Ame ju hi la Iesu a dreng ka hape, kola thele troa humuthi nyidrë hnei itre Faresaio me itre sine xöle i Herodra, nyidrëti a tro pi me itretre dreng kowe la Hnagejë Ne Galilaia. Itre atr ka ala nyim nge ka traqa qa cailo a tro koi nyidrë—itre ka traqa qa Galilaia, me qa ngöne la itre götrane ngönegejë e Turo me Sidona, me qa ngöne la götrane kohië ne la Hneopegejë Ioridrano, me qa Ierusalema, me Idumea me itre nöj e kolojë. Eje hi, ala nyimu la itre hnei Iesu hna aloin. Matre, ala nyimu catre hë la itre trene mec ka tro koi nyidrë. Nge goi tha treqene kö angatr tro Iesu a ketri angatr, ngo angatr fe hë a canga ketri nyidrë.—Mareko 3:9, 10.

Ala nyimu catre la itre atr, matre Iesu a sipo itretre dreng troa hnëkëne la ketre neköi he koi nyidrë. Aja i nyidrë troa nango ananyine la ngönegejë, matre tha tro kö la ka ala nyim a penyi nyidrë. Ketre, tro lai a aijijë nyidrë troa hamë ini qa ngöne he, me tro kowe la ketre götran troa xatua itre xan.

Trotrohnine hi Mataio, ketre atre drei Iesu laka, itre huliwa i nyidrë a eatrëne “lo hna qaja jëne Isaia perofeta.” (Mataio 12:17) Kola qeje nemen?

“Hanawang! Kolo hlueng hnenge hna iën, me hniminang hnenge hna madrine kow! Tro ni a atë hui nyëne la uati hmitrötr, nge tro nyën a amamane la meköting kowe la itre nöj. Tha atre thele iwesitrë kö nyën, nge tha ka sue kö, nge tha tro kö a drenge la nine ithanata i nyën e cahu gojeny. Tha tro kö nyën a waja fica la hainy ka pej, nge tha tro kö nyën a apin la wik ka so nge ka ae trootro, uti hë la tro nyën a huune fë la meköt. Matre, tro ha mejiune la nöjei nöj ngöne la ëje i nyën.”—Mataio 12:18-21; Isaia 42:1-4.

Iesu hi la hlue hnimina i Akötresie, lo hnei nyidrëti hna madrine kow. Hnei Iesu hna amamane hnyawa la nyipi meköt, ke hajihaji hë hnene la itre qenenöj ka tria i hmi. Hnei itre Faresaio hna amekötine la aqane troa trongëne la itre wathebo i Akötresie. Nge goi xele fe angatr ma hane xatuane la wezipo e Sabath! Matre ame la Iesu a amamane hnyawa ka hape, nemene la meköti Akötresie, nge thei nyidrëti la ua i Akötresie, nyidrëti hi lai a xometrije la itre qenenöj ka tria, nge ka xomacone la mele ne la atr. Celë hi kepin matre itre hene ne hmi a thele troa humuthi Iesu. Nyine hmahmane lai!

Nemene la aliene la hna hape, “tha atre thele iwesitrë kö nyën, nge tha ka sue kö, nge tha  tro kö a drenge la nine ithanata i nyën e cahu gojeny”? Ame la Iesu a aloinyi atr, tha nyidrëti kö a nue angatr—maine itre dremoni—“troa qaja amamane ka hape, drei nyidrë.” (Mareko 3:12) Ketre, tha aja i nyidrëti kö tro la itre atr a atrepengö i nyidrë hnene la itre ewekë hna qaja atrun e cahu gojeny, maine hnene la itre ithanata ka tria hna iqajakeun.

Ketre, Iesu a tro fë maca ne iakeukawanyi kowe la itre hna aceitunën me itre hainy ka pej, itre ka ez nge hna waja fican. Ceitu i angatre fe me itre wik ka so, nge ka ae trootro. Nge ame Iesu, tha nyidrëti kö a waja ficane la hainy ka pej, me apine la wik ka so, nge ka ae trootro. Nyidrëti pe a amejëne la ka ipië ngöne la menyik me ihnim. Nyipici, Iesu hnyawa hi la nyine tro la itre nöj a mejiune kow!