Ame la Iesu, me Peteru, me Iakobo, me Ioane a uti qa hune la wetr, traqa ju hi angatr a öhne la ka ala nyim. Ngo hetre ewekë, ke itretre cinyihan a cile xötreithe la itretre dreng, nge angatr a isi ithanata. Nge ame la kola öhnyi Iesu hnene la ka ala nyim, sesëkötre ju hi angatr, nge angatr a nyinyape pi troa ibozu me nyidrë. Öni Iesu jë hi: “Nemene la hnei nyipunieti hna ithanatane me nyudren?”—Mareko 9:16.

Hnene la ketre atr hna xulu qa ngöne la ka ala nyim, me sa iwatingöneca qëmeke i Iesu, me hape: “Atre Ini fe, eni a traqa fë koi nyipë la neköng, ke hna löthi nyën hnene la ketre dremoni ka sewe nyën troa ithanata. Nge ame la kola xolouthi nyën hnene la dremoni, ej a kuië nyëne pi e kuhu hnadro, matre nyëne a iëz me kiki inyö, nge pë ju hi trenge catre i nyën. Matre, hnenge hna sipone la itretre drei nyipë troa helëne lai dremoni, ngo thatreine kö angatr.”—Mareko 9:17, 18.

Itretre cinyihan a qajangazone la itretre dreng, ke thatreine kö angatr aloine la nekönatr, nge ma kolo jë a ihnyimasai. Matre tha canga sa kö Iesu kowe la kem, ngo nyidrëti a ujë jë kowe la ka ala nyimu me hape: “Ekölö hi ni nyipunie, xötre ka pë lapaun nge ka thiina ka qali, tro ni a ce me nyipunie uti hë eu? Nge tro ni a xomihni nyipunie uti hë eu?” Iesu hi lai a qeje itretre cinyihan, ke hnei angatr hna kucahmëne la itretre drei nyidrë, lo patre kö nyidrë. Thupene lai, Iesu a qaja jë kowe la kem ka akötre ka hape: “Awi nyëne jë koi ni.”—Mataio 17:17.

Matre ame hë la nyën a easenyi Iesu, hnene la dremoni ka löthi nyën hna triji nyën e kuhu hnadro, me ajipajipa nyën. Nge kolo pala hi a ujëujë la nekönatr, me iëz. Matre öni Iesu kowe la kem: “Ije macatre ne traqa ha la ewekë celë koi nyën?” Sa jë hi angeic ka hape: “Qaane lo nyën a co. Ame itre xa ijin, dremoni a kuië nyën  koi eë me koi tim matre humuthi nyën.” Matre kem a sipo Iesu jë ka hape: “Maine ijiji nyipë, wai nyio nge epi xatua nyio.”—Mareko 9:21, 22.

Atraqatre la hleuhleu i kem, ke thatreine fe la itretre drei Iesu xatua angeic. Matre Iesu a sa jë kowe la sipo ne la atr, me axapone la hni angeic, öni nyidrë: “Eö lai a qaja ka hape, ‘maine ijiji nyipë’? Ame la atre lapaun, tro angeic a hetrenyi la nöjei ewekë.” Haawe, canga sue jë hi kem ka hape: “Eni a lapaun! Xatua ni jë troa acatrene la lapauneng!”—Mareko 9:23, 24.

Öhne hi Iesu laka, kola nyinyape koi nyidrë la ka ala nyim. Nge qëmeke i angatr asë, Iesu a wesitrëne jë la dremoni me hape: “Dremoni, eö la ka sawa la nekönatr troa ithanata me dreng, tro pi nge the löthi nyëne hmaca kö!” Matre ame la kola lötrije la nekönatr hnei dremoni, ej a kuca jë matre sue pi la nekönatr me jipajipa. Thupene lai, tha enije ju hi nyën. Matre ame la kola öhne lai, öni itre atr ka hape: “Meci hë la nekönatr!” (Mareko 9:25, 26) Ngo ame la Iesu a xolouthe la ime ne la nekönatr, nyën a mejë jë nge “loi hmaca pi hi la nekönatr ngöne lai hawa cili.” (Mataio 17:18) Eje hi, kola haine la itre atr la hnei Iesu hna kuca.

Ngo ame lo Iesu a upe la itretre drei nyidrë troa cainöj, hna aijijë angatre troa helë dremoni. Matre ame hë la angatre casi me Iesu, öni angatr: “Hnauëne laka, thatreine kö huni helëne lai dremoni?” Iesu a sa jë ka hape, hnene laka tha ijije kö la lapaun i angatr, öni nyidrë: “Ame lai dremoni cili, tro hmekuje hi a helëne hnei thith.” (Mareko 9:28, 29) Tru catre la mene la dremoni cili, matre e angatr a pi helën, nyipiewekë troa catre lapaun, me thithi koi Akötresie troa kapa la men ka ijij.

Iesu a nyipune jë me hape: “Eni a qaja hnyawa koi nyipunie laka, maine tro la lapaune i nyipunie a tune la itine sinapi, tro nyipunie a qaja kowe la wetre celë ka hape, ‘Kötre jë qa lai kowe la,’ nge tro eje lai a kötre pi. Nge eje hi, pëkö ca ewekë hna troa thatreine kuca hnei nyipunie.” (Mataio 17:20) Hane petre hi la ketre lapaun!

Maine jë, tro la itre jol me akötr ka ajolë së troa catre nyihlue i Iehova, a tune la itre wetr. Thatreine kö së elë hun. Ngo e tro sa acatrene la lapaune së, tro hë sa atrein.