E Sabath, hnei Iesu hna lö kowe la ketre sunago, ma e Galilaia. Nge e cili, öhne ju hi nyidrë la ketre atr ka fitre ime maca. (Luka 6:6) Ngo itretre cinyihan me itre Faresaio a thupë nyidrëti hnyawa. Pine nemen? Öni angatr: “Meköti kö troa aloine la trene mec ngöne la drai Sabath?”—Mataio 12:10.

Itre hene ne hmi i angetre Iudra a mekune ka hape, tro hi a aloine la atr e Sabath e ka tro ha mec. Matre ame pë hë göi june ka xeci, maine pelethe la waca hna ela, tha ka meköti kö, ke tha tro kö la atr a mec. Haawe, tha angatre kö a hnying ke kola hnime la atre ka akötr. Angatre hi a thele troa nyizö Iesu.

Atre hi Iesu la itre mekune ka qali i angatr. Nge öhne hë nyidrë ka hape, ase hë angatr sasaithi tulu, nge tha imeku hë la aqane goeën angatr la Sabath, memine la hna qaja ngöne la itre hna Cinyihan. (Esodo 20:8-10) Anyimua nyizö nyidrëti hë hnei angatr, pine nyidrë kuca la loi e Sabath. Ngo enehila, tro hë nyidrëti a cile koi angatr, ke öni nyidrë kowe la ka fitre im: “Mejë jë, nge cile pi e cahu nyipin.”—Mareko 3:3.

Nyidrëti a qëmeke koi itre Faresaio me itretre cinyihan, me hape: “Maine tro la ketre e nyipunie a hetre ketre mamoe, nge tro lai si i angeic a mala hnine la hnaop la drai Sabath, hapeu, tha tro kö angeic a thepe nyëne qaa lai?” (Mataio 12:11) Jëne kepe mani la mamoe, matre tha tro kö angatre lai a nue la si i angatr hnine la hnaop uti hë la drai thupen; ke e troa meci la si angatr, luzi hë angatre lai. Ketre, önine la itre hna Cinyihane ka hape: “Ame la ate ka meköti kola hnime la si angeic.”—Ite Edomë 12:10.

Iesu a nyixane hmaca jë me hape: “Sisitria kö la atr hune la mamoe! Haawe, meköt e troa kuca la loi ngöne la drai Sabath.” (Mataio 12:12) Tha Iesu kö a eni wathebo la nyidrëti a aloinyi atr e Sabath. Haawe, pë hmaca ju kö nyine troa qaja hnei itre hene ne hmi, ke trengewekë ka inamacan me utipine la hna qaja hnei Iesu. Casi hi, angatr a lapa thaup.

Iesu a goeëne ju xötreithi nyidrë, nge nyidrëti a elëhni me hleuhleu pine la aqane ngazo la itre mekuna i angatr. Thupene lai, öni nyidrë kowe la ka fitre im: “Sathe pi la ime i hmunë.” (Mataio 12:13) Matre ame ju hi la angeic a sath, loi jë hi la ime i angeic. Ame hnei angeic hna madrin, ngo tune kaa itre ka nyizö Iesu?

Maine ju, tro fe hi angatr a hane madrin, ngo hnei itre Faresaio hna tro e kuhu qëhnelö me ithanata “me itre sine xöle i Herodra . . . troa humuthi [Iesu].” (Mareko 3:6) Ame hnine la parti politik cili, hetre itre hene ne hmi hna hëne ka hape, itre Sadukaio. Nge lue ka imethinë catre la itre Faresaio me Sadukaio, ngo ngöne la ijine cili, angatr a ce xöle troa icilekeu me Iesu.