Ame la itretre cinyihan me itre Faresaio a xele ma kapa ka hape, Iesu a helë dremoni hnene la mene i Akötresie, angatre hi lai a qajangazone la uati hmitrötr. Matre drei la hnei angatr hna sajuën, Akötresie maine Satana? Öni Iesu: “Maine kola cia hlöeë la isinöe i nyipunie, tro fe la itre wen a lolo, ngo maine ka si meci la isinöe, troa ngazo la itre wen. Matre kola wangatrehmekune la isinöe hnei itre wen.”—Mataio 12:33.

Eje hi, ka hmo la atre mekune ka hape, ame la itre wen ka loi, tune la troa helë dremoni, tre thangane la hnei Iesu hna nyihlue i Satana. Nge tune lo hnei Iesu hna qaja ngöne la cainöje i nyidrë hune la wetr, tro la wen a lolo e tha ka si meci kö la sinöe. Matre nemene wen la hna amaman hnei itre Faresaio, itre ka ewekë menu? Kola amamane laka, ceitu i angatr me itre sinöe ka si mec. Öni Iesu koi angatr: “Matra ne vaipa, tro nyipunieti a qaja tune kaa la itre trengewekë ka loi, ngo ka ngazo pe nyipunie? Eje hi, kola ewekë la që qa kuhu hni.”—Mataio 7:16, 17; 12:34.

Itre trengewekë së a amamane la itre aliene hni së, nge kolo fe a nyitrepene la iameköti koi së. Öni Iesu lo: “Eni hi a qaja koi nyipunie laka, tro la itre ka qaja la itre trenge ithanata ka menu a isa qeje thiinan koi Akötresie ngöne la Drai Ne Iameköti. Matre, hnene la itre trengewekë i nyipunie, tro ha jele meköti nyipunie, nge thenge la itre trengewekë i nyipunie, tro ha jele ngazo nyipunie.”—Mataio 12:36, 37.

Ngacama hnei Iesu hna kuca la itre iamamanyikeu ka tru, ngo itretre cinyihan me itre Faresaio a sipo xa iamamanyikeu, öni angatr: “Atre ini fe, eahuni a ajane tro nyipëti a amamai huni la ketre hatren.” Nyimutre hë la itre ewekë ka anyipici Iesu, matre tro ju hë angatr a goeë itre xa iamamanyikeu, ngo ceitune pala hi lai. Haawe, meköti la hnei Iesu hna qaja koi itre he ne nöj ka hape: “Xötre ka ngazo nge ka tha nyipici koi Akötresie a treqene la ketre hatren, ngo casi hi la hatrene koi nyipunie a kolo hatrene i Iona perofeta.”—Mataio 12:38, 39.

Qëmekene tro Iesu a tro, hnei nyidrë hna pane qejepengöne lai koi angatr, me hape: “Hnei [Iona] hna lapa e kuhu hni ne la ketre ie ka tru, a traqa koi köni drai me köni jidr. Ketre tune fe kowe la Nekö i atr, tro angeic a lapa hnine la ihnadro, köni drai me köni jidr.” Hna ulumi Iona hnene la ketre ie atraqatr, nge e thupen, hna hmitra angeic, matre mele hmaca ha. Nge hnei Iesu pë hë hna qaja ka hape, tro nyidrë a mec, me mele hmaca ngöne la hnaakönine drai. Ngo ame hë la kola eatre la itre trengewekë cili, hnei  itre he ne nöj i angetre Iudra hna xelene “la hatrene i Iona,” ke xele kö angatr ma ietra me saze. (Mataio 27:63-66; 28:12-15) Ngo tha hnei “angetre Nineve” kö hna ujë tune thupene lo Iona a ase cainöje koi angatr. Celë hi matre angatr a ahnëjinëne la xötr atre celë. Nge öni Iesu fe ka hape, hnene la Joxu föe ne Seba hna qaja amamane la itre ngazo ne la xötre celë. Eje hi, hnei eahlo hna isine troa drenge la inamacane i Solomona, me hain. Ngo enehila, öni Iesu, “hetre atr ka tru catre kö hui Solomona e celë.”—Mataio 12:40-42.

Iesu a aceitunëne la xötr ka ngazo celë memine la ketre atr hna lötrij hnei dremoni. (Mataio 12:45) Pine laka, tha canga thele kö angeic troa löthi angeic hnei itre ewekë ka loi, hnene lo dremoni hna löthi angeic hmaca memine la sevene lao xan ka ngazo catr. Ketre tun, hna ahmitrötrëne me saze la nöje Isaraela—tune lo hna kuca kowe lo atr hna lötrij hnei dremoni. Ngo hnene la nöj hna xelene la itre perofeta i Akötresie, nge goi icilekeu fe angatr me Iesu, lo hnei Akötresie hna hamë uati kow. Eje hi, ngazo catre hë la nöj enehila hun ekö!

Iesu pala kö a ithanata, nge fetra pi hi la thine i nyidrë me ha jini i nyidrë, angatr a itreqe e trön. Matre önine la itre xa ka lapa easenyi Iesu ka hape: “Hanawange la thine i nyipë me ha jini nyipë e kuhu qëhnelö, angatr a ajane troa ithanata me nyipë.” Iesu a amamane jë koi angatre la aqane hnime nyidrë la itretre dreng, itre nyipi trejin, me xa, me thine i nyidrë. Nyidrëti a saathe pi la ime i nyidrë kowe la itretre drei i nyidrë me hape: “Ame la thineng me itre trejin me eni, tre, itre ka drenge me trongëne la trengewekë i Akötresie.” (Luka 8:20, 21) Iesu hi lai a amamane ka hape, maine nyipici laka, nyidrëti a hnime la fami i nyidrë, ngo hnime catre kö nyidrë la itretre dreng. Nge eje hi, kola akeukawanyi së hnene la aqane imelekeu së me itre trejin hnine la ekalesia, ke e trön, hetre ka mekuhni së, me ka eetr pine la itre huliwa ka loi hne së hna kuca.