Iesu hi a ase qaja kowe la itre ka drei nyidrë e Perea ka hape, “ame lo itre ka tro pa, tro pena ha a tro pi, nge ame ange ka tro pi, tro pena ha a tro pa.” (Mataio 19:30) Nyidrëti a hamëne jë la ceitun ne la itre ka huliwa ngöne la itre vin. Öni nyidrë:

“Ceitune la Baselaia ne hnengödrai memine la ketre trene hnalapa, ka tro e sine hmakanyi troa thele atr troa huliwa ngöne la hnënge vine i nyidrë. Matre, ase jë hi angatr ce axeciëne troa kapa la ca drenari kowe la ca drai ne huliwa, nyidrëti a upi angatre ju kowe la hnënge vine i nyidrë. Nge ame hë ngöne la hnaakönine hawa, tro hmaca pi hi nyidrë, me traqa kowe la hna maketr a öhne la itre ka pë huliwan; matre öni nyidrëti jë hi koi angatr: ‘Tro jë fe nyipunie kowe la hnënge vin, nge tro kö ni a hamë nyipunie la thupene ka ijij.’ Ame hnei angatre hna tro kowe la hnënge vin. Nge hnei nyidrëti hmaca hna tun ngöne la hnaasikisine hawa, me hnanaenene hawa. Nge ame fe ngöne la hnalevinene hawa, öhne hmaca jë hi nyidrëti la itre xa atr, nge öni nyidrëti jë hi, ‘Pine nemene matre nyipunieti pala hi la ngöne la drai ka pexej ngo tha huliwa pe?’ Sa jë hi angatre ka hape: ‘Pë fe kö ka hane pi hë hun.’ Matre öni nyidrëti hmaca jë: ‘Nga tro jë fe nyipunie kowe la hnënge vin.’ ”—Mataio 20:1-7.

Maine jë, itre ka dreng a meku Iehova la Iesu a qeje “Baselaia ne hnengödrai,” me “trene hnalapa.” Eje hi, itre hna cinyihan a qeje Iehova ka hape, atrekë vin. Nge nöje Isaraela la hna nyihatren hnene la vin. (Salamo 80:8, 9; Isaia 5:3, 4) Nge ame la itre ka mel fene la isisinyikeu ne la Wathebo, angatr la itre ka huliwa ngöne la hnënge vin. Ngo tha Iesu kö a ithanatane la nöje Isaraela ekö, ngo nyidrëti pe a qeje angetre Iudra enehila.

Hnëqa ne la itre hene ne hmi me itre Faresaio troa huliwa o drai koi Akötresie. Ceitu i angatr me itre ka huliwa drai ka pexej ngöne la vin. Angatr a mekun troa kapa la ca drenari, thupen ne la ca drai ne huliwa.

Itre hene ne hmi a wangacone la itre xa angetre Iudra. Ame koi angatr, angetre Iudra la itre ka tha huliwa drai ka pexej ngöne la vin i Akötresie. Itre atre cili la hnei Iesu hna aceitunën me itre hna hën “ngöne la hnaakönine hawa” (9:00 e hmakany) maine, ngöne la hnaasikisin, me hnaanaenen, me hnalevinene hawa (5:00 e hnaipajö).

Hna mekune ka hape, ame la itre ka xötrethenge Iesu, itre “ka hnëjin angatr.” (Ioane 7:49) Itretre nyi ie la itre xan, nge ka eënyi la itre xan. Nge ngöne la pune la macatre 29 M.K., hnene “la maseta” hna upi Iesu troa hëne la itre atre cili, itre ka ipië, matre troa itretre drei Iesu me huliwa koi Akötresie. Angatre hi lo itre “ka tro pi,” itre hna hën ngöne hnalevinene hawa.

Iesu a nyipune la ceitun, me amamane la ewekë ka traqa la kola ase huliwa. Öni nyidrë: “E heji hë, hnene la maseta hna upe la tane huliwa me hape, ‘Hëne asë jë la itre ka huliwa nge nyithupei angatre jë, pa i itre ka traqa pi, nge thupene lai, itre ka traqa pa.’ Ame la kola traqa hnene la itre ka huliwa ngöne la hnalevinene hawa, hamë angatre pi hi la isa ca drenari. Matre hnene la itre ka huliwa pa hna mekune ka hape, troa hamën atrune koi angatr, ngo ame pe, hna hamë angatre fe la isa ca drenari. E cili, angatr a nyiqaane qaja angazone la maseta. Öni angatr: ‘Ame la itre atr celë,  hnei angatre hi hna huliwa koi ca hawa, ngo nyipëti a xome ceitu angatre la me eahun, itre hna cinajön me ka huliwa catre ngöne la drai ka pexej.’ Matre öni nyidrë kowe la ketre ka hape: ‘Sineeng, pëkö iwesitrë i nyiso. Hnei nyiso lo hna ce axeciëne la ca drenari kowe la ca drai ne huliwa, mekune hi eö lo? Xome jë la thupe i eö, nge tro jë hë, ke ajange troa ceitu la thupei epun. Hapeu, tha meköti kö la tro ni a kuca la mekunang memine la itre ewekëng? Nge hapeu, lue meke i eö a piin ke ka ham eni?’ Ketre tune mina fe, tro ha tro pa la hnapin, nge tro ha tro pi la hnapan.”—Mataio 20:8-16.

Maine jë, itretre dreng a sesëkötr pine la itre trengewekë i Iesu. Ke eje hi, tro itre hene ne hmi a “tro pi” tune kaa? Nge tro itretre drei Iesu a “tro pa” tune kaa?

Itre Faresaio a goeëne la itretre drei Iesu ceitu me itre “ka tro pi,” ngo angatre hi la ka troa pane kapa asë la thupe i angatr. Eje hi, jëne la meci Iesu, tro Akötresie a triji Ierusalema, me canga iëne la ketre nöj, “la Isaraela i Akötresie.” (Galatia 6:16; Mataio 23:38) Hnei Ioane Bapataiso hna ithanatane la nöje cili, lo angeic a qaja la bapataiso hnei uati hmitrötr. Ame lo itre ka “traqa pi,” angatre hi la hna troa pane bapataison hnei ua, nge ka troa pane anyipici Iesu “ngöne la nöjei götrane gaa nany ne la fen.” (Itre Huliwa 1:5, 8; Mataio 3:11) E trotrohnine hë itretre dreng la aqane saze la pengöi angatr elany, tro hë a akötrë angatr hnei itre hene ne hmi, itre ka “tro pi.”