Iesu petre hi a ase qaja koi itre aposetolo la aqane troa cainöj, me upi angatr isa ala lu. Nyidrëti fe a hmekë angatr göi itre ka icilekeu, öni nyidrë: “Hanawang! Eni a upi nyipunie ceitu me itre mamoe nyipine la itre luko . . . Hmeke ju! Ke tro la itre atr a uti sai nyipunie kowe la hnakootr, me thaucë nyipunie ngöne la itre sunago. Nge tro ha xomi nyipunie kowe la itre gavena me itre joxu, pi ni.”—Mataio 10:16-18.

Eje hi, tro la itretre drei Iesu a ixelë me itre icilekeu, ngo nyidrëti a akeukawanyi angatr me sisinyi ka hape: “Ame hë la kola kootrë nyipunie, the hnehengazone kö la nyine troa qaja, me aqane troa qaja, ke tro kö lai a traqa ngöne la ijin. Nge tha nyipunie casi kö la ka ithanata, ke uati ne la Keme i nyipunie la ka ithanata jëne nyipunie.” Öni nyidrëti hmaca: “Tro la haetra a nue la cipa kowe la mec, tune la keme memine la kuku, nge tro la itre nekönatr a icilekeu me keme me thin, me nue nyidro troa mec. Nge tro ha methinë nyipunie hnene la nöjei atr asë pine la ëjeng. Ngo ame la atre cile hut uti hë la pun, tro hë angeic a mel.”—Mataio 10:19-22.

Pine laka, nyipiewekë catre la huliwa ne cainöj, hnei Iesu hna hmekë angatr ka hape, tha tro kö a pi mama, wanga ajolë angatr jë troa eatrëne la huliwa cili. Öni nyidrë: “E traqa ju akötrë nyipunie ngöne la ketre traon, kötre jë pena kowe la ketre traon. Ke, eni a qaja hnyawa koi nyipunie ka hape, tro ha traqa la Nekö i atr nge tha umuthe pala kö nyipunie la huliwa ne cainöj ngöne la nöjei traon me hunahmi asë.”—Mataio 10:23.

Tha fene lolo kö la itre ini, me itre ithuecatr i Iesu kowe la ala 12! Ngo mama hi ka hape, hna qaja la itre trengewekë celë koi itretre dreng ka troa cainöj thupene la mec me mele hmaca i Iesu. Thenge la hna qaja hnei Iesu, tro “la nöjei atr asë” a methinëne la itretre dreng, ngo tha angetre Iudra hmekuje kö. Ketre, tha hna qaja kö ka hape, hna utisai itre aposetolo koi itre gavena me joxu pine angatr cainöj. Nge tha hna qaja fe kö ka hape, hnei itre atrene la fami angatr hna nue angatr troa mec.

Iesu pe a qaja la itre ewekë ka troa traqa elany, tune lo hnei nyidrë hna qaja ka hape, tha tro kö itretre drei nyidrë a umuthe la huliwa ne cainöj uti hë “traqa la Nekö i atr.” Iesu a amamane laka, tro pala kö la itretre dreng a cainöjëne la Baselaia i Akötresie ngöne la ijine  traqa la Joxu, ene Iesu Keriso Atre iameköti.

Tha tro kö itre aposetolo a sesëkötr e traqa ju la itupath ngöne la huliwa ne cainöj, ke öni Iesu: “Tha sisitria kö la atr hna inine hune la atre hamë ini, ketre, tha sisitria kö la hlue hune la maseta.” Eje hi, hna qanangazo Iesu me axösisi nyidrë pine cainöjëne la maca ne Baselaia i Akötresie, matre tro fe a hane traqa tune koi angatr. Ngo öni Iesu pe: “The xouene kö la ka troa humuthe la ngönetrei, ngo thatreine pe apatrene la mel. Ngo xouene jë pe la ka atreine troa apatrene la mel me ngönetrei ngöne la Gena.”—Mataio 10:24, 28.

Hnei Iesu hna amamai tulu. Aja i nyidrëti troa mec, hune la troa tha mele nyipici kowe la ka trene men, ene Iehova. Eje hi, Iehova hmekuje hi la Akötresie Ka Tru Trenge Men, matre atreine hi nyidrë apatrene la “mel” (mejiun göi elany), maine hamë mele ka pë pun. Drei la ketre iakeukawany ka tru koi itre aposetolo!

Iesu a hamëne pi la ketre ceitun matre amamane la etrune la ihnimi i Akötresie koi itretre drei nyidrë. Öni Iesu: “Hapeu, tha hna salemëne kö la lue neköi sisi koi lue neköi manie ka co catr? Ngo ame pe, tha kei kö e kuhu hnadro la ala casi e nyidro, nge tha hna öhne kö hnei Keme i nyipunie. . . . Matre the xou kö; ke nyipiewekë catre kö nyipunie hune la itre sisi ka nyimutre.”—Mataio 10:29, 31.

Ngo eje hi laka, tro la maca hna cainöjën hnei itretre drei Iesu a thë la itre fami, ke tro itre xan a kapa, nge tro itre xan a xelen. Öni Iesu: “The mekune pi kö ka hape, eni a traqa fë tingeting e celë fen.” Eje hi, jole ka tru koi itre xa atrene la fami troa trongëne la nyipici ne la Tusi Hmitrötr. Ngo Iesu pe a hmekëne ka hape: “Ame la atre hnime catrëne la kem me thine i angeic hung, tre, tha ijiji angeice kö troa ketre atre drei ni, nge ame la atre hnime catrëne la neköi angeic trahmany maine jajiny hung, tre, tha ijiji angeice kö troa atre drei ni.”—Mataio 10:34, 37.

Ngo tro fe a hetre atr ka kapa madrine la itretre drei nyidrë. Öni Iesu: “E tro la ketre atr a hamë hnepe tim ka lepany kowe la ketre atr ka co celë, pine laka atre dreng, tha tro kö a pë thupe i angeic.”—Mataio 10:42.

Hnene la itre ini, me ithuecatr i Iesu hna hnëkëne hnyawa la itretre dreng, matre angatr a “tro ju kowe la itre hunahmi trootro troa cainöjëne la maca ka loi, me aloine la itre wezipo.”—Luka 9:6.