Iesu pala kö a trongëne la nöje Perea a tro Ierusalema. Ame hna fetra la ketre trahmany me nyinyape koi Iesu, me kei kowe la lue ca i nyidrë. Angeic la ketre “tane,” ma tane la sunago, maine ketre atrene la Hnakootr Ka Tru. Öni angeice jë hi: “Atre Ini fe ka nyipi lolo, nemene la nyine tro ni a kuca matre hetrenyi ni la mele ka pë pun?”—Luka 8:41; 18:18; 24:20.

Sa jë hi Iesu ka hape: “Hnauëne la eö a hë ni atre ka nyipi lolo? Casi hi la ka lolo, a Akötresie hmekuje hi.” Angeic a hë Iesu “atre ka nyipi lolo,” ke ketre aqane hë atr lai, tune lo aqane hëne la itre xan ka hape, Rabi. Nge maine nyipici laka, lolo la aqane hamë ini i Iesu, ngo aja i nyidrë tro la trahmany a trotrohnine laka, Akötresieti casi hi la atre ka “Nyipi Lolo.”

Iesu a xatua angeice jë me hape: “Maine eö a ajane troa mel, catre pi eö trongëne la itre wathebo.” Matre önine la nekö trahmanyi ka hape: “Nemene wathebo?” Iesu a qaja jë la faifi lao Trenge Wathebo göi ihumuth, me nyixetë, me atrekënö, me silitrengathoi, me metrötrë keme me thin. Thupene lai, nyidrëti a nyixane jë hnene la ketre wathebo ka tru, öni Iesu: “Qa i eö troa hnime la atre lapa easenyi eö tui eö hi.”—Mataio 19:17-19.

Sa jë hi la nekö trahmanyi ka hape: “Ka trongëne hë ni la nöjei ewekë cili, matre nemene pe kö la nyine tro ni a kuca?” (Mataio 19:20) Ma angeice jë a mekune ka hape, tro pala kö angeic a kuca la ketre huliwa ka tru, matre kapa la mele ka pun. Nge öhne hi Iesu la trenge aja i angeic, matre Iesu a ‘utipi angeice ju.’ (Mareko 10:21) Ngazo pe, hetre ka ajolë angeic.

Hnime catr angeic la itre ewekë i angeic, matre öni Iesu: “Ca ewekë pe hi matre pexeje pi eö, tro jë, nge salemëne pi la itre ewekë i eö, nge hamëne pi kowe la itre ka pë ewekë. Nge tro hë eö lai a hetre mo e hnengödrai, nge jë fe, xötrethenge ni jë.” Tro la nekö trahmany a thawa la mani i angeic koi itre ka pë ewekë, itre ka thatreine të. Nge tro angeic a xötrethenge Iesu. Ngazo pe, hnimi catre kö angeic la itre götrane  i angeic, me “itre ewekë i”angeic, matre luzi pë hë lo nyipi trengamo. (Mareko 10:21, 22) Iesu a hnimi angeic ke ame la angeic a tro, hleuhleu catr angeic. Matre öni nyidrëti jë hi: “Ka jole catre kowe la trenamo troa lö kowe la Baselaia i Akötresie!”—Luka 18:24.

Itretre dreng a sesëkötre la itre trengewekë i Iesu, nge öni nyidrëti hmaca: “Hmaloi kö kowe la kamela troa lö qa ngöne la gaa xulu ne nilan, hune la trenamo troa lö kowe la Baselaia i Akötresie.” Ame hnei itretre dreng hna hnyinge ka hape: “Nga drei hö la hna troa amelen?” Ma itretre dreng a mekune ka hape, thatreine kö troa amelene la ketre atr. Iesu a goeë angatre jë me hape: “Hetre itre ewekë hna thatreine kuca hnei atr, ngo ame Akötresie, pëkö hnei nyidrëti hna thatrein.”—Luka 18:25-27.

Peteru a qaja jë ka hape, tha ceitune kö la aqane ujë i angatr memine lo nekö trahmany. Öni angeic: “Hanawang! Ase hë huni nu asë troa xötrethenge nyipë, matre tro ju hë huni a kepe nemen?” Iesu a qaja la manathith e tro angatr a axecië mekune hnyawa, öni nyidrë: “Ame ngöne la ijine troa ahnyipixene asë, lo ijine tro la Nekö i Atr a lapa hune la therone ka lolo i angeic, tro fe nyipunie, itretre xötrethenge ni a hane lapane la 12 lao theron, me amekötine la 12 lao tribu ne Isaraela.”—Mataio 19:27, 28.

Iesu hi lai a qaja la ijin elany troa ahnyipixene hmaca la nöjei ewekë, ene la troa aparadraisone la fen. Nge tro hë Peteru me itre xa atre dreng a kapa la thupen. Tro angatr a ce musi me Iesu kowe la paradraiso. Manathithi ka tru catre kö hune lo itre ewekë hna nu!

Ngo hna amanathithi angatr fe enehila. Hnene la itretre dreng hna hane kapa la itre manathithi cili. Öni Iesu: “Pëkö atre nue uma, me ifëkuku, me trejin, me kem, me thin, me ha nekönatr pine la Baselaia i Akötresie ka tha tro kö a hane kapa atrune hmaca kö ngöne la hneijine celë, nge ngöne la fene ka troa traqa, la mele ka pë pun.”—Luka 18:29, 30.

Eje hi, e tro la itretre dreng a tro kowe la ketre nöj, tro pala hi angatr a öhne e cili la itre trejin me angatr ka ihnim. Itre nyipi sinee ka tru kö hune la sipu fami. Ngazo pe, triane pë hë nekö trahmanyi la manathithi cili, nge goi triane fe angeic la manathithi ka tru troa hane musi ngöne la Baselaia i Akötresie.

Öni Iesu hmaca: “Ame lo itre ka tro pa, tro pena ha a tro pi, nge ame ange ka tro pi, tro pena ha a tro pa.” (Mataio 19:30) Nemene la alien?

Pine laka, ketre tane i angetre Iudra lo nekö trahmany, ceitu i angeic me itre “ka tro pa.” Nge ka trongëne hë angeic la itre wathebo i Akötresie, matre maine ju, tro fe angeic a ketre atre drei Iesu, me ce huliwa me itretre dreng. Ngazo pe, hnei angeice hna iëne troa amë panëne la itre mo. Tha ceitu i angeice kö me itre xan, itre ka nyipiewekëne la itre ini Iesu. Ame koi angatr, trenge nyipici nge jëne iamele hi lai. Angatr la itre hna qaja ka hape, “ka traqa pi,” nge enehila, angatr a “tro pa.” Eje hi, ijiji angatr troa lapan elany la itre theron e hnengödrai, me ce musi me Iesu kowe la paradraiso e celë fen.