Enehila, atre Iesu hë hnene la itre atr. Matre ala nyimu la itre ka traqa kowe la itre nöje ka co troa drei nyidrë, me goeëne la itre huliwa nyine hain. Ngo thupene la itre hnepe drai, nyidrëti a bëek a tro Kaperenauma, ezine la Hnagejë Ne Galilaia. Tro hë nyidrëti a pane lapa aqeany, me huliwa e cili. Canga drenge hi itre atr ka hape, bëeke hë nyidrë. Matre ala nyimu la itre ka tro koi nyidrë. Hetre itre Faresaio, me itretre inine la Wathebo. Angatr a traqa qa ngöne la nöjei götrane Galilaia me Iudra, nge hetre itre ka traqa fe qa Ierusalema.

‘Ala nyimu catre la itre ka traqa e cili, angatr a ipepetreny, matre goi pë fe ca göhnë ezine la qëhnelö, nge Iesu a nyiqaane ithanata jë koi angatr.’ (Mareko 2:2) Haawe, ijine hë troa kuca la ketre huliwa nyine hain. Tro lai a xatua së troa trotrohnine laka, ijiji Iesu troa apatrene la qaane la akötr, me aloine la itre hnei nyidrëti hna iën.

Ame la Iesu a hamë ini hnine la hnahag ka tiqa, traqa pi la foa lao trahmany, angatr a xututhe la sinee i angatr hune la ili ne wezipo. Aja i angatr tro Iesu a aloinyi angeic. Ngo pine laka, ala nyimu la itre atr, thatreine ju hi angatr “lö sai angeic meköti koi Iesu.” (Mareko 2:4) Pane mekune jë la hleuhleu i angatr! Matre angatr a elë jë kowe la hune uma, me fe, me autine la sinee i angatr hune ili.

Hnei Iesu kö hna elëhni pine angatr thupa të nyidrë? Pëkö! Nyidrëti pe a haine la etrune la lapaune i angatr, matre öni nyidrë kowe la ka wezipo ka hape: “Ase hë nue la itre ngazo i hmunë.” (Mataio 9:2) Ngo ijiji Iesu kö troa köletriji ngazo? Tha mekuna i itre Faresaio kö me itretre cinyihan, matre angatr a isa mekune ka hape: “Hnauëne la angeic a ithanata tune la? Angeic a pi tru koi Akötresie! Ke drei la ka atreine sei ngazo, ngo Akötresieti casi hi?”—Mareko 2:7.

Atre hi Iesu la hnei angatr hna mekun, matre öni nyidrë: “A hnauëne laka, ngazo la itre mekuna i nyipunie? Nemene la ka hmaloi troa qaja kowe la wezipo, ‘Ase hë nue la itre ngazo i eö,’ maine ‘Cile jë, xome jë la ili eö nge tro jë’?” (Mareko 2:8, 9) Eje hi, jëne la huuje i Iesu, ijiji nyidrëti hi troa senge la itre ngazo ne lai atr.

Thupene lai, Iesu a amamane jë kowe la ka ala nyimu me kowe la itre ka qeje nyidrë ka hape, ijiji nyidrëti hi troa sei ngazo e celë fen. Nyidrëti a xei kowe la ka genyi itrei me hape: “Eni a qaja koi hmunë, cile jë, xome jë la ili hmunë, nge tro jë hë kowe la hnalapa i hmunë.” Angeic a canga tro ju, me xututhe trongëne la ili i angeic qëmekei nöjei atr. Matre kola hain hnei itre atr! Angatr a atrunyi Akötresieti jë me hape: “Eahuni petre hi la a öhn la ewekë ka tun!”—Mareko 2:11, 12.

Hnei Iesu hna amamane laka, ka ce tro la ngazo me itre sine mec, nge ka ce tro la troa sei ngazo memine la troa aloinyi mec. Tusi Hmitrötr a ini së ka hape, hnene lo pane keme së, Adramu hna ngazo, matre hna nue pë hë koi së la itre ethanyine la ngazo, ene la troa wezipo me mec. Ngo fene la musi ne la Baselaia i Akötresie, tro Iesu a köletrije la ngazo ne la nöjei atre ka hnimi Akötresie me nyihlue i nyidrë. Qa ngöne lai, tro ha patre palua la itre sine mec.—Roma 5:12, 18, 19.