Thupene la lue drai e Samaria, hnei Iesu hna bëeke kowe la zi nyidrë. Ase petre hi nyidrëti cainöj e Iudra, ngo enehila, tha nyidrëti kö a trongene mano e Galilaia. Nyidrëti pe a catre cainöj ngöne la zi nyidrë. Tha mekune kö nyidrë ka hape, troa kepe nyidrëti hnyawa, ke öni nyidrëti lo, “tha hna kapa kö la perofeta ngöne la sipu zi angeic.” (Ioane 4:44) Nge ame la itretre drei nyidrë, tha ce angatre kö me Iesu, hnei angatre pe hna bëeke kowe la itre fami, me huliwa i angatr.

Nemene la maca hnei Iesu hna cainöjën? “Easenyi hë matre traqa pi la Baselaia i Akötresie. Ietra ju, nge lapaune ju kowe la maca ka loi.” (Mareko 1:15) Nge nemene la thangan? Ala nyimu la angetre Galilaia ka kepe nyidrëti hnyawa, me wangatrunyi nyidrë. Angatr a ujë tun pine la maca hnei nyidrëti hna tro fë, ngo pine fe laka, itre treu qëmeken, hetre itre atre Galilaia ka sine lo Paseka e Ierusalema, nge hnei angatre hna öhne la itre iamamanyikeu i Iesu.—Ioane 2:23.

Ekaa e Galilaia la Iesu a nyiqaane cainöj? Kola mekune laka, e Kana, traon hnei nyidrëti hna saze la timi koi waina lo kola xeni nyikein. Ame ngöne la hnaaluene traqa i nyidrë e Kana, drenge ju hi nyidrë ka hape, hetre nekö trahmany ka wezipo nge easenyi hë matre meci pi nyën. Nyëne la neköne la ketre tane mus ka huliwa koi Herodra Anetipa, lo joxu ka troa humuthi Ioane Bapataiso. Drenge hë la tane cili ka hape, Iesu a tro qa Iudra a tro Kana. Matre angeic a trotrije pi la hnalapa i angeic e Kaperenauma, troa iöhnyi me Iesu e Kana. Ame hnene la tane mus hna iele Iesu me hape: “Joxu, canga trohemi, ke wanga meci pi la neköng.”—Ioane 4:49.

Ma hnene la atre cili hna sesëkötre la aqane sa i Iesu, ke öni nyidrë: “Tro jë hë, mele hë la nekö i eö.” (Ioane 4:50) Ame hnene la tane mus hna mejiune koi Iesu, me kokone hmaca la gojenyi ne bëeke kowe la hnalapa i angeic. Angeice pala kö ngöne la gojeny, nge ixelë ju hi angeic me itre hlue i angeic ka traqa fë maca ka loi. Eje hi, mele hë la nekö i angeic, nge ka egöcatre nyën! Öni angeice jë hi, ‘Eu la nyën a loi?’ Angeic a hnyinge tun, ke aja i angeic troa trotrohnin.

Sa jë hi angatre ka hape: “Eidr, ngöne lo hnaasevenene hawa, patre ju hi la idreuthi nyën.”—Ioane 4:52.

Trotrohnine ju hi lai tane ka hape, kolo hnyawa hi lo hawa ne qaja Iesu ka hape, “Mele hë la nekö i eö.” Matre, ngacama ka trene mani la atre cili, nge tru hnei hlue i angeic, ngo qaane ju hi lai, hnei angeic hna ketre atre drei Keriso, angeic me fami i angeic asë.

Lue iamamanyikeu i Iesu e Kana. Hnei nyidrëti hna pane saze la tim koi waina, nge e thupen, hna aloine la ketre nekö trahmanyi qa gaa nanyi, 26 km la enanyin. Ngo eje hi laka, hetre itre xa iamamanyikeu hna kuca hnei Iesu. Ngo nyipiewekë kö la hnaaluen, ke ijine nyidrëti a bëeke hmaca nge perofeta i Akötresieti hë. Ngo hapeu, tro kö a ‘kapa la perofeta cili ngöne la sipu zi nyidrë’?

Tro ha mama cile koi së, ke Iesu hë la a tro Nazareta, zi nyidrë. Nemene la ka treqe nyidrëti e cili?