Thupene ju hi la Iesu a ase qeje nue ngazo hnine la hnalapa i Simona, nyidrë a xejë jë la hnaaluene trongene cainöje i nyidrë e Galilaia. Hnaaluene macatre ne cainöje i nyidrë hë la, nge tha nyidrëti casi kö. Ce nyidrë memine lo ala 12, me itre föe hnei nyidrë hna amelene “qa ngöne la itre dremoni, me itre sine mec.” (Luka 8:2) Maria Magadalena hi la ketre, me Susana, me Ioana, ifënekö ne la atre huliwa i Joxu Herodra Anetipa.

Pine laka, ala nyimu catre hë la itre ka drei meje i Iesu, kolo fe a ithanata lapa nyidrë me itre huliwa i nyidrë. Ame la ketre ijin, hna tro fë koi nyidrë la ketre trahmanyi ka hum me timek hna löthe hnei dremoni. Matre hnei Iesu hna aloinyi angeic. Nge pine laka, kötre hë lai dremoni, goe hë nyidrë, nge ithanata ha. Matre itre atr a hain me hape: “Hö, tha kolo kö lo Nekö i Dravita la?”—Mataio 12:23.

Ala nyimu catre la itre ka traqa itronyi kowe la uma hna lapan hnei Iesu, matre goi tha ijiji nyidrëti fe me itretre dreng troa hane xen. Ngo tha itre atr asë kö a mekune ka hape, “Nekö i Dravita la.” Ketre, ala nyimu fe la itre Faresaio me itretre cinyihan ka traqa qa Ierusalema—ngazo pe, tha traqa kö angatr troa kepe ini qaathei Iesu maine nyixöle i nyidrë. Öni angatr koi itre atr: “Hna löthi angeic hnei Belezebuba,” nge kola ce huliwa memine la “tan ne la itre dremoni.” (Mareko 3:22) Matre ame ju hi la kola drenge lai hnei itre sinee i Iesu, angatr a traqa pi troa thei nyidrë. Pine nemen?

Ngöne la ijine cili, tha mejiune kö la itre jini Iesu ka hape, nyidrë la Nekö i Akötresie. (Ioane 7:5) Ame koi angatr, tha mama i angatre kö lai, lo hnei angatr hna ce tru memin e Nazareta, ke kola ha amejë gomegom. Matre angatr a mekune jë ka hape, hetre ewekë ka traqa koi nyidrë, öni angatr: “Hmo hë angeic.”—Mareko 3:21.

Ngo nemene la hna amamane hnene la itre iamamanyikeu? Iesu a ase aloine la atre hna  löth hnei dremoni, goe hë me ithanata ha. Eje hi, pëkö ala casi ka atreine jelethoine lai. Matre hnei itretre cinyihan me itre Faresaio hna thele troa sili ithanata Iesu, öni angatr: “Angeice lai a helëne la itre dremoni jëne lo tan ne la itre dremoni, Belezebuba.”—Mataio 12:24.

Atre hi Iesu la aliene hni ne la itretre cinyihan me itre Faresaio, matre öni nyidrë: “Maine tro la itre baselaia a aisa angatre kö, tro hë itre eje lai a patr, ketre tune mina fe kowe la itre traone me hnalapa ka aisa angatre kö, tha tro hë itre eje lai a cile hut. Nge maine tro Satana a helë angeice kö, angeice hi lai a sipu cil koi angeice kö; nga troa cile tune kaa la musi angeic?”—Mataio 12:25, 26.

Hnetime ju hi koilo! Ke eje hi, atre hi itre Faresaio ka hape, hetre angetre Iudra ka helë dremoni. (Itre Huliwa 19:13) Matre Iesu a hnying jë koi angatr me hape: “Maine eni a helëne la itre dremoni jëne Belezebuba, hnei drei kö matre atreine jë la itre atre i nyipunie helëne la itre dremoni?” Iesu hi lai a qaja koi angatre ka hape, ame la aqane nyizö nyidrë hnei angatr, ijije fe troa hane tune koi angatr. Nyidrëti a sisedrëne jë me hape: “Ngo maine eni a helëne la itre dremoni hnene la uati Akötresie, kolo hi lai a hape, ase hë sasaithi nyipunie hnene la Baselaia i Akötresie.”—Mataio 12:27, 28.

Ame la Iesu a helë dremoni, kolo hi lai a anyipicine laka, mene kö nyidrë hui Satana. Nge nyidrëti a acatrene la mekune cili jëne la ketre ceitun, öni nyidrë: “Nge maine tro la ketre atr a thele troa lö hnine la uma troa atrekënö la itre mo ne la atr ka catr, hapeu, tha tro kö angeice lai a pane othe lai atre ka catr? Nge e ase hë, ijiji angeice hë troa eöth asë la aliene lai uma. Haawe, ame la atr ka tha ce xöle me eni, tre ka icilekeu me eni, nge ame la atre ka tha ce xawane me eni, tre atre ijen angeic.” (Mataio 12:29, 30) Haawe, pine laka, itretre cinyihan me itre Faresaio a icilekeu me Iesu, mama hnyawa ha ka hape, itre hlue i Satana angatr. Angatr a ijene la itre atr qaathene la Nekö i Akötresie, atre huliwa memine la ixatua i Iehova.

Iesu a hmekëne jë la itre hlue i Satana me hape: “Troa köle trij la nöjei ngazo ne la itre nekö i atr, ngacama kuca ju hë angatr la nöjei ngazo, nge qaja ju hë angatre la nöjei ithanata ka ngazo. Ngo ame la atre qaja angazone la uati hmitrötr, tha nyine tro kö a köletrije la ngazo i angeic, nge uti hë epine palua la zö i angeic.” (Mareko 3:28, 29) Pane mekune jë la aliene koi itre ka upe koi Satana la itre huliwa hna kuca hnene la mene i Akötresie!