Hlemu catre hë Iesu qaane lo nyidrëti a xomi bapataiso. Öhne hë itre thauzan lao atre Iudra la itre iamamanyikeu i nyidrë, nge kola ha iqajakeun ngöne la nöj asë la itre huliwa i nyidrë. Matre enehila, ngöne la Feet Ne Ihmelekap, ala nyimu la itre ka thele nyidrë e Ierusalema.

Isapengöne kö la aqane goeë Iesu hnei itre atr. Itre xan a mekune ka hape, “ka lolo la atre ce.” Ngo öni itre xan: “Waea. Angeic a amenune la ka ala nyim.” (Ioane 7:12) Itre ithanata lai hna qaja acon ngöne la itre pane drai ne la feet. Ngo pëkö ka hane pi qaja aloinyi Iesu qëmeke i nöjei atr, ke xou i angatre fe la itre hene ne hmi.

Itre drai thupene la kola nyiqaane la feet, Iesu a tro iamamanyi ju hnine la uma ne hmi. Nge ala nyimu la itre atr ka haine la aqane hamë ini i nyidrë. Tha qa i nyidrëti kö hna ini thei itre rabi, matre kola hnyinge hnei angetre Iudra ka hape: “Hnauëne laka, atre hnyawa hi la atre ce la itre hna Cinyihan, nge tha qa pe hna ini?”— Ioane 7:15.

Iesu a sa jë me hape: “Ame la hnenge hna inin, tre, tha qaathenge kö, ngo qaathene la atre upi ni. Nge maine ketre atr a pi kuca la aja i Nyidrë, tro hi angeice lai a wangatrehmekune ka hape, qaathei Akötresie la ini, maine qaathenge pena.” (Ioane 7:16, 17) Ka ihmeku hi la itre ini hna hamën hnei Iesu memine la Wathebo i Akötresie, matre maine ju, tha jole kö troa trotrohnine ka hape, xele kö Iesu troa atrunyi nyidrë ngo Akötresieti pe.

Thupene lai öni Iesu: “Hnei Mose lo hna hamë nyipunie la Trenge Wathebo, eje hi? Ngo pëkö ala casi qaathei nyipunie ka hane trongëne la Wathebo. Nga hnauëne la nyipunieti a thele troa humuthi ni?” Hetre itre xan thene la ka ala nyim ka thatre la hna pi kuca koi nyidrë, ma kolo jë a qaja la itre atr ka traqa qa tröne Ierusalema. Thatreine kö angatre mekune ka hape, kola hane pi humuthe la ketre atre hamë ini ka maca. Haawe, angatr a mekune jë ka hape, ma hetre ewekë ne la atre ce, öni angatr: “Ase hë löthi eö hnei dremoni. Drei la ka pi humuthi eö?”—Ioane 7:19, 20.

Ngo eje hi laka, ca macatre nge sine qëmeken, hnei itre hene ne hmi i angetre Iudra hna thele troa humuthi Iesu, thupene la nyidrë a aloine la ketre trahmany e Sabath. Enehila, Iesu a qaja la kepin matre ka catre la aqane iameköti i angatr. Nyidrëti a amamane ka hape, thenge la wathebo, troa xötrehatrene la medreng ngöne la hnaeitrene drai, ngacama drai sabath la drai cili. Thupene lai öni nyidrë: “Maine nyipunieti a xötrehatren la ketre atr la drai Sabath, matre metrötrëne la trenge Wathebo i Mose, nga hnauëne la nyipunieti a elëhni koi ni ke eni a aloine hnyawa la atr e Sabath? Nge loi ju hë hna iameköti thenge la ka mama, ngo amekötine jë pe thenge la meköt.”—Ioane 7:23, 24.

Ngo hnei itre atre Ierusalema ka atre lo ewekë ka traqa hna hape: “Tha angeice kö lo atr hnei angatr hna thele troa humuth? Nge goeën! Angeic a ithanata kowe la ka ala nyim, nge pëkö hnei angatre hna qaja koi angeic. Ma ka xecie jë kowe la itre he ne nöj ka hape, angeice hi la Keriso?” Nga hnauëne hö laka, tha mejiune kö angatr ka hape, Iesu la Keriso? Öni angatr: “Atre hi huni ka hape, atre kaa la atre cili; ngo ame ngöne la ijine troa mama la Keriso, pëkö atr ka troa atre ka hape, atre kaa nyidrë.”—Ioane 7:25-27.

Matre hnine la uma ne hmi, Iesu a sa mekötine ka hape: “Atre ni hi hnei nyipunie, nge atre fe hi nyipunie ka hape, atre kaa ni. Nge tha traqa  xane kö ni, ngo ka mele la Atre upi ni, nge thatre nyidrëti kö hnei nyipunie. Ngo atre nyidrëti kö hneng, ke eni hi la qeneqaja i nyidrë, nge hnei nyidrëti hna upi ni.” (Ioane 7:28, 29) Qa ngöne lai, itre xan a thele jëne jë troa xolouthi Iesu me akalabusi nyidrë, maine humuthe pena. Eloine hi, tha eatre ju kö, ke tha hawa i nyidrëti pala kö.

Ala nyimu la itre ka mejiune koi Iesu, nge aqane kö, ke hnei nyidrëti lo hna tro hune tim, me apatrene la enyi ka catr, me thuane la itre thauzan hnene la itre neköi ie me hnepe falawa, me aloine la itre trene mec, me aloine la itre ka peje ca, me fe la itre luemeke ne la itre timek, me aloine la itre lepera, me amelene hmaca la itre ka mec. Haawe, hetre kepin matre angatr a isa hnyinge ka hape: “Ame hë la kola traqa hnei Keriso, nyimutre la itre iamamanyikeu hnei nyidrëti hna troa kuca. Ngo hapeu, tha celë kö lai hna kuca hnene la atre ce?”—Ioane 7:31.

Matre ame hë la kola drenge lai hnei itre Faresaio, angatr me itretre huuj a upe pi la itretre thup troa xolouthi Iesu.