Öhne hi Iairo lo Iesu a aloine la föe ka neni hni. Matre angeic jë a mekun ka hape, ijiji Iesu fe troa hane aloine la nekö i angeic, ngacama ame koi angeic, ‘meci hë la nekö i angeic.’ (Mataio 9:18) Ngo hapeu, tro kö a amele nyën?

Iesu pala kö a ithanata memine la föe hnei nyidrë hna hnyipi aloin, nge traqa pi hi la hnënge trahmany qa hnine la hnalapa i Iairo troa thuemacanyi angeic ka hape: “Meci hë la nekö i nyipë jajiny! Matre nyine ue hmaca troa ajolëne la Atre Ini?”—Mareko 5:35.

Tha fene maca ka ngazo kö la! Iairo la ketre trahmanyi hna metrötrën ngöne la traon, ngo enehila, hleuhleu catr angeic. Casi hi la nekö i angeic, ngo meci hë nyën. Drenge hi Iesu la kola traqa fë maca, matre nyidrëti a thuecatre i Iairo jë me hape: “The xoue kö, ngo lapaune ju.”—Mareko 5:36.

Iesu a bëeke sai Iairo jë kowe la hnalapa i angeic, nge traqa ju hi angatr a öhne la kola nyi meje hnine la uma. Itre ka tro qa ngöne uma a treij, me awe, me lepelepe imaano hnei hleuhleu. Matre Iesu a lö jë me asesëkötrëne la itre atr hnene la itre trengewekë i nyidrë, öni nyidrë: “Tha meci kö la nekönatr, nyëne hi la a meköl.” (Mareko 5:39) Itre atr a hnyima sai Iesu jë, ke atre hi angatr ka hape, meci hë la nekönatr. Ngo jëne la men hna hamë nyidrë hnei Akötresie, Iesu a troa amamane ka hape, ijije hi troa ahlëne la ka mec, tune la aqane ahlëne la ka hmulizië.

Iesu a sipone jë kowe la itre atr troa lö qa hnine la uma, ngo tro pe a lapa hnei Peteru, Iakobo, me Ioane, me keme me thin ne la nekö jajiny. Iesu a xome jë la ala faifi kowe la hnahag. Nyidrëti a ea pi la ime ne la nekö jajiny me hape: “ ‘Tal′i·tha cu′mi,” kola hape, “Nekö jajiny, mejë jë!” ’ ” (Mareko 5:41) Ame hnei nyën hna mejë me nyiqaane tro. Pane mekune jë la trenge madrin i keme me thin! Nge nyine anyipicine laka, mele hë la nekö jajiny, Iesu a iupe jë troa thue a i nyën.

Nge tune pala hi lo, hnei Iesu hna wathebo keme me thin troa iqajakeun. Ngo pine laka, tru catre la madrinene la keme me thin me itre xa atr, ase hë haöthe “la nöj asë” hnene la maca cili. (Mataio 9:26) Ngo tune kaa fe eö? Tro kö eö a atreine lapa thaup e hna amelene hmaca la atr hnei eö hna hnim? Celë hi hnaaluene mele hmaca hnei Iesu hna kuca.