Iesu a ase amekunëne la aqane thith, ngo hetre itre xa ini hmaca kö hnei nyidrë hna anyimua qaja. Ame lo nyidrëti a kuci iamamanyikeu e Galilaia, hna silitrengathoi nyidrë ka hape, qaathene la tane la itre dremoni la mene i nyidrë. Ngazo pe, e Iudra, kolo hmaca a qaja lai göi nyidrë.

Enehila, Iesu a helëne la dremoni ka sawa la ketre atr troa ithanata, nge itre atr a hain. Ngo tha angatr asë kö, itre ka icilekeu me nyidrë a silitrengathoi nyidrëti hmaca, me hape: “Angeice lai a helëne la itre dremoni jëne la tan ne la itre dremoni, Belezebuba.” (Luka 11:15) Nge itre xan a aja hatrene qa hnengödrai matre anyipici Iesu.

Trotrohnine hi Iesu ka hape, angatr a tupathi nyidrë, matre nyidrëti a sa jë tune lo aqane sa i nyidrë e Galilaia. Nyidrëti a qaja jë ka hape, tro la nöjei baselaia ka cil koi angatre kö a patr, öni nyidrë: “Maine tro Satana a helë angeice kö, angeice hi lai a sipu cil koi angeice kö; nga troa cile tune kaa la musi angeic?” Thupene lai, nyidrëti a qaja mekötine ju ka hape: “Ngo maine eni a helëne la itre dremoni hnene la he ne wanakoime i Akötresie, kolo hi lai a hape, ase hë sasaithi nyipunie hnene la Baselaia i Akötresie.”—Luka 11:18-20, ithuemacany.

Ame la Iesu a qeje, “he ne wanakoime i Akötresie,” angetre Iudra a mekune hmaca lo ewekë ka traqa koi angetre Isaraela ekö. Ame lo Mose a kuci iamamanyikeu, hnene lo itre ka huliwa hnine la hnalapa i Farao hna qaja ka hape: ‘Celë hi wanakoime i Akötresie!’ Nge ‘wanakoime i Akötresieti’ fe la ka cinyihane la Treen lao Wathebo hune la lue neköi etë. (Esodo 8:19; 31:18) Ketre tun, ame la “he ne wanakoime i Akötresie”—ene la uati hmitrötr, men ka huliwa i Akötresie—celë hi ka aijijë Iesu troa helë dremoni, me aloinyi itre atr. Eje hi, ase hë sasaithe la itre ka icilekeu hnene la Baselaia i Akötresie, ke Iesu thei angatr, ene la joxu ne la Baselaia, nge nyidrëti a kuci iamamanyikeu.

Mama cile hi ka hape, tru catre kö la mene i Iesu hui Satana, ke atreine hi nyidrë helë dremoni. Thupene lai, Iesu a qaja hmaca jë la ceitun ne la atr hna amelen qaathene la dremoni. Nge e tha angeice kö a nyihnan hnei itre ewekë ka loi, tro hmaca la dremoni a bëek memine la ala seven, nge loi ju kö lo tro hnapan. (Mataio 12:22, 25-29, 43-45) Nge celë hi ka traqa kowe la nöje Isaraela.

Ame hnene la ketre föe ka drei Iesu hna qaja ka hape: “Madrine la föe ka hnaho nyipë me iji thi nyipë!” Aja ne la itre föe ne Iudra troa hnaho perofeta, ngo the qaja pala ha la Mesia. Matre, ma eahlo jë a mekune ka hape, atraqatre la madrine i Maria troa thinene la atre ini ka maca. Ngo Iesu a amekötine jë la mekuna i eahlo, me amamane la nyipi kepine troa madrin. Öni nyidrë: “Waea, ngo madrine pe la atre drenge la itre trengewekë i Akötresie, me catre trongëne ej!” (Luka 11:27, 28) Tha qaja pi kö Iesu ka hape, troa ketrepengöne la aqane troa ujë koi Maria. Eje hi, ame la qaane la nyipi madrin koi nöjei atr, tre tha ka xulu kö qa ngöne laka, sinee së la ketre atr, maine itre huliwa së, ngo qa ngöne la hna mele nyipici koi Akötresie.

Tune lo aqane kuca i nyidrë e Galilaia, Iesu a wesitrëne jë la itre atr ka sipo hatren qa hnengödrai. Nyidrë a qaja ka hape, pëkö xa hatrene  koi angatr, ngo “hatrene i Iona” hi. Iona la ketre hatren, ke hnei angeic hna lapa köni drai hnine la ie, me catre cainöj matre ietra pi angetre Nineve. Öni Iesu: “Ngo hanawang! hetre atr ka tru catre kö hui Iona e celë.” (Luka 11:29-32) Ketre, draië kö la inamacane i Iesu hui Solomona, joxu hna pi drenge hnene la joxu föe ne Sheba.

Thupene lai öni Iesu: “Maine kola amelene la laame cil, tha tro kö la atr a amë ej ngöne la götrane gaa tha mama, maine fene itrengen, ngo tro pe a atë ej hune la ketre ita ne laam.” (Luka 11:33) Kolo lai a hape, ame la troa hamë ini me kuci iamamanyikeu koi angatre la, tre kösë kola thunge la laam. Haawe, pine laka, hajihaji koi angatr, triane pë hë angatr la aliene la itre huliwa i nyidrë.

Iesu hi a ase helë dremoni, me aijijëne la hum troa ithanata. Matre maine ju, tro lai a ukune la itre atr troa atrunyi Akötresie, me qaja koi itre xan la itre huliwa i Iehova. Ngo tha hna tune kö koi itre ka icilekeu, matre Iesu a isa hmekë angatre jë, me hape: “Wange pala kö, ke miti hnine pi la lai thei eö. Ngo maine troa lai asë la ngönetrei eö, nge pëkö hnepe gaa mit, tro hë ej a hudrum tune la aqane hudrume la laam ka thina eö.”—Luka 11:35, 36.