Iesu me itretre dreng a tro qa Perea me tro kolojë. Angatre hë a sasaithe la Hneopegejë Ioridrano ezine Ieriko. Hetre itre xan ka ce tro me angatr troa feetëne la Paseka 33 M.K.

Iesu a tro pa, ke aja i nyidrë troa canga traqa e Ierusalema göne la Paseka. Ngo itretre dreng a xou. Eue hi lo, ngöne lo kola meci hnei Lazaro, hnei Iesu hna tro qa Perea a tro Iudra, e cili öni Toma koi itre xan ka hape: “Easë a tro, matre ce meci pi së me nyidrë.” (Ioane 11:16, 47-53) Haawe, trotrohnine hi së la kepine matre itretre dreng a xou troa tro Ierusalema.

Iesu a hnëkëne jë la itre aposetolo, me hën aconyi angatr me hape: “Easë hë la a tro Ierusalema, nge e cili, tro ha nue la Nekö i Atr kowe la itre tane i angetre huuj, me itretre cinyihan. Nge tro hë angatre lai a amekötine troa humuthi angeic. Nge troa nue angeic kowe la itre atre ne fen, nge tro angatr a hnyimasai angeic, me wameucë angeic, me jei faonyi angeic hune la sinöe ne iaxösisi, nge ame hë ngöne la hnaakönine drai, tro ha amele angeic hmaca.”—Mataio 20:18, 19.

Akönia qeje mec me mele hmaca hë Iesu koi itretre dreng. (Mataio 16:21; 17:22, 23) Ngo enehila, nyidrëti a qaja ka hape, troa jei faonyi nyidrë hune la sinöe. Angatr a drei nyidrë, ngo tha trotrohnine kö. Maine jë, angatr a mekune ka hape, tro hmaca a acile la baselaia ne Isaraela e celë fen, nge tro hë angatr me Keriso a kapa la lolo me iatruny.

Ce angatr me Salome, thine ne la lue aposetolo, Iakobo me Ioane. Hnei Iesu hna ati ëje i nyidro ka hape, “Nekö Ne La Hedreng,” ke lue ka polepol. (Mareko 3:17; Luka 9:54) Ekö  hë nyidro mekune troa cilëne la ketre hnëqa ka tru ngöne la Baselaia i Keriso. Nge atre hi Salome, matre eahlo a tro ju koi Iesu me sa iwatingöneca, me iele sai nyidro. Öni Iesu jë hi: “Nemene la aja i eapo?” Sa jë hi Salome ka hape: “Epi tro nyipëti a amekötine matre tro la lue nekönge celë, a lapa ezi nyipë ngöne la Baselaia i nyipë, ketre ngöne la götrane maca, nge ketre ngöne la götrane mi.”—Mataio 20:20, 21.

Iakobo hi me Ioane la ka upe la thine i nyidro. Matre, ngacama Iesu lo a ithanatane la aqane troa ahmahmanyi nyidrë, ngo öni nyidrë: “Thatre kö nyipunie la hnei nyipunieti hna sipon. Nge hapeu, ijiji nyipunieti fe kö troa hane ij ngöne la ver hnenge hna troa ijin?” Öni nyidroti jë hi: “Ijiji nyio fe.” (Mataio 20:22) Ngo eje hi laka, tha nyipi trotrohnine kö nyidro la alien la itre trengewekë Iesu.

Ame pe, Iesu a qaja jë koi nyidro ka hape: “Tro fe epon a hane ijine la vereng, ngo ame pë hë göi atre lapa ngöne götrane macang me ming, tre lue göhnë lai hna hnëkëne hnei Kakati thatraqane la itre hnei nyidrëti hna iën.”—Mataio 20:23.

Matre ame hë la kola drenge lai hnei itre xa aposetolo, elëhni jë hi angatr. Nge ma nyidroti fe lo ka pi hun, lo angatr a isi pi ka tru. (Luka 9:46-48) Matre, mama hë hnene la sipo celë laka, luzi hë lo eamo i Iesu göi aqane troa ipië. Eje hi, aja i angatre pala kö troa cilëne la ketre göhnë ka tru.

Enehila, tro hë Iesu a ewekë koi angatr, ke kola ha lapa fë trenge hni hnei itre xan. Nyidrëti a hëne jë la ala Truelof me ithanata amenyikeny koi angatr. Öni nyidrë: “Atre hnyawa hi nyipunie laka, itre joxu ne la itre nöj a musinëne la itre atren, nge itre ka draië ne la fen a qene joxu. Ngo tha tro pi kö a hane tune thei nyipunie; ke ame la atre ajane troa draië, tre, tro angeic a hlue i nyipunie, nge ame la atre ajane troa pa thei nyipunie, tro angeic a nyihlue i nyipunie asë.”—Mareko 10:42-44.

Thupene lai, Iesu a qaja jë la tulu koi angatr—tulu i nyidrë. Öni nyidrë: “Tune mina fe kowe la Nekö i atr, tha hnei angeice kö hna traqa troa hetre hlu, ngo troa nyihlu, me hamëne la mele i angeic nyine nyi thupene mel kowe la ka ala nyim.” (Mataio 20:28) Ngöne la köni macatre ka ase hë, hnei Iesu hna huliwa thatraqai itre xan. Nge tro pala kö nyidrëti a kuca lai kowe la nöjei atr asë! Haawe, loi e tro fe la itretre dreng a pi huliwa, ngo tha tro kö a qene joxu. Nge loi e tro fe angatr a ipië, ngo tha tro kö a pi mama.