Iesu a kötrene la Hnakootr Ka Tru me tro Eferaima, e kolopi nge koië ne Ierusalema. Nyidrëti a pane lapa ju e cili me itretre dreng, matre ananyine la itre ithupëjia. (Ioane 11:54) Ngo easenyi hë la Paseka 33 M.K., nge tro Iesu a bëeke hmaca e Ierusalema. Nyidrëti a kolopi thenge, me trongëne la nöje Samaria troa elë Galilaia. Tronge i nyidrë tixenuë qëmekene troa mec.

Ngöne la tronge i nyidrë, hnei Iesu hna ixelë me treene lao Lepera. Ame itre xa ijin, tro la meci cili a xeni la ngönetrei, uti hë la troa patr la itre xa hnep, tune la hene wanakoim, me hene waca, me hnangenyë. (Numera 12:10-12) Nge hnine la Trenge Wathebo i Akötresie, hna amekötin koi itre lepera troa mele cas, me suene ka hape, “Pui ngazo hë ni, pui ngazo hë ni!”—Levitiko 13:45, 46.

Qa ngöne lai, hnene la treene lao lepera hna cil ananyi Iesu. Ngo hnei angatre pe hna sue catre ka hape: “Iesu, Atre Ini fe, epi utipi huni ju!” Matre ame la Iesu a öhnyi angatr, öni nyidrë: “Tro jë kowe la itretre huuj.” (Luka 17:13, 14) Nyidrëti lai a metrötrëne la Trenge Wathebo i Akötresie, ka aijijëne la itretre huuj troa qaja ka hape, mele hë la lepera. Nge e qaja tune hë, tro hë lai atr a ce mel me itre xan.—Levitiko 13:9-17.

Ka lapaune la treene lao lepera kowe la mene i Iesu. Matre angatr a tro ju troa wange la itretre huuj, ngacama tha hna aloinyi angatr pala kö. Nge ngöne la gojeny, hna amanathithine la lapaune i angatr. Angatr a nyiqaane dreng me öhne laka, loi hmaca ha angatr!

Nge tha cile kö la ala naen, ngo tha hna tune kö hnene la ketre atre Samaria. Angeic a bëeke hmaca jë koi Iesu. Troa u? Atraqatr la trenge ole i angeic koi Iesu. Angeic a “sue me atrunyi Akötresie,” ke atre hi angeic ka hape, Akötresie la ka aloinyi angeic. (Luka 17:15) Matre ame hë la angeic a öhnyi Iesu, angeic a kei ju qëmeke i nyidrë, me olene koi nyidrë.

Nge öni Iesu kowe la itre ka cile xötreith ka hape: “Ala treene lo itre hna aloin? Nga ekaa pë hë lo ala naen? Hnauëne laka, tha bëeke kö lo ala naene troa atrunyi Akötresie, ngo nyëne hmekuje hi, nge atrene la ketre nöj pena?” Matre öni Iesu kowe la atre Samaria: “Cile jë, nge tro jë hë; ka mele hë hmunë hnene la lapaune i hmunë.”—Luka 17:17-19.

Ame la Iesu a aloine la treen lao lepera, nyidrëti lai a amamane ka hape, ce Iehova me nyidrë. Ngo ame kowe la ka bëeke hmaca, hna aloine la meci angeic, nge hna aijijë angeice fe troa kapa la mel ka pë pun. Ngo enehila, tha easë kö ngöne la ijine Akötresie a huliwa Iesu troa aloinyi atr. Ngo e tro sa lapaune koi Iesu, ijiji së fe troa kapa la mel, ene la mele ka pë pun. Hapeu, easë kö a amamane la ole së tune lo atre Samaria?