hnyawa la hnying; ngo angeice pe a “pi nyi ka meköt,” me acatrene lo aqane waiewekë i angeic, matre thue kepin la aqane ujë i angeic koi itre xan. Matre öni angeic: “Drei la atre lapa easenyi ni?” (Luka 10:28, 29) Tha hnyinge menu kö lai. Hnauën?

Ame koi angetre Iudra, tro hi a hën ka hape “atre lapa easeny,” la atre trongëne la itre qenenöj i angetre Iudra, celë hi aqane trotrohnin angatr la Levitiko 19:18. Nge ma angatre fe a catre fë ka hape, “hna wathebone” troa ce me itre xa nöj. (Itre Huliwa 10:28) Nge pine lai, ma angeic me itre xa atre drei Iesu a jelemeköti angatr pine angatr nyipine la angetre Iudra. Ngo öni angatr, tha nyipiewekë pë hë la itre xa nöj, ke tha angatre kö la “atre lapa easeny.”

Tro Iesu a amekötine tune kaa la mekuna i angeic, me metrötrëne la itre xa atre Iudra? Nyidrëti a hamëne jë la ketre ceitun: “Kola uti la ketre trahmanyi qaa Ierusalema a tro Ieriko, ame hna xolouthi angeic hnene la itre atrekënö, matre angatr a thapa pi la itre iheetre i angeic, me itre ewekë i angeic, me lepe angazo angeic, me nue angeic a ka tro ha mec.” Öni Iesu hmaca: “Ame hna cili thenge fe hnene la ketre atre huuj, ngo ame ju hi la angeic a öhne lai trahmany, saze pala gojenyi pi hi angeic. Ketre tun, ame la kola traqa hnene la ketre atre Levi kowe la götrane cili me öhne lai trahmany, saze pala gojenyi pi fe angeic. Nge traqa pi hi la atre Samaria, matre ame ju hi la kola öhne lai trahmany, angeic a utipi nyëne ju.”—Luka 10:30-33.

Atre hi lai atr ka hape, ala nyimu la itre atre huuj me atre Levi ka mel e Ieriko. Nge ame la angatr a bëeke koi hnalapa, angatr a trongëne la 23 km. Nge tha gojenyi ka loi kö, ke ala nyimu la itre atrekënö ka zae e cili. Matre, e tro la atre huuj maine atre Levi a cili thenge, me öhne la ketre atre Iudra a ka eatr, hapeu, tha qa i angeice kö troa ixatua? Ngo hnei Iesu hna qaja ka hape, tha kuca kö nyidro. Ngo atre Samaria hmekuje hi la ka ixatua, ngacama atrene la nöj hna methinën hnei angetre Iudra.—Ioane 8:48.

 Hna xatuane tune kaa la atre Iudra? Öni Iesu: “[Angeic a] easenyi nyën, me nei oel me waina hun la itre eatre i nyën, me peleth. Thupene lai, angeic a ati nyëne ju hune la si angeic, me tro sai nyëne kowe la ketre neköi otel, me kuca hnyawa nyën. Nge ame la drai thupen, angeic a xome pi la lue drenari, me hamëne kowe la atre ikep, me hape: ‘Wai nyëne hnyawa kö, nge ame la nöjei ewekë hnei eö hna troa nyi thupen göi nyën, tro pë hë ni lai a të koi eö e bëeke jë ni.’ ”—Luka 10:34, 35.

Thupene lai, öni Iesu, Atre Ini ka Sisitria: “Haawe, ame koi eö, drei thene lo ala kön, la atre amamane ka hape, angeice hi la atre lapa easenyine lo trahmanyi hna lep hnene la itre atrekënö?” Ma angeice jë a hmahma troa qaja ka hape, “atre Samaria,” matre öni angeic: “Kolo atre trene utipin.” Iesu a hamëne jë la ketre ini ka mama cil, öni nyidrë: “Haawe, nga tro jë me hane kuca tun.”—Luka 10:36, 37.

Hane petre hi la ketre aqane hamë ini ka hetre thangan! Maine hnei Iesu ju hna sa mekötine ka hape, itre atrene la itre xa nöje fe la atre lapa easeny, hapeu, tro kö angeic me itre ka dreng a kapa? Waea. Matre ame la nyidrë a hamë ceitun hna trotrohnin me melën hnei itre ka dreng, tha nyipiewekë hë troa sa lo hnying, “Drei la atre lapa easenyi ni?”. Ame la nyipi atre lapa easeny, tre ene lo atre ka ihnim me menyik, tune la hna upi së hnei itre hna Cinyihan.