Kola ha drei mejen hnene la angetre Iudra ka mel e kolopi ne la Hnagejë ne Galilaia ka hape, bëeke hë Iesu qa Dekapoli. Ketre, ala nyimu hë la ka drei mejen ka hape, ngöne lo wene ka traqa eu hi lo, hnei Iesu hna lep ahumune la enyi me hnagejë, me aloine la atr hna löth hnei dremoni. Matre “hnene la ka ala nyimu” hna traqa itrony ezine hnagejë troa kepe Iesu, ma angatr e Kaperenauma. (Mareko 5:21) Atraqatre la madrin me mejiune i angatr la angatr a öhnyi Iesu e uti qa hune he.

Iairo fe la ketre ka lapa treqe Iesu. Angeic la tane la sunago, ma kolo sunago e Kaperenauma. Matre angeic a kei ju kowe la lue ca Iesu, me iele nyidrë ka hape: “Wezipo catre hë la nekönge jajiny. Trohemi troa pane atë la lue ime i nyipë hui nyën, matre egöcatre hmaca jë nyën me mel.” (Mareko 5:23) Casi hi la nekö hnimina i angeic, nge ka 12 hi lao macatre, matre hapeu, tro kö Iesu a kapa la sipo i Iairo?—Luka 8:42.

Iesu pala kö a tro kowe la hnalapa i Iairo, nge hna traqa la ketre ewekë. Ala nyimu thene la itre ka xötrethenge Iesu ka lapa treqene la ketre iamamanyikeu. Ngo nyipine la ka ala nyim, hetre ketre föe ka lapa fë sine mec.

Atre Iudra la föe cili, nge traqa ha koi 12 lao macatre ne neni la hni eahlo. Meci hë eahlo hna wai droketre, me aluzi mani troa itö drösinöe. Ngazo pe, tha ie kö, ngo “kolo jë pe ka hape, jole catre jë.”—Mareko 5:26.

Tha jole kö troa trotrohnine laka, kucakuca catr eahlo hnene la meci cili, nge ketre meci lai ka jol, nge hna sisin. Eje hi, tha hna majemine kö ithanatane la meci cili qëmekene la ka ala nyim. Ketre, fene la trenge Wathebo i Mose, ame la föe ka neni hni, tre ka pui ngazo. Nge ame la ka ketri eahlo, maine ketre la iheetre i eahlo ka si madra, tro angeic a si, me pui ngazo uti hë hej.—Levitiko 15:25-27.

Drenge hë la föe cili “la hna qaja göi Iesu,” nge eahlo ha thele nyidrë. Ngo pine laka ka pui ngazo eahlo, eahlo a lö juetrë ju nyipine la ka ala nyim, me mekune ka hape: “Maine tro hi ni a nango ketr la iheetre i nyidrë, tro hë ni lai a mel.” Matre ame ju hi la eahlo a ketr la pune iheetre i Iesu, drenge ju hi eahlo laka, tha neni hë la hni eahlo! Eje hi, “mele hë eahlo qa ngöne lai meci ka akötrëne la mele i eahlo.”—Mareko 5:27-29.

Öni Iesu jë hi: “Drei la ka ketr la pune iheetreng?” Ame koi eö, tune kaa jë la föe la eahlo a drei Iesu? Sa jë hi Peteru ka hape: “Öhne hi nyipëti la ka ala nyim, angatr a ipepetrenyi me nyipë.” Matre hnauëne la Iesu a hnyinge tun? Öni nyidrë: “Hna ketri ni hnene la ketre atr, ke drenge hi ni la kola tro qaathenge la men.” (Luka 8:45, 46) Eje hi, hna huliwan fe la trengecatre i Iesu troa kuci iamamanyikeu.

Trotrohnine ju hi eahlo ka hape, tha sihngödri kö la hnei eahlo hna kuca, matre eahlo a kei ju kowe la lue ca i Iesu, me xou me hmengöhmengön. Matre qëmekene la ka ala nyim, eahlo a qaja ju la meci eahlo, me aqane aloinyi eahlo. Iesu a axapone jë la hni eahlo, me hape: “Neköng, mele hë hmunë hnene la lapaune i hmunë. Tro jë, nge the seseu kö, mele hnyawa ha hmunë qa ngöne la meci ka akötrë hmunë.”—Mareko 5:34.

Eje hi, ame la Atr hnei Akötresie hna iën troa mus kowe la fen, tre atr ka iakeukawa me itrotrohni. Ngo hetre mene i nyidrëti fe troa xatuane la itre atr!