E Iudra, Iesu a kapa la ihë ne la ketre Faresaio troa xen, ngo tha e heji kö. (Luka 11:37, 38; wange ju Luka 14:12.) Qëmeken troa xen, hnene lai Faresaio hna wasi wanakoim uti hë la iwatingöne im. Ngo tha kuca tune kö hnei Iesu. (Mataio 15:1, 2) Eje hi, tha hna wathebone kö hnei Akötresie troa kuca tun, ngo tha hna amekötine fe.

Kola sesëkötr hnene lai atr ka hape, tha trongëne kö Iesu la hna majemin celë. Nge trotrohnine hi Iesu, matre öni nyidrë: “Nyipunie itre Faresaio, nyipunieti a wasine la tröne kap me pala, ngo tiqa ha nyipunie hnei pi hetrenyi me thiina ka ngazo. Ume hmo! Tha hnene kö la atre xupe la trön hna hane xupe fe la hnin?”—Luka 11:39, 40.

Pëkö ejolene troa wasi wanakoim qëmekene troa xen, ngo ame la jol, tre aqane huliwa thoi i hmi. Ame la itre Faresaio me itre ka wasi wanakoime tun, tre tha wasine kö angatr la itre hni angatr hna adron hnei ngazo. Matre öni Iesu koi angatr: “Maine nyipunieti a pi hamë ahnahna ne utipin, hamëne jë qa kuhu hni, ke hanawang! Ame asë hi la itre ewekë hnei nyipunieti hna troa hamën, tre tro ha wië loi.” (Luka 11:41) Nyipici catre lai! E troa hamë ahnahna, tre qa kuhu hni, ngo tha göi tro kö a pi mama, me nyi ka meköt.

Tha kolo kö a hape, pëkö hnei angatr hna hamën. Ngo öni Iesu: “Nyipunie a hamëne la hnaatrenen la minet, me itre xa dröne sil, ngo tha nyipiewekëne kö nyipunie la meköt, me ihnimi Akötresie! Maine eje hi laka, hnëqa i nyipunieti lai troa hamëne la hnaatrenene la itre ewekë cili, ngo tha tro kö a patr la meköt, me ihnimi Akötresie.” (Luka 11:42) Hna amekötin hnei Akötresie troa hamën la hnaatrenene la hna menuën. (Deuteronomi 14:22) Kolo fe a qaja la minet me komina, lue dröne sil nyine apuiloinyi xen. Eje hi, itre Faresaio a kuiëne pala hi la hnaatrenen, ngo tune kaa kowe la ka nyipiewekë ngöne la Wathebo, tune la troa ipië qëmeke i Akötresie me tha nyi ka meköt?—Mika 6:8.

Öni Iesu hmaca: “Hnëjine hë nyipunie itre Faresaio, ke aja i nyipunie troa lapane la itre pane göhnë ngöne la itre sunago, nge aja i nyipunieti fe tro la itre atr a ibozu me metrötrë nyipunie ngöne la itre hna maketr! Hnëjine hë nyipunie, ke ceitu i nyipunie me itre hua ka tha mama kö, matre itre atr a waja trongën, ngo thatre pe angatr.” (Luka 11:43, 44) Eje hi, hetre itre hua ekö ka akeinyi itre atr, matre tha hmitrötre hmaca ha angatr. Iesu hi lai a amamane laka, tha mama cile kö la engazone la itre Faresaio.—Mataio 23:27.

Ame hna nyiqaane eetr hnene la ketre ka inine la Wathebo, öni angeic: “Atre Ini fe, ame la nyipëti a qaja la itre ewekë cili, nyipëti fe lai a hane akötrë hun.” Ngo nyipiewekë tro la itre atr ka tun a trotrohnine laka, triane hë angatr lo hnëqa ne ixatua i angatr. Matre öni Iesu: “Hnëjine fe hë nyipunie itretre inine la Wathebo, ke nyipunieti a ahacene la itre atr, me nyi ehnefe i angatr, ngo tha hane fe kö nyipunieti ketr la itre ehnefe cili hnene la hene wanakoime i nyipunie! “Hnëjine hë nyipunie, ke hnei nyipunieti hna xupe la hua ne la itre perofeta, ngo hnei itre qaaqaa i nyipunie hna humuthi angatr!”—Luka 11:45-47.

Ame la ehnef hna qaja hnei Iesu, tre itre qenenöj me aqane qejepengön itre Faresaio la Wathebo. Tha angatre kö a ahmaloeëne la itre atr. Ngo angatre pe a catre fë, me upi itre atr  troa trongën, matre ketre ehnefe ka tru. Hnene lo itre qaaqaa i angatr hna humuthe la itre perofeta, qaane Abela. Nge enehila, angatr a si hua kösë kola atrunyi itre perofeta, ngo casi hi la itre mekun me aqane ujë i angatr me itre qaaqaa i angatr. Nge angatre fe a thele troa humuthe la Perofeta ka Sisitria i Akötresie. Öni Iesu ka hape, tro Akötresie a hnyingë pengön, me të kowe la xötr atr celë. Hna traqa lai a 38 lao macatre thupen, ngöne lo macatre 70 M.K.

Öni Iesu hmaca: “Hnëjine hë nyipunie itretre inine la Wathebo, ke nyipunieti a thingi jëne la itre atr troa hetre inamacan göi Akötresie, ngo ketre patre kö thei nyipunie la inamacane cili, nge goi sawa fe nyipunie la itre atr ka ajane troa lö kow!” (Luka 11:52) Qa ne la itre atre cili troa qejepengöne la trengewekë i Akötresie, ngo angatre hmaca kö la ka ajolë itre xan troa atre me trotrohnin.

Tune kaa la itre Faresaio me itretre cinyihan? Ame ju hi la Iesu a mekune troa tro, elëhni jë hi angatr, nge angatr a anyimua hnyinge jë koi nyidrë. Ngo tha göi troa kepe ini, ngo matre tria pi Iesu, nge ijiji angatre hë troa xolouthi nyidrë.