Iesu e Ierusalema göne la Feet Ne Xötrei Löth. Kola atrune la ijine ahmitrötrëne hmaca la uma ne hmi. Itre hadredre lao macatre qëmeken, hnene la Joxu ne Suria, Epifana Anetioka IV hna xupe la ketre ita ne huuj, hune lo ita ne huuj ka tru ne la uma ne hmi i Akötresie. Matre e thupen, hnene la itre nekö ne la ketre atre huuj ne Iudra hna thepe Ierusalema, me ahmitrötrëne hmaca thatraqai Iehova. Qaane ju hi lai, hna acile la ketre feet e nöjei macatre, ngöne la drai 25 Kislev. Kolo hmekune la pune treu Nofeba memine la kola xejë la treu Diseba.

Ijine hnötre la ijine cili. Iesu a tro hnine la uma ne hmi, hmekune lo itre ikapa i Solomona. Traqa ju hi la angetre Iudra a cile xötreithi nyidrë, nge öni angatr: “[Eue] la tro eö a qaja la nyipici göi eö [maine, “Eö kö la Keriso maine waea”]?” (Ioane 10:22-24) Iesu a sa tune kaa? Öni nyidrë: “Ase hë ni qaja koi nyipunie, ngo tha mejiune kö nyipunie.” Tha qaja mekötine kö Iesu, tune lo aqane kuca i nyidrë kowe la föe ne Samaria ngöne la timi hna kuj. (Ioane 4:25, 26) Ngo ase hë nyidrëti sa, ke öni nyidrëti lo: “Qëmekene troa hnaho Aberahama, eni fe hë.”—Ioane 8:58.

Aja i Iesu tro la itre atr a goeëne la itre huliwa i nyidrë, me itre hna perofetan göi Keriso. Qa ngöne lai, tro hë angatr a sipu trotrohnine laka, nyidrë la Keriso. Celë hi matre itre xa ijin, hnei nyidrë hna wathebo itretre dreng troa qaja ka hape, nyidrë la Mesia. Ngo enehila, nyidrëti a qaja kowe la angetre Iudra ka imethinë ka hape: “Ame la itre huliwa hnenge hna kuca ngöne la ëje i Kaka, celë hi ka anyipici ni. Ngo tha kapa kö nyipunie.”—Ioane 10:25, 26.

Hnauëne la tha kapa kö angatr? Öni nyidrë: “Tha kapa kö nyipunie, ke tha itre mamoenge kö nyipunie. Ke ame la itre mamoeng, nyudreni a drenge la nine ithanatang, nge atre nyudreni kö ni, nge nyudreni a xötrethenge ni. Matre tro ni a hamë nyudreni la mele ka pë pun, nge tha tro jë kö a lepe apatrenyi nyudren, nge pëkö atr ka troa thapa la itre mamoeng qa ngöne la imeng. Ke ame la ewekë hna hamë ni hnei Kaka, tre sisitria catre kö hune la nöjei ewekë asë.” Thupene lai, Iesu a amamane jë la ecatrene la imelekeu i nyidrë me Keme i nyidrë. Öni nyidrë: “Casi hi ni me Kaka.” (Ioane 10:26-30) Iesu e celë fen, nge Keme i nyidrë e hnengödrai, matre tha nyidrëti kö a qaja ka hape, ca ngönetrei i nyidro. Ngo nyidroti a cas, ke nyidro a ce huliwa, nge casi hi la aja i nyidro.

Itre trengewekë i Iesu a amejëne la trenge hni i angetre Iudra, matre angatr a hleme hmaca pi la itre etë troa tranyi nyidrë. Ngo tha xou Iesu kö, öni nyidrë: “Hnenge hna qaja amamane koi nyipunie la itre huliwa ka lolo i Kaka, nga hnei nemene huliwa kö matre nyipunieti a thele troa tranyi ni?” Sa jë hi angatr ka hape: “Eahuni a tranyi eö, ke tha hnei huliwa ka loi kö, ngo pine eö silitrengathoi Akötresie . . . eö a pi nyi akötresie.” (Ioane 10:31-33) Tha hane kö Iesu qaja ka hape, nyidrë la ketre akötresie, nga angatr a qeje nyidrëti fë nemen?

Iesu a qaja ka hape, hetre mene i nyidrë, ngo ame koi angetre Iudra, Akötresieti casi hi la ka atreine kuca lai. Koi itre “mamoe” öni Iesu: “Tro ni a hamë nyudreni la mele ka pë pun,” ewekë hna thatreine hamën hnei atr. (Ioane 10:28) Ngo thëthëhmine hë angatr lo hnei Iesu hna qaja ka hape, hnei nyidrëti hna kapa la men qaathei Keme i nyidrë.

Iesu a sa jë ka hape: “Hapeu, tha hna hane kö cinyihan hnine la Trenge Wathebo i nyipunie [ngöne Salamo 82:6], ka hape ‘Öning: “Itre akötresie nyipunie” ’? Haawe, . . . Akötresie a hëne la itre hnei nyidrëti hna jelengazone ka hape, ‘itre akötresie,’ . . . Ngo eni hi lo atr, ene la atr hnei Akötresie hna ahmitrötrën me upe kowe la fen,  matre hnauëne la nyipunie a qeje ni ka hape, ‘Eö a silitrengathoi Akötresie,’ ke öning, ‘Eni la Nekö i Akötresie’?”—Ioane 10:34-36.

Eje hi, Itre Hna Cinyihan a hëne la itre atre iameköti ka tha meköti kö ka hape, “itre akötresie.” Matre tro pe kö la angetre Iudra a qeje Iesu fë nemen pine nyidrë qaja ka hape, “Eni la Nekö i Akötresie”? Nyidrëti a amamane jë la aqane tro angatr a mejiun, öni nyidrë: “Maine tha kuca kö ni la huliwa i Kaka, the mejiune kö koi ni. Ngo maine eni hi a kuca la itre huliwa i nyidrë, nge tha mejiune pala kö nyipunie koi ni, nga mejiune jë kowe la itre huliwa hna kuca. Matre tro nyipunie a atre me trotrohnine laka, ce Kaka me eni, nge ce eni me Kaka.”—Ioane 10:37, 38.

Qa ngöne lai, hnei angetre Iudra hna thele troa xolouthi Iesu, ngo eloine hi, hnei nyidrë hna canga kötr. Nyidrëti a tro qa Ierusalema, me sasaithe la Hneopegejë Ioridrano, matre traqa kowe lo götrane hnei Ioane hna bapataiso atr, a foa lao macatre enehila. Nge ma tha nanyi kö qa ngöne la götrane kolopi ne la Hnagejë Ne Galilaia.

Ala nyimu la itre ka traqa koi Iesu me hape: “Tha hane kö Ioane kuci iamamanyikeu, ngo ka nyipici asë hi la nöjei ewekë hnei Ioane hna qaja göne la atre celë.” (Ioane 10:41) Matre, ala nyimu la angetre Iudra ka lapaune koi Iesu.