Hnei Iesu hna hëne la foa lao atre dreng—Peteru, Anederea, Iakobo, me Ioane—troa itretre ee atr. Nge enehila ngöne la drai Sabath, angatr ha ce tro kowe la ketre sunago e Kaperenauma. Iesu a hamë ini hnine la sunago, nge tune pala hi, itre atr a hain la aqane hamë ini i nyidrë. Ke nyidrëti a kuca lai kösë atre trene mus, ngo tha tui itretre cinyihane kö.

Nge hetrenyi fe hnine la sunago la ketre trahmany hna löth hnei dremoni. Matre hnene la atre cili hna sue me hape: “Nyipëti a troa uë hun, Iesu atre Nazareta? Nyipëti a traqa troa apatrenyi hun? Atre hnyawa hi ni laka drei nyipë, nyipëti hi la atr Ka Hmitrötr hna upe hnei Akötresie!” Iesu a wesitrëne jë la dremoni ka musinëne lai atr me hape: “The ilu kö, nge nue angeice pi lai!”—Mareko 1:24, 25.

Qa ngöne lai, hnene la dremoni hna kuiëne lai trahmany e kuhu hnadro, me ajipajipanyi angeic, matre angeic a sue catre jë. Eloine hi, hnene la dremoni hna lö pi qaathei angeic, nge “pë ju kö eatre i angeic.” (Luka 4:35) Haawe, goe catre ju hi la itre atrene la sunago! Öni angatr, “Nemene ewekë la? . . . Atreine hi nyidrë musinëne la itre dremoni, nge itre ej a drei nyidrë.” (Mareko 1:27) Matre tha sesëkötre kö së laka, hna aca tro iqajakeune la ewekë cili ngöne la Galilaia asë.

Thupene lai, Iesu me itretre drei nyidrë a tro pi qa hnine la sunago kowe la hnalapa i Simona, maine Peteru. Nge traqa ju hi angatr a öhne la thine ne la föi Peteru, ka wezipo, me idreuth. Matre angatr a sipo iele Iesu jë troa aloinyi eahlo. Iesu a tro ju koi eahlo, me ea la iwanakoime i eahlo, me amejë eahlo. Ame hna canga loi pi eahlo, nge eahlo a nyiqane huliwa koi Iesu me itretre dreng, ma hnei eahlo jë hna kuci xen.

Matre qane lo kola lö la jö, hnei itre atr qa cailo hna traqa fë itre wezipo kowe la hnalapa i Peteru. Tha qea ju kö e thupen, kösë hna icasinekeun asë la traon ngöne la hnalapa i Peteru. Pine nemen? Pine laka, angatr asë a treqene troa aloinyi angatr. Eje hi, ‘hnene la itre ka trene wezipo, hna traqa fë koi Iesu la itre hna tith hnei nöjei pengöne mec, nge nyidrëti a ati ime ju hui angatr, me aloinyi angatr.’ (Luka 4:40) Nge tithi angatre ju hë hnei nöjei pengöne mec, ngo hnei Iesu hna xatua angatr, thenge lo hna thingehnaean. (Isaia 53:4) Hnei nyidrëti fe hna amelene la itre hna löthe hnei dremoni. Nge ame la kola lö pi qaathei angatr la itre dremoni, angatr a suene jë ka hape: “Nyipëti hi la Nekö i Akötresie!” (Luka 4:41) Ngo hnei Iesu hna wesitrë angatr me wathebo angatr troa ewekë. Atre hi la itre dremoni ka hape, Iesu la Keriso, ngo xele kö nyidrë ma troa mekune ka hape, angatr a nyihluene la nyipi Akötresie.