Iesu a qaja ka hape, tro hmekuje hi la “itre mamoe ka xalaith” a hetre göhnë e hnengödrai. (Luka 12:32) Ngo tha ewekë kö nyine tro angatr a wangacon. Matre nyidrëti a qaja hmaca jë ka hape, nyipiewekë troa thiina ka lolo, e aja i angatr troa sine la Baselaia.

Thupene lai, Iesu a thuecatre i angetre dreng troa hnëkë göne la ijine tro nyidrëti a bëeke hmaca. Öni nyidrë: “Haawe, heetre jë, hnëkë jë, nge loi e mele la itre laame cile i nyipunie, nge tro nyipunieti a ceitu me itre hlue ka lapa treqe maseta e bëeke qa hna faipoipo, matre e traqa pi nyidrë me fenafena, ijiji angatre hi troa thawa koi nyidrë. Haawe, manathithi la itre hlue hna öhne hnei maseta a kola hmek!”—Luka 12:35-37.

Tha jole kö koi angetre dreng troa trotrohnine la ceitune i Iesu. Ka hnëkë itre hlue troa kepe maseta. Matre öni Iesu: “Maine traqa ju nyidrë ngöne la hnaaluene hawa [qane naen e hej koi minui], maine hnaakönine pena [qane minui koi könitre e hmakany], me öhnyi angatr a ka hmek, haawe, manathithi hë angatre lai!”—Luka 12:38.

Tha Iesu hmekuje kö a hamë eamo göi aqane troa huliwa hnyawa. Kola mama lai ngöne la nyidrëti a qeje nyidrë hnine la ceitun. Öni nyidrë koi itretre dreng: “Nyipunieti mina fe, loi e ka hnëkë pala hi nyipunie, ke tro ha traqa la Nekö i atr ngöne la hawa hnei nyipunieti hna tha mekun.” (Luka 12:40) Haawe, elany tro Iesu a traqa. Nge aja i nyidrë tro la itre ka xötrethenge nyidrë a hnëkë, nge nyipiewekë catre koi itre “mamoe ka xalaith.”

Aja i Peteru troa trotrohnine hnyawa, matre angeic a hnyinge jë me hape: “Joxu, nyipëti a hamëne la ceitune celë koi huni hmekuj, maine koi nöjei atr asë?” Ngo tha sa mekötine kö Iesu, nyidrëti a hamë angeice jë la ketre ceitun. Öni nyidrë: “Matre drei lo atre thupë hnalapa ka nyipici, lo atre inamacan, ene lo hnei maseta hna troa acil hune la lapa ne la itre hlu, matre thewe xeni koi angatr thenge la hna ajan, ngöne la nyipi ijin? Haawe, manathithi la hlue cili, e traqa la maseta a öhnyi angeic e kuca lai! Eni a qaja hnyawa koi nyipunie, tro hë nyidrëti lai a acili angeice hune la nöjei ewekë i nyidrë asë.”—Luka 12:41-44.

Ngöne lo pane ceitun, Iesu la “maseta,” lo Nekö i atr. Haawe, ame la “atre thupë hnalapa ka nyipici,” tre itre atr ka sine la “itre mamoe ka xalaith,” nge ka troa sine la Baselaia. (Luka 12:32) Matre Iesu hi a qaja ka hape, tro la itre xa ka sine la lapa celë a thupëne la “lapa ne la itre hlu,” ene la troa “thewe xeni koi angatr thenge la hna ajan, ngöne la nyipi ijin.” Qa ngöne lai, xeci hë koi Peteru me itre xa atre dreng, itre hna thuan hnei itre ini i Iesu laka, tro hmaca nyidrëti a traqa elany. Nge ngöne la ijine cili, tro ha eköth la ketre ewekë matre thuane la itretre drei Iesu, Maseta ne “la lapa ne la itre hlu.”

Thupene lai, Iesu a amamane hmaca jë laka, nyipiewekë koi itretre dreng troa thupëne la aqane ujë i angatr. Nyidrëti a hmekë angatr wanga tha huliwa catre pi, maine qanangazo itre xa hlue pena. Öni nyidrë: “Ngo e traqa ju la hlue mekune e kuhu hni angeic ka hape, ‘Hmitre pala kö la masetang,’ matre angeic a nyiqaane lepe la itre hlu, trahmanyi me föe, me xeni me ij, me hmo hnei ka haitr, nge tro la maseta ne la hlu cili a traqa ngöne la drai hnei angeic hna tha mekune kö, me hawa hnei angeice hna thatre, tro ha catre la aqane nyithupene maseta la ngazo i angeic, me ce ami angeic me itre ka tha idrei.”—Luka 12:45, 46.

Öni Iesu fe ka hape, nyidrë a “traqa troa amele eë ngöne la fene hnengödrai.” Nge eje hi, nyidrëti  a amejë itre hnying ka akötr, matre kola cia la isi ithanata, me apën la qenenöj me itre ini ka thoi. Nge goi iwesitrë fe la itre lapa ka cahae, ke “tro hë a iwesitrë la keme memine la nekö trahmany, nge nekö trahmanyi me kem, me thine me nekö jajiny, nge nekö jajinyi me thin, me ifëtresi hmunë me tresi hmunë, nge tresi hmunë me ifëtresi hmunë.”—Luka 12:49, 53.

Iesu lai a ithanata kowe la itretre drei nyidrë. Thupene lai, nyidrëti a ujë jë kowe la ka ala nyim. Ala nyimu thei angatr ka xele ma kapa laka, nyidrë la Mesia, matre öni nyidrë: “Ame la nyipunieti a öhne la iaw e kuë, canga öni nyipunieti jë hi, ‘Calemi hë la enyi ka catr.’ Ame hna traqa pi. Nge ame hë la nyipunieti a drenge la enyi a hnahna qaa kolojë, öni nyipunie, ‘Tro ha hedredrei catr.’ Ame hna traqa pi. Itretre thoi! Atreine hi nyipunie waipengöne la ihnadro me hnengödrai, ngo hnauëne kö laka, thatreine kö nyipunie waipengöne la hneijine ka ketre pengöne celë?” (Luka 12:54-56) Eje hi, tha hnëkë pala kö angatr.