Easenyi hë matre nyipune jë la macatre 32 M.K., nge köni macatre hë thupene lo hna bapataiso i Iesu. Kolo hi a ase feetëne la Feet Ne Ihmelekap, nge ma Iesu pala kö me itretre dreng ezine Ierusalema. (Luka 10:38; Ioane 11:1) Nge ngöne la sikisi lao treu thupen, tro nyidrëti a cainöj e Iudra me Perea, ngöne la ketre götran ne la Hneopegejë Ioridrano, ke nyipiewekë fe troa cainöj e cili.

Lue macatre qëmeken, thupene lo Paseka 30 M.K., hnei Iesu hna pane cainöj e Iudra me trongëne la nöje Samaria. Thupene lai, hmekune lo Paseka 31 M.K., hnene lo angetre Iudra e Ierusalema hna thele troa humuthi nyidrë. Nge ngöne la ca macatre nge sin, hnei Iesu hna hamë ini e kolopi e Galilaia, nge ala nyimu la itre ka xötrethenge nyidrë. E Galilaia, hnei nyidrëti fe hna hamë ini kowe la itre aposetolo, me upi angatr me hape: “Cainöjëne jë ka hape: ‘Calemi hë la Baselaia ne hnengödrai.’ ” (Mataio 10:5-7) Enehila, nyidrëti a hnëkëne la ketre ijine troa cainöj atrun e Iudra.

Iesu a pane iëne jë la 70 lao atre dreng, me upi angatr isa ala lu. Matre kola e la 35 lao ekip hna upe troa cainöjëne la Baselaia ngöne la ketre götrane laka, “tru catre la nyine menuën, ngo xalaithe hi la itretre menu.” (Luka 10:2) Qa i angatr troa tro pa kowe la itre traon hnei Iesu hna mekun troa tro kow. Nge tro angatr e cili a aloine la itre trene mec, me tro fë la maca hnei Iesu hna cainöjën.

Tha loi kö e tro hi la itretre dreng a hamë ini hnine la itre sunago. Matre Iesu a upi angatre jë troa tro kowe la itre hnalapa trootro. Nge öni nyidrë: “E traqa jë nyipunie lö kowe la ketre uma, pane qaja ju ka hape: ‘Epi troa tingetinge la hnalapa celë.’ Nge maine hetrenyi e cili la ketre atre aja tingeting, tro la tingetinge i nyipunie a lapa hui angeic.” Nemene la maca i angatr? Öni Iesu: “Qaja ju koi angatre ka hape: ‘Easenyi hë la Baselaia i Akötresie.’ ”—Luka 10:5-9.

Ame la hna amekötin hnei Iesu kowe la ala 70, tre ceitu hi memine lo hnei nyidrëti hna qaja kowe lo ala 12 ca macatre qëmeken. Nyidrëti a hmekë angatre laka, tha tro asë kö la nöjei atr a kepe angatr. Ngo tro la trengecatre i angatr a aijijëne la itre ka ajan, troa kepe Iesu me xomi ini qaathei nyidrë.

Thupene lai, hnene lo 35 lao ekip ne cainöj hna bëeke koi Iesu, nge atraqatre la madrine i angatr. Öni angatr: “Joxu, goi drei huni fe hnene la itre dremoni la eahuni a ameköti angatr ngöne la ëje i nyipë.” Drei jë kö la  —madrin i Iesu, matre öni nyidrë: “Öhnyi Satana ha ni a mala qaa hnengödrai, tune la samek. Hanawang! Ase hë ni aijijë nyipunie troa waja fica la itre un me sekopio.”—Luka 10:17-19.

Iesu hi lai a thuecatre i angatr ka hape, ijiji angatr troa elë hune la itre jol, itre hna aceitunën me un me sekopio. Ketre, kolo fe a anyipicine laka, easenyi hë troa triji Satana qa hnengödrai. Nge enehila, Iesu a xatuane la ala 70 troa trotrohnine la mekune ka nyipiewekë. Öni nyidrë: “Ame pe, the madrine kö pine la hna drei nyipunie hnei itre dremoni, ngo madrine jë pe laka, hetre ëje i nyipunieti fe hë e hnengödrai.”—Luka 10:20.

Atraqatre la madrine Iesu, nge Iesu a atrunyi Akötresie, ke nyidrëti a iëne la itre hlue ka ipië troa kuca la itre huliwa ka men. Iesu a qaja jë kowe la itretre dreng ka hape: “Manathithi la itre lue mek ka öhne la itre ewekë hnei nyipunieti hna goeën. Eni a qaja koi nyipunie, ala nyimu la itre perofeta me itre joxu ka hane pi goeëne la itre ewekë hnei nyipunieti hna goeën, ngo tha öhne kö angatr, me hane pi drenge la itre ewekë hnei nyipunieti hna dreng, ngo tha drenge ju kö angatr.”—Luka 10:23, 24.