Lue macatre hë ne catre cainöje Iesu. Matre hapeu, ijine hë troa pane mano me huliwa hmidra? Pëkö, Iesu pe a catr huliwa, me “tro kowe la itre traon me itre hunahmi trootro, me hamë ini ngöne la itre sunago, me cainöjëne la maca ka loi ne la Baselaia, me aloine la nöjei pengöne meci asë.” (Mataio 9:35) Nge öhne hi nyidrë ka hape, nyipiewekë troa akökötrene hmaca la huliwa ne cainöj. Ngo troa tune kaa?

Ame la Iesu a tro ngöne la itre traone trootro, öhne hi nyidrë ka hape, itre atr a ajane la nyipici ka troa xatua angatr, me akeukawanyi angatr. Ceitu i angatr me itre mamoe ka pë atre thupën, nge hna qanangazon me nuaxöj. Matre atraqatre la utipine i nyidrë. Öni nyidrëti jë hi kowe la itretre dreng: “Eje hi, tru catre la nyine menuën, ngo xalaithe hi la itretre menu. Matre, sipone jë kowe la Maseta troa pane upe la itre xa atr kowe la huliwa cili.”—Mataio 9:37, 38.

Iesu a nyiqaane enije jë! Nyidrëti a hëne jë la ala 12, me isa thewe angatr ala lu, me hamë ithuemacanyi koi angatr. Öni nyidrë: “The tro kö kowe la itre xa nöj, nge the lö kö kowe la itre traon ne la angetre Samaria, ngo tro jë, nge catre jë nyipunie thele la itre mamoe ne Isaraela ka paatr. Nge ame ngöne la nöjei jë i nyipunie, cainöjëne jë ka hape: ‘Calemi hë la Baselaia ne hnengödrai.’ ”—Mataio 10:5-7.

Ame la Baselaia hnei angatr hna troa cainöjën, tre Baselaia hnei Iesu hna thithi fë ngöne lo tulu ne thith. Nge ame la kola hape, ‘Calemi  hë la Baselaia ne hnengödrai,’ tre nyine amamane ka hape, celë hë la joxu hna iën hnei Akötresie, ene Iesu Keriso. Nemene la ka anyipicine ka hape, itretre drei Iesu la itre qeneqaja ne la Baselaia? Hnei Iesu hna aijijë angatr troa aloine gufane la itre wezipo, me amelene la itre ka mec. Haawe, e ka pë thupen, tro itre aposetolo a mel me itö tune kaa?

Hnei Iesu hna wathebo itretre dreng troa hnëkëne la tronge i angatr. Tha tro kö angatr a xometrongë gool, me sileva, me kopa nyine pasesi angatr. Ketre, tha tro kö angatr a hnëkë kemej, maine iheetr, maine ibutr. Pine nemen? Öni Iesu: “Tro kö la atre huliwa a kapa la thupe i angeic.” (Mataio 10:10) Eje hi, tro la itre atr ka kapa la nyipici a hamëne koi angatr la ka nyipiewekë. Matre öni Iesu: “Ame hë la nyipunie a lö kowe la ketre uma, pane lapa ju e cili, uti hë la tro nyipunieti a tro qa lai.”—Mareko 6:10.

Hnei Iesu fe hna ini angatr la aqane troa tro fë la maca kowe la itre atrene la itre hnalapa, öni nyidrë: “Ame la nyipunie a lö kowe la ketre hnalapa, pane ibozu jë memine la itre atren. Maine angatr a kepe nyipunie, thei angatre hë la manathith. Ngo e tha kepe nyipunieti kö, thei nyipunie hmaca kö la manathith. Nge ame la nyipunieti a tro qa ngöne la ketre hnalapa maine traon, nge tha kepe nyipunie maine drei nyipunie, haawe, jumejume pi la dro ne la lue hnatrapaca i nyipunie.”—Mataio 10:12-14.

Eje hi, tro kö a hetre traon me hunahmi ka troa xelene la maca. Nemene la pune koi angatr? Iesu a amamane ka hape, tro ha catre la aqane ameköti angatr. Öni nyidrë: “Eni hi a qaja hnyawa koi nyipunie laka, loi ju kö lo ewekë ka traqa koi Sodroma me Gomora, hune la ka troa traqa kowe la traone cili ngöne la Drai Ne Iameköti.”—Mataio 10:15.