Xele kö itre Faresaio ma kapa laka, hnei Iesu hna fe la luemeke ne la atre hna hnahon a timek, matre angatr a hëne jë la keme me thine i angeic. Atre hi keme me thin ka hape, ma troa ‘helë nyidro qa hnine la sunago.’ (Ioane 9:22) E troa pane ami nyidro, tro lai a hetre ethan kowe la huliwa me melene la fami.

Itre Faresaio a hnyinge jë ka hape: “Angeice hi lo nekö i epon, lo öni epon ka hape, hna hnahon a timek? Nga hnauëne laka, goe hë angeic?” Sa jë hi keme me thin ka hape: “Nekö i nyio hi lai, nge atre hi nyio ka hape, ka timek lo kola hnahon. Ngo ame pë hë göi troa atre ka hape, goe hë enehila nge drei la ka fe la luemeke i angeic, nga thatre pë hë nyio lai.” Ngacama ase hë qejepengön hnei nekö i nyidro, ngo nyidroti pe a thupën la aqane sa, matre öni nyidro: “Hnyingë angeice jë kö, ke ka tru hë lai. Atreine kö angeice lai sipu sa.”—Ioane 9:19-21.

Thupene lai, itre Faresaio a hëne hmaca jë lo timek troa axounyi angeic. Angatr a catre fë ka hape, hetre ngazo hna kuca hnei Iesu. Matre angatr a upi angeice jë ka hape: “Atrunyi Akötresieti jë pe, ke atre hi huni laka, ka ngazo lai atre cili.” Ngo tha nyipiewekëne kö lo timek, öni angeic: “Ame göi troa qaja ka hape, atre ka ngazo angeic, thatre pë ni lai, ngo casi hi la hnenge hna atre, ka timeke ni ekö, ngo goe hë ni enehila.”—Ioane 9:24, 25.

Tha cile kö itre Faresaio, matre öni angatr: “Nemene la hnei angeic hna kuca koi eö? Nge hnei angeic hna fe tune kaa la alameke i eö?” Ngo tha xou kö angeic, öni angeic: “Ase hë ni lo qaja koi nyipunie, ngo tha drenge kö nyipunie, nga hnauëne la nyipunieti hmaca a pi atre? Kola u, pi tro fe hë nyipunie a itretre drei nyidrë?” Elëhni jë hi la itre Faresaio, matre öni angatr: “Eö la atre drei angeic, ngo itretre drei Mose hun. Atre hi huni laka, hnei Akötresie hna ithanata koi Mose, ngo ame göi angeice la, thatre kö huni ka hape, drei la atre upi angeic.”—Ioane 9:26-29.

Kola haine la timek, matre öni angeic: “Hane petre hi la ketre ewekë laka, thatre kö nyipunie ka hape, drei la ka upi nyidrë, ngacama hnei nyidrëti hna fe la luemekeng.” Thupene lai, angeice a qaja jë la pengöne atr hna drenge me kapa hnei Akötresie. Öni angeic: “Atre hi së laka, tha Akötresieti kö a drenge la itre ka kuca la ngazo, ngo ame la atre xoue Akötresie me kuca la aja i nyidrë, angeice hi la hna drenge hnei Akötresie. Nge qaane ekö, tha hane fe kö së drenge laka, hna fe la luemeke ne la atr hna hnahon a timek.” Matre angeic a nyipune jë me hape: “Haawe, maine tha qaathei Akötresieti kö la atre ce, nga tha ijiji angeice kö troa kuca lai.”—Ioane 9:30-33.

Pë ju hi nyine tro la itre Faresaio a sa, matre angatr a ithanata akökötrenyi jë koi angeic me hape: “Ka tiqa ha eö hnei ngazo lo kola hnaho eö, nge eö a pi ini hun?” Matre angatr a triji angeice pi e cahu trön.—Ioane 9:34.

Matre ame ju hi la Iesu a drei mejen, nyidrëti a canga thele angeice pi, me hnyingëne la ewekë ka traqa, me hape: “Eö kö a lapaune kowe la Nekö i atr?” Önine la atre hna aloin: “Drei angeice lai joxu, matre tro fe ni a hane lapaune koi angeic?” Matre öni Iesu: “Hnei eö hna öhnyi angeic, nge angeice hi la ka ithanata koi eö.”—Ioane 9:35-37.

Önine lai atr: “Eni a lapaune koi nyidrë, Joxu.” Angeic a amamane jë la lapaun me metrötre i angeic, me sa iwatingöne ca qëmeke i Iesu. Nge Iesu a qaja jë koi angeic la ketre nyipici ka tru, öni nyidrë: “Eni a traqa e celë fen matre, jëne la itre huliwang, tro ha goe la timek, nge tro ha timek la ka goe.”—Ioane 9:38, 39.

Atre hi itre Faresaio laka, tha itre timeke kö angatr. Ngo tune kaa göne la hnëqa i angatr  ne amamai gojeny göi hmi? Angatr a hnyinge ka hape: “Tha itre timek fe kö hun, eje hi?” Öni Iesu: “Maine itre timeke nyipunie, pëkö ngazo i nyipunie. Ngo enehila, öni nyipunie, ‘ka goe hun,’ haawe, ka fedre kö thei nyipunie la itre ngazo i nyipunie.” (Ioane 9:40, 41) Maine tha angatre ju lo itre hna upe troa ini angetre Isaraela, tro hi sa trotrohnine laka, tha kapa kö angatr ka hape, Iesu la Mesia. Ngo atre hi angatr la Trenge Wathebo, matre ngazo ka tru la hnei angatr hna kuca.