Iesu me itre sinatronge i nyidrë a traqa e Ieriko, ca drai ka pexej la tronge i angatr qa Ierusalema. Nge ame Ieriko, tre kösë lue traon e cili. Ca ka hekö, nge ca ka hnyipixe hna xup hnei angetre Roma; hna e la 1,6 km la enanyi nyidro. Matre, ame la Iesu me itre sinatronge i nyidrë a tro nyipine la lue traon, hnene la lue timek hna drenge la kola nyi mej. Baratimaio la ëjene la ketre.

Ame hë la angeic a dreng ka hape, Iesu a cili thenge, hnei Baratimaio me sinatronge i angeic hna nyiqaane sue ka hape: “Ekölö hi ni Joxu, Nekö i Dravita, epi utipi nyio ju!” (Mataio 20:30) Matre itre xan a catrë nyidro, ngo kolo jë pe ka hape, sue catre jë nyidro. Nge ame hë la Iesu a drenge la kola isueny, nyidrëti a pane cile ju, me hnying koi itre sinatronge i nyidrë ka hape, drei la ka sue. Angatr a tro ju kowe la lue ka sipo me hape kowe la ketre: “Catre pi! Mejë jë, nyidrëti a hë eö.” (Mareko 10:49) Atraqatre la trenge madrine i angeic, matre angeic a una pi la iheetr ka qea i angeic, me mejë, me tro koi Iesu.

Iesu a hnyinge jë koi nyidro ka hape: “Nemene la nyine tro ni a kuca koi epon?” Öni nyidro: “Joxu, epi tro nyipëti a fe la lue meke i nyio.” (Mataio 20:32, 33) Atraqatre la utipine i Iesu, matre nyidrëti a ketre ju la lue meke i nyidro, me hape kowe la ketre: “Tro jë hë, ke mele hë hmunë hnene la lapaune i hmunë.” (Mareko 10:52) Goe hë lo lue timek ka sipo, ame hnei nyidroti hna nyiqaane atrunyi Akötresie. Nge enehila, nyidroti hë a xötrethenge Iesu.

Iesu a trongëne la nöje Ieriko, nge ala nyimu catre hë la itre ka xötrethenge nyidrë. Itre atr a pi atre ka hape, drei la ka aloine la timek. Nge angatr a ipepetrenyi me Iesu; matre goi tha öhnyi nyidrëti fe hnei itre xa atr. Zakaio hi la ketre. Angeic la tane la itre ka hle mani e Ieriko me itre nöje ezin. Nge pine laka, ka hopatr angeic, tha öhne kö angeice koilo. Matre angeic a nyinyape pi troa elë hune iwacua. Qa cili, öhne hnyawa ha Zakaio. Nge ame hë la Iesu a easenyine la sinöe, öni nyidrëti koi angeic: “Zakaio, canga uti pi, ke tro ni a lapa thei eö.” (Luka 19:5) Angeic a canga uti pi, me nyinyape troa hnëkëne la uma matre kapa hnyawa la atre ka tru celë.

Ame la kola öhne lai hnei itre atr, angatr a nyiqaane iqej. Ame koi angatr, tha loi kö la hna kuca hnei Iesu, ke nyidrëti a lapa thene la ketre atr hna jelengazon. Trenamo Zakaio ke hna huliwa qenatrekënö, me atrune la thupene mani hna athip.

Ame hë la Iesu a lö hnine la hnalapa i Zakaio, öni itre atr: “Nyidrëti a lapa thene la ketre atre ka kuca la ngazo.” Ngo öhne hi Iesu ka hape,  ijiji Zakaio hi troa ietra. Nge tha luzi kö, ke Zakaio a mejë jë me qaja koi nyidrë ka hape: “Hanawang Joxu! Eni a hamëne la sin ne la itre mong kowe la itre ka pë ewekë, nge ame lo itre hnenge hna atrekënö, eni a afoa lao të hmaca koi angatr.”—Luka 19:7, 8.

Aqane ujë lai ka amamane la nyipi ietra! Ijiji Zakaio hi troa atre la mani hna kuiën hnei angetre Iudra, ke hna fejane lai ngöne itus. Celë hi matre atreine hi angeic troa afoa lao të koi itre hnei angeic hna atrëkënö. Tru catre kö lai hune lo hna amekötin hnene la Trenge Wathebo i Akötresie. (Esodo 22:1; Levitiko 6:2-5) Ketre, hnei Zakaio hna sisinyi troa hamëne la sin ne la itre mo i angeic kowe la itre ka pë ewekë.

Atraqatre la madrine i Iesu kowe la aqane ietra i Zakaio, matre öni nyidrë: “Enehila, kola lö la iamele hnine la hnalapa celë, ke ketre nekö i Aberahama fe angeic. Nge kola traqa la Nekö i Atr troa thele la itre ka patr me amele angatr.”—Luka 19:9, 10.

Eue hi lo, hnei Iesu hna qaja lo itre ‘ka patr,’ ngöne la ceitun ne la nekönatr ka tro. (Luka 15:11-24) Ngo enehila, hetre ka melëne lai, ketre atre ka lolo ka patr, nge hna öhne hmaca. Ngazo pe, itretre hene ne hmi me itre sine xöle i angatr a qeje Iesu, ke nyidrëti a hnime la itre atr ka tui Zakaio. Ngo tha cile kö Iesu troa nyipiewekën, me thele la itre nekö i Aberahama ka patr.