Ngöne la hnaasevenene drai ne la Feet Ne Ihmelekap, lo drai tixenuë, Iesu a hamë ini ngöne la uma ne hmi, lo götran hna hape, “hnë kuië mani.” (Ioane 8:20; Luka 21:1) Kola mekune laka, ame la hnë kuië mani, tre ngöne la Götrane La Itre Föe.

Nge e hej, ka mel la götrane cili, ke hna amë la foa lao lame cil atraqatr, me foa lao baketrë oel nyine trem. Nge pine laka, ka mele catre la itre lame cili, lualai asë hi. Nge itre trengewekë i Iesu a amekunë itre ka dreng la itre lame cili. Öni nyidrë: “Eni hi la lai ne la fen. Matre ame la atre xötrethenge ni, tha tro hmaca kö angeic a tro ngöne la jidr, ngo tro pë hë angeic a hetrenyi la lai ne mel.”—Ioane 8:12.

Ngo xele fe itre Faresaio ma kapa, matre canga öni angatr jë hi: “Eö lai a sipu anyipici eö, matre tha nyipici kö la hnei eö hna qaja.” Ngo öni Iesu: “Ngacama eni a anyipici ni kö, ngo nyipici hi la hnenge hna qaja, ke atre kö ni ka hape, atre kaa ni, nge eni a tro ië. Ngo thatre pe nyipunie ka hape, atre kaa ni, nge eni a tro ië.” Nge öni nyidrëti hmaca: “Hnene lo Trenge Wathebo i nyipunie hna qaja ka hape: ‘Ka nyipici la ewekë hna jelenyipicine hnei ala lu.’ Matre eni a sipu anyipici ni, nge kolo fe a anyipici ni hnei Kaka, Atre upi ni.”—Ioane 8:13-18.

Ngo xele pala hi itre Faresaio ma kapa, matre öni angatr: “Nga ekaa la Keme i eö?” Iesu a sa mekötine jë ka hape: “Thatre ni kö hnei nyipunie, nge goi thatre fe nyipunieti la Kemeng. Ke maine atre ni ju hnei nyipunie, tro fe hi nyipunieti lai a hane atre la Kemeng.” (Ioane 8:19) Ngacama itre Faresaio a pi xolouthi Iesu, ngo pëkö ca ka enij.

Iesu a amexeje jë ka hape: “Eni ha tro, nge tro pë hë nyipunie a thele ni, ngo tro pe nyipunie a mec ngöne la itre ngazo i nyipunie. Ke ame la götran hnenge hna tro kow, tha ijiji nyipunieti kö troa tro kow.” Ngo tha trotrohnine  kö angetre Iudra, matre angatr mekune menune koilo, me hape: “Tha angeice kö a troa hnöjua, eje hi? Ke öni angeic, ‘Ame la götran hnenge hna tro kow, tha ijiji nyipunieti kö.’ ” Tha trotrohnine kö angatr la itre trengewekë i Iesu, ke thatre kö angatr ka hape, ka qa kaa nyidrë. Matre öni nyidrë: “Angetre fene nyipunie, ngo atre hnengödrai ni. Matre nyipunieti hi la itre atre ne fen, ngo tha eni kö.”—Ioane 8:21-23.

Iesu lai a ithanatane lo mele i nyidrë e hnengödrai, me amamane ka hape, nyidrë la Mesia, lo Keriso hna lapa treqen hnei itre hene ne hmi. Ngazo pe, angatr a pi tru me hnyinge ka hape: “Ke drei eö?”—Ioane 8:25.

Pine la aqane pi tru i angatr, öni nyidrë: “A hnauëne la eni a ithanata me nyipunie?” Nyidrëti a uku angatr troa mekune la Keme i nyidrë, me qaja la kepin laka, loi e tro angetre Iudra a drenge la Nekön. Matre öni nyidrë: “Ka nyipici la Atre upi ni, nge ame la nöjei ewekë hnenge hna dreng qaathei nyidrë, eni fe hi a qaja kowe la fen.”—Ioane 8:25, 26.

Thupene lai, Iesu a amamane jë la mejiune i nyidrë kowe la Kem, mejiun ka patr thei angetre Iudra. Öni nyidrë: “Thupene la tro nyipunie a athipe la Nekö i atr, tro hë nyipunie a wangatrehmekune laka, eni hi lai atr cili, nge tha hnenge kö hna sipu kuci mekun; ngo thenge la hna ini ni hnei Kaka, eni a qaja ju. Nge ce eni pala hi memine la Atre upi ni, nge tha hnei nyidrëti kö hna nuaxöji ni, ke eni pala hi a kuca la itre ewekë ka amadrinë nyidrë.”—Ioane 8:28, 29.

Eloine hi, hetre xa angetre Iudra ka lapaune koi Iesu, matre öni nyidrëti koi angatr: “Maine tro pala hi nyipunieti a lapa ngöne la itre trengewekëng, nyipunieti hnyawa hi la itretre drei ni. Nge tro hë nyipunieti a atre la nyipici, nge tro la nyipici a nuamele nyipunie.”—Ioane 8:31, 32.

Itre xan a sesëkötr la Iesu a qeje inuamele, matre öni angatr: “Eahuni la itre nekö i Aberahama, matre tha itre hlue kö hun. Ngo eö a qaja fë nemene ka hape, ‘Troa nuamele hun’?” Atre hi angetre Iudra ka hape, hna hane musinë angatr hnei itre musi trenyiwa, ngo methi angatr troa qaja ka hape, itre hlu angatr. Ngo Iesu a amamane koi angatr ka hape, itre hlue pala kö angatr, matre öni nyidrë: “Eni a qaja hnyawa koi nyipunie, ame la nöjei atr ka kuca lapane la ngazo, itre hlue ne la ngazo angatr.”—Ioane 8:33, 34.

Troa hetre ethan e tro pala hi la angetre Iudra a xele ma kapa ka hape, itre hlue ne la ngazo angatr. Eje hi, öni Iesu: “Tha ka lapa palua kö la hlu ngöne la hnalapa i maseta, ngo neköne pe.” (Ioane 8:35) Pëkö edrö ne la hlue, nge ijije hi troa upi angeic qa ngöne la hna huliwa. Ngo ame kö la nekön, maine la hna nyi kukun, angeice hi la ka troa “lapa palua,” kola hape, ka lapa uti hë mec.

Nge ame la nyipici göi Nekön, tre nyipici ka nuamelene la itre atr qa ngöne la ngazo ka axulune la mec. Öni Iesu: “Maine tro la nekön a nue xecië nyipunie, ka mele hë nyipunieti lai.” —Ioane 8:36.