Ma Iesu pala kö e Samaria maine e Galilaia. Enehila, itre Faresaio a hnyingëne la ijine traqa la Baselaia. Mekuna i angatr ka hape, tro ha ketrepengöne la drai cili. Ngo öni Iesu: “Tro la Baselaia i Akötresie a traqa, ngo tha tro kö la itre atr a wangatrehmekune ej. Nge tha tro kö la itre atr a qaja ka hape: ‘Wange ju e celë!’ maine: ‘E cili!’ Ke hanawang! Nyipi nyipunieti hi la Baselaia i Akötresie.”—Luka 17:20, 21.

Ma tro la itre xan a mekun ka hape, e kuhu hni ne la itre hlue i Akötresie la Baselaia. Ngo tha meköti kö, ke thatreine kö tro la Baselaia cili a ej e kuhu hni ne la itre Faresaio, itre hnei Iesu hna ithanata kow. Ngo ej e nyipi angatr, ke Iesu hi e nyipi angatr, lo Joxu ne la Baselaia i Akötresie.—Mataio 21:5.

Thupene la kola tro hnei itre Faresaio, Iesu a hamë itre xa ithuemacany kowe la itretre drei nyidrë göne la ijine traqa la Baselaia. Nyidrëti a pane hmekë angatre jë göne la ijine traqa nyidrë. Öni Iesu: “Tro ha traqa la ijine tro nyipunieti a ajane catrëne tro la Nekö i atr a ce me nyipunie, ngo tha tro kö nyipunieti a hane öhne lai.” (Luka 17:22) Iesu a amamane laka, tro la Nekö i atr a mus elanyi ngöne la Baselaia. Ngo qëmekene la drai cili, tro la itre xa atre dreng a lapa treqen ej, ngo tro pala kö angatr a itreqe uti hë la drai hna sa hnei Akötresie, drai ne traqa la Nekö i atr.

Öni Iesu hmaca: “Tro la itre atr a qaja koi nyipunie ka hape, ‘Goeëne ju e celë!’ maine, ‘E cili!’ The tro kö, nge the xötrethenge angatre kö! Ke tro la drai ne mama la Nekö i atr a tune la kola samek qaa koië, me hudrum e kuë.” (Luka 17:23, 24) Nemene la ka troa xatua itretre drei Iesu, matre tha tro kö a amenu angatr hnei itre mesia thoi? Öni Iesu ka hape, tro ha mama cil la ijine traqa la nyipi Mesia, kösë samek hna öhne qa gaa nany. Tro ha mama cile la itre hatren kowe la nöjei atre ka hmek.

Thupene lai, Iesu a aceitunëne la ijine traqa i nyidrë, memine lo itre ewekë ka traqa ekö, matre amamane la aqane ujë ne la itre atr. Öni nyidrë: “Tune la itre ewekë ka traqa ngöne lo hneijine i Noa, tro fe a hane tune ngöne la itre drai ne la Nekö i atr. . . Tro fe lai a tune lo hneijine i Lota: angatr a xen, nge angatr a ij, nge angatr a itö, nge angatr a salemë ewekë, nge angatr a tra feja, nge angatr a xupi uma. Ngo ame ngöne la drai ne Lota a tro qaa Sodroma, mala pi hi la eë me itre wene etë ka mel qaa hnengödrai kösë mani, me apatrenyi angatr asë. Haawe, tro fe a hane tun ngöne la drai ne mama la Nekö i atr.”—Luka 17:26-30.

Tha Iesu kö a qaja ka hape, hna apatrene la itre atr ne la hneijine i Noa me Lota pine angatre xen, me ij, me itö, me salem, me tra feja me xupi uma. Hnei Noa fe me Lota hna hane kuca  la itre huliwa cili. Ngo ame itre xan, tha nyipiewekëne kö angatr la aja i Akötresie, memine la hneijin i angatr. Haawe, Iesu hi lai a hmekë itretre dreng troa nyipiewekëne me isine troa eatrën la aja i Akötresie. Ketre, Iesu fe a amamane koi angatr la aqane troa mel, e traqa jë Akötresie lepe la fen.

Nyipiewekë tro la itretre dreng a hmek, wanga luzi pi angatr hnei itre ewekë ne fen, “itre ewekë hutrö.” Öni Iesu: “Ngöne la drai cili, tha tro kö la atr ka cil hune uma a uti me lö troa xome la itre mo i angeic. Nge tune mina fe, the tro kö la atr ngöne la hlapa a bëeke kowe la itre ewekë hutrö i angeic. Mekune kö lo föi Lota.” (Luka 17:31, 32) Eje hi, sootre ka catre hë angeic.

Iesu pala kö a qaja la aqane ujë ne la itre atr, ngöne la ijine troa acili Joxu nyidrë. Öni nyidrë koi itretre dreng: “Ngöne la heji cili, hetrenyi la lue atr ka troa meköl hune la ca ili; matre troa xomi ketre, me nue pë hë la ketre.” (Luka 17:34) Troa amele itre xan me nue la itre xan, kola hape, luzi hë angatr.

Ame hna hnying hnei itretre dreng ka hape: “Ekaa la hnë troa eatrëne la itre ewekë cili Joxu?” Öni Iesu: “Ame la gaa hetre ngönetrei ka mec, tre celë fe hi hna itronyi hnei itre aeto.” (Luka 17:37) Elany, troa hetre atr ka atreine öhne qa gaa nanyi tune lae aeto. Tro la itretre dreng cili a tro kowe la nyipi Keriso, lo Nekö i atr. Nge tro Iesu a ini angatr la itre ini ne mel.