Thupene la Iesu a ase aloine la hlue ne la tane isi, nyidrëti a tro pi qa Kaperenauma a tro Naina, a traqa koi 32 km e kolopi nge kuë. Nge ce nyidrë me itretre dreng memine la ka ala nyim. Nge hejiheji hë la angatr a traqa e Naina. E cili, ala nyimu la angetre Iudra hnei angatr hna ixelë memin, ke angatr a tro troa kele wezipo. Nge itre atr a xututhe trongëne la ketre nekö trahmany troa kelemi nyën.

Ngöne la trongene kele wezipo, hleuhleu catr la thine ne la nekö trahmany. Sine föe eahlo, nge casi hi la nekö i eahlo, ngo meci hë nyën. Ame lo kola mec hnene la föi eahlo, ce eahlo pala kö memine la nekö hnimina i eahlo. Matre pane mekune jë la ihnimi nyidro lue trenekön, ke nyëne pe hi la ka thupë eahlo. Ngo enehila, ketre meci hë nyën. Matre drei pë hë la ka troa thupë eahlo?

Ame ju hi la Iesu a öhne la aqane hleuhleu ne la thin, hace ju hi la hni nyidrë. Nyidrëti a ithanata amenyikene ju koi eahlo me hape: “The treije kö.” Ngo hnei nyidrëti fe hna easenyine me ketr la ili ne wezipo. (Luka 7:13, 14) Matre itre atr a pane acilëne ju la trongene kele wezipo. Nge kola isa hnying hnene la ka ala nyimu ka hape, ‘Nemene la aliene la itre trengewekë i nyidrë, nge tro nyidrëti a u?’

Nemene jë la hna mekun hnei itre sinatronge i nyidrë, itre ka öhnyi nyidrë e kuca la itre huliwa nyine hain, me aloine la nöjei pengöne mec? Kola mekune laka, pë pala kö mele hmaca hnei angatr hna öhn. Nge ngacama ase hë amelene hmaca la itre xan ekö, ngo hapeu, ijiji Iesu fe kö troa amelene hmaca la itre ka mec? (1 Ite Joxu 17:17-23; 2 Ite Joxu 4:32-37) Iesu a qaja ju ka hape: “Nekö trahmanyi fe, eni a qaja koi hmunë, mejë jë!” (Luka 7:14) Ame hnei nyën hna mejë jë, nge kola ha lapa me ithanata. Iesu a tro sai nyëne jë koi thin, nge eahlo a sesëkötr me madrin. Haawe, casi hmaca ha nyidro.

Ame hnei itre atr hna atrunyi Iehova, Atre Hamë Mel, me hape: “Mele hmaca ha la ketre perofeta nyipi së.” Nge hnei itre xan hna trotrohnine  la aliene la itre huliwa nyine haine i nyidrë, öni angatr: “Akötresieti a wangatrune la nöje i nyidrë.” (Luka 7:16) Ame hna canga drei mejene lai ngöne la itre nöje xötreith, uti fe hë e Nazareta, zi i Iesu a traqa koi 10 km la enanyin. Nge goi drenge fe ngöne la itre götrane kolojë ne Iudra.

Ngöne la ijine cili, Ioane Bapataiso pala kö hnine kalabus, nge aja i angeic troa atre la itre huliwa hna kuca hnei Iesu. Matre hnene la itretre drei angeic hna qejepengöne koi angeice la itre iamamanyikeu i Iesu. Ngo tro lai a xatua angeice tune kaa?