Anyimua amamane Iesu laka, nyipiewekë troa ipië. (Luka 14:8-11) Hnei nyidrëti pala hi hna thele la itre atr ka ipië nge ka pi nyihlue i Akötresie. Nge maine jë, ala nyimu thei angatr la itre ka hlemu ngazo.

Öhne hi la itre Faresaio me itretre Cinyihan laka, ala nyimu la itre atr hna wangacon ka epe koi Iesu me kowe la maca i nyidrë. Matre itre Faresaio a nyiqane iqej me hape: “Kola kapa madrine la itretre kuca la ngazo hnene la atr celë, me ce xeni fe me angatr.” (Luka 15:2) Itre Faresaio me itretre cinyihan a mekune ka hape, draië kö angatr hune la itre atre cili, itre hna aceitunën me dro fene la lue ca i angatr. Nge hnei angatr fe hna ati ëjen la itre hna wangacone ka hape, ‛am ha·’aʹrets, kola hape, “atrene dro.” Kola amamane la aqane methinëne angatr la itre atre cili.

Ngo ame Iesu, nyidrëti a metrötrë angatr, me hnimi angatr, me nyipi angatr. Matre ala nyimu la itre ka hlemu ngazo ka pi drei nyidrë. Eje hi, Iesu a xatua angatr, ngazo pe, itre xan a xöjetriji nyidrë. Tro nyidrë a ujë tune kaa?

Nyidrëti a hamëne jë la ketre ceitun ka iakeukawa, tune lo hnei nyidrëti hna hamën e Kaperenauma. (Mataio 18:12-14) Ngöne la ceitune cili, itre Faresaio la itre mamoe ka lolo nge ka mele hnine la hnë axö mamoe i Akötresie. Nge ame pena la itre atre ka ngazo, angatre la itre mamoe ka patr. Öni Iesu:

“Pane mekune jë la ketre atr ka 100 lao mamoe. Maine troa patre la cas, hapeu, tha tro kö angeice lai a pane nue lai ala 99 ngöne la hnapapa, me thel agöne la ka patr uti hë la troa öhne hmaca? Nge e öhne hë, angeic a ami nyëne ju hune la ihnaiape i angeic me madrin. Ame hë la angeic a bëeke koi hnalapa, angeic a hëne jë la itre sinee i angeic, me itre ka lapa easenyi angeic, me hape koi angatr, ‘Ce madrine jë me eni, ke öhne hmaca ha ni lo mamoenge ka patr.’ ”—Luka 15:4-6.

Nemene la ini? Öni nyidrë: “Eni a qaja hnyawa koi nyipunie, ketre tune mina fe, atraqatre kö la trenge madrin e hnengödrai kowe la ala casi ka ietrane la ngazo i angeic, hune lo ala 99 ka meköt nge ka pëkö nyine troa ietran.”—Luka 15:7.

Maine jë, kola sesëkötr hnei itre Faresaio la Iesu a qeje ietra. Angatr a mekune ka hape, itre ka meköt angatr, matre tro angatr a ietra fë nemen? Itre macatre qëmeken, hnei itre xan hna xöjetriji Iesu, pine nyidrë ce xen me itretre hle  mani, me itre ka kuca la ngazo. Matre öni nyidrëti lo: “Nge celë hi matre eni a hëne la itre ka ngazo, ngo tha itre ka meköti kö.” (Mareko 2:15-17) Pine laka, itre ka nyi ka meköt la itre Faresaio, tha öhne kö angatr ka hape, nyipiewekë troa ietra, nge pëkö madrin e hnengödrai. Ngo tha hna tune kö koi itre ka ietra.

Thupene lai, Iesu a hamëne jë la ketre ceitun göi troa amamane laka, hetre madrin e hnengödrai e ietra hnei ketre. Öni nyidrë: “Pane mekune jë la ketre föe ka treene lao pies sileva. Maine tro angeic a apatrene la ketre, hapeu, tha tro kö angeice lai a pane amelene la laame cil, me nyidrawane asë la uma i angeic, me thel agön uti hë la troa öhne hmaca?” Nge e öhne hë, angeice a hëne jë la itre sinee i angeic, me itre ka lapa easenyi angeic, me hape, ‘Ce madrine jë me eni, ke öhne hmaca ha ni lo manienge ka patr.’ ”—Luka 15:8, 9.

Casi hi la ini hnei Iesu hna hamën jëne la lue ceitun. Öni nyidrë: “Ketre tune mina fe, eni a qaja hnyawa koi nyipunie laka, hetre madrin thene la itre angela i Akötresie e hna ietra hnene la ala casi ka kuca la ngazo.”—Luka 15:10.

Öhne hi eö, itre angela a nyipiewekën la itre ka ietra! Nga pane mekune jë la atre ka ietra nge ka sine la Baselaia e hnengödrai, draië kö angeic hui itre angela! (1 Korinito 6:2, 3) Eje hi, goi tha zalu fe la itre angela. Matre tune kaa fe së e kola ietra hnei ketre?