Iesu pala kö a hamë ini ne mel ngöne la ijine Feet Ne Ihmelekap. Kolo hi a ase qaja hnei itretre Iudra e cili ka hape: “Eahuni la itre nekö i Aberahama, matre tha itre hlue kö hun.” Matre öni Iesu: “Atre hi ni laka, itre nekö i Aberahama nyipunie. Ngo nyipunie a thele troa humuthi ni, ke ka gufa la itre trengewekëng thei nyipunie. Eni a qaja la itre ewekë hnenge hna öhne lo ce eni me Kaka, ngo nyipunie a kuca la itre ewekë hna dreng qaathene la keme i nyipunie.”—Ioane 8:33, 37, 38.

Iesu hi lai a qaja atrune la ketre nyipici: Isa keme i angatre kö. Ngo tha nyipiewekëne kö angetre Iudra, angatr pe a catre fë ka hape: “Aberahama la keme hun.” (Ioane 8:39; Isaia 41:8) Eje hi, itre matra i Aberahama angatr. Ngo angatre pe kö a mekune ka hape, pine laka qaaqaa i angatr, casi la lapaune i angatr me Aberahama, sinee i Akötresie.

Iesu a asesëkötrë angatre jë me hape: “Maine nyipunieti ju la itre nekö i Aberahama, nga tro fe hi nyipunie a kuca lo itre huliwa i Aberahama.” Eje hi, itre nekön a nyitipu kem. “Ngo enehila,” öni Iesu, “nyipunieti a thele troa humuthi ni, eni, lo atre qaja la nyipici hnenge hna drenge qaathei Akötresie. Ngo tha hane fe kö Aberahama kuca tun.” Matre Iesu a qaja jë la ketre ewekë hnei angatr hna tha trotrohnin, öni nyidrë: “Nyipunieti a kuca la itre huliwa ne la keme i nyipunie.”—Ioane 8:39-41.

Tha mama kö koi angetre Iudra ka hape, Iesu a qeje drei. Matre angatr a catre fë ka hape, itre nekön angatr, öni angatr: “Tha itre nekö ne gojenyi kö hun, casi hi la keme hun, Akötresie.” Ngo hapeu, Akötresieti kö la keme i angatr? Öni Iesu: “Maine Akötresie la Keme i nyipunie, nga tro hi nyipunieti lai a hnimi ni, ke hna upi ni hnei Akötresie, nge hnei nyidrë, matre eni pi la. Tha hnenge kö hna sipu mekun troa traqa e celë, ngo hnei nyidrëti pe hna upi ni.” Thupene lai, Iesu a hnyinge jë me sa ka hape: “Hnauëne laka, tha trotrohnine kö nyipunie la hnenge hna qaja? Pine laka, thatreine kö nyipunie kapa la itre trengewekëng.”—Ioane 8:41-43.

Iesu hi lai a amamane la engazone troa xele nyidrë. Ngo enehila, nyidrë a qaja mekötine koi angatr ka hape: “Diabolo pe la keme i nyipunie, nge pi tro fe nyipunie a eatrëne la aja ne la keme i nyipunie.” Tune kaa la keme i angatr? Iesu a qejepengöi angeic me hape: “Atre ihumuth angeic qaane lo qaan, nge tha cile huti kö angeic ngöne la nyipici.” Nge öni nyidrëti hmaca: “Matre ame la itre nekö i Akötresie, tre itre ka drenge la trengewekë i Akötresie. Nge ame la kepin matre tha drei Akötresieti kö hnei nyipunie, tre, tha itre nekö i Akötresieti kö nyipunie.”—Ioane 8:44, 47.

Angetre Iudra a elëhni me sa ka hape: “Hapeu, tha nyipici kö la hne huni hna qaja ka hape: ‘Atre Samaria eö, nge hna löthi eö hnei dremoni’?” Angatr a jele Iesu “atre Samaria,” nyine amamane la trenge elëhni angatr koi nyidrë. Ngo tha nyipiewekëne kö Iesu, öni nyidrë: “Tha hna löthi ni kö hnei dremoni, eni a atrune la Kemeng, ngo nyipunieti pe a ahmahmanyi ni.” Thupene lai, nyidrëti a sisinyi jë nyine amamane laka, tha ewekë nyine tro kö a wangacon. Öni nyidrë: “Maine tro la ketre atr a trongëne la itre trengewekëng, tha tro jë kö angeice lai a hane mec.” Tha nyidrëti kö a qaja ka hape, tha tro pi kö a mec la itre aposetolo me itre ka xötrethenge nyidrë. Ngo kola hape, tha tro kö a apatrene palua angatr, ene lo “hnaaluene mec,” laka, pëkö mele hmaca ka ijij.—Ioane 8:48-51; Hna Amamane 21:8.

Ngo tria kö la aqane trotrohnin angetre Iudra la itre trengewekë i Iesu, ke öni angatr: “Enehila, atre hë huni laka, hna löthi eö hnyawa hnei dremoni. Ke meci hë Aberahama me itre perofeta, ngo öni eö, ‘Maine tro la ketre a trongëne la itre trengewekëng, tha tro pi kö angeice  lai a hane mec.’ Tha sisitria kö eö hui Aberahama keme hun, eje hi? . . . Drei kö eö?”—Ioane 8:52, 53.

Mama hnyawa hi ka hape, Iesu la Mesia. Ngo tha sa mekötine kö nyidrë, öni nyidrëti pe: “Maine eni a sipu atrunyi ni kö, ka gufa lai. Ngo Kemenge pe la ka atrunyi ni, ene lo hnei nyipunieti hna selëne ka hape, Akötresi nyipunie. Thatre nyidrëti pala kö hnei nyipunie, ngo eni casi hi. Nge maine tro ni a qaja koi nyipunie ka hape, thatre nyidrëti kö ni, tro [fe] hë ni a ketre atre thoi.”—Ioane 8:54, 55.

Iesu hmaca a qaja lo keme i angatr ka mele nyipici, öni nyidrë: “Hnei Aberahama, keme i nyipunie hna lapa treqene la drai ne tro ni a traqa. Nge öhne hë angeice lai me madrin.” Eje hi, pine laka, angeic a mejiune kowe la itre hna thingehnaean hnei Akötresie, hnei Aberahama hna lapa treqene la Mesia. Ngo öni angatr: “Tha traqa petre kö eö koi 50 lao macatre, nge öhnyi Aberahama fe hë eö?” Ngo öni Iesu: “Nyipici, eni a qaja hnyawa koi nyipunie, qëmekene troa hnaho Aberahama, eni fe hë.” Iesu a ithanatane lo nyidrëti a ketre angela ka catr e hnengödrai.—Ioane 8:56-58.

Angetre Iudra a elëhni pine Iesu qaja ka hape, pa i nyidrëti kö mel hui Aberahama, matre angatr a thele troa tranyi nyidrë hnei etë. Eloine hi, kötre tro hë Iesu.