Ngöne la götrane koië ne la Wetr Elaio, hetre traon hna hëne ka hape, Bethania, a traqa koi 3 km qa Ierusalema. (Ioane 11:18) Iesu a tro ju e cili, me lö kowe la hnalapa ne la lue trejin, Maretha me Maria. Nyidro me xa i nyidro Lazaro, la itre sinee i Iesu, matre nyidroti a kepe nyidrëti hnyawa ju.

Ahnahna ka tru la troa kapa la Mesia. Aja i Maretha troa kepe nyidrëti hnyawa, matre angeic a nyiqaane hnëkë xen. Nge ame la angeic a catre huliwa, Maria pe a lapa ezine lue ca i Iesu me drei nyidrë. Matre nango qea pi hë, öni Maretha koi Iesu: “Joxu, tha ngazo kö koi nyipë tro la jining a nuaxöji ni fë la itre jol? Upi angeice jë troa hane xatua ni.”—Luka 10:40.

Ngo tha wesitrë Maria kö hnei Iesu, ngo nyidrëti pe a xatua Maretha troa trotrohnine laka, tru catre la hnei angeic hna hnehengazo göi xen. Öni nyidrë: “Maretha, Maretha, eö a xou me hnehengazone la nöjei pengöne ewekë, ngo xalaithe hi la itre ka nyipi ewekë, nge casi hi la ka sisitria. Nge ame Maria, hnei angeice hna iëne la götrane ka loi, matre tha tro pi kö a thapa lai qaathei angeic.” (Luka 10:41, 42) Eje hi, Iesu a amamane laka, tha nyipiewekë kö troa hnëkë xen atrun, ke ka aluzi traem. Loi hi la hnepe hna hetreny.

Tha ngazo kö la mekuna i Maretha. Aja i angeic troa ikepe hnyawa. Ngo pine laka angeic a sikusiku xen, triane pë hë angeic la itre ini ka tru qaathene la sipu Nekö i Akötresie! Iesu pe a acatrene laka, hnei Maria hna iëne hnyawa, ke tro lai a hetre thangan palua koi angeic, nge kolo fe a ini së enehila.

Ngöne la ketre ijin, hnei Iesu hna hamëne la ketre ini ka tru. Önine la ketre atre dreng ka hape: “Joxu, pane ini huni jë la aqane troa thith, tune la aqane kuca Ioane kowe la itretre drei angeic.” (Luka 11:1) Ase hë Iesu qaja la aqane thith, ma ca macatre hë nge sin ngöne lo Cainöj Hune La Wetr. (Mataio 6:9-13) Ngo ma patre pala kö la atre dreng cili, matre nyidrëti a qaja hmaca jë. Thupene lai, nyidrëti a hamëne pi la ketre ceitun göi troa amamane laka, e tro sa thith, nyipiewekë troa sipo lapa.

Öni Iesu: “Pane mekune jë laka, tro la ketre e nyipunie a tro kowe la hnalapa ne la sinee i angeic e hnenyipa jidr, me hape: ‘Sineeng, sipo köni falawa ke traqa ha la ketre sineeng qaa gaa nany, nge pëkö nyine tro ni a hamë angeic.’ Ngo önine jë lai atr e hnine la uma ka hape: ‘The ikucahmë kö. Ase hë ni kine la qëhnelö, nge eni fe hë la me ha nekönge a meköl. Jole koi ni troa mejë me hamë eö la ketre ewekë.’ Ngo eni a qaja hnyawa koi nyipunie laka, maine tha tro kö la atre cili a mejë pine laka, sinee i angeic la ka sipo, ngo tro hë angeic a mejë pine la aqane ielene lai atre sipo, matre hamë nyën la nöjei ewekë hnei nyëne hna ajan.”—Luka 11:5-8.

Tha Iesu kö a qaja ka hape, xele kö Iehova ma sa la itre thithi së, tune lo sinee. Ngo kolo pe a amamane laka, maine tro la sinee ka xel a kapa e hna sipone lapan, the qaja pala ha la Keme së ka ihnim, tro nyidrëti a sa kowe la itre sipo ne la itre hlu ka mele nyipici! Öni Iesu hmaca: “Eni a qaja koi nyipunie, sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie. Ke tro ha kapa hnei atre sipo, nge tro ha öhne hnei atre thel, nge ame koi atre fenafena, tro ha thawa koi angeic.”—Luka 11:9, 10.

 Thupene lai, Iesu a acatrene jë la mekune cili me xome la tulu ne la itre kem, öni nyidrë: “Drei keme la ka troa hamë une kowe la nekö i angeic nge kolo pe a sipo ie? Maine pena, e tro nyën a sipo wakuja tro pena a hamë sekopio? Haawe, maine nyipunie, itre atr ka ngazo, a atreine hamë ahnahna ka lolo kowe la itre nekö i nyipunie, nga the qaja pala ha la Keme i nyipunie e koho hnengödrai, atre hamë uati hmitrötr kowe la angetre sipo nyidrë!” (Luka 11:11-13) Drei la kola akeukawanyi së troa atre ka hape, pi tro fe la Keme së a drei së, me hamën la ka ijij!