Tha fene drai kö la drai celë. Thupene la Iesu a tro qa Dekapoli, hnei nyidrë hna aloine la föe ka neni hni, me amelene la nekö i Iairo jajiny. Ngo tha ijine tro pala kö a mano, ke ame la Iesu a tro qaathei Iairo, hna xötrethenge nyidrë hnene la lue timek, nyidro a sue me hape: “Nekö i Dravita fe, epi utipi nyio ju.”—Mataio 9:27.

Ame la nyidro a hë Iesu ka hape, “nekö i Dravita,” nyidroti hi lai a amamane la mejiune i nyidro laka, Iesu hnyawa hi la atre kepe edröne la therone i Dravita, nge nyidrëti hi la Mesia. Ngo kösë tha Iesu kö a nyipiewekë nyidro, ma nyidrëti jë a pane wange ka hape, tro jë kö nyidro a catre fë la mekuna i nyidro? Eje hi. Matre ame la Iesu a lö hnine la uma, hnei nyidro hna xötrethenge nyidrë, nge öni Iesu jë hi: “Lapaune kö epone laka, atreine hi ni troa kuca la ewekë cili?” Öni nyidro: “Öö, ka lapaune nyio Joxu.” Qa ngöne lai, Iesu a ketre ju la lue alameke i nyidro me hape: “Qa ngöne la lapaune i epon, tro ha eatre la aja i epon.”—Mataio 9:28, 29.

Goe pi hi nyidro! Matre tune pala hi lo, Iesu a wathebo nyidro troa iqajakeune la hnei nyidrëti hna kuca. Ngo pine laka, atraqatre la madrine i nyidro, hnei nyidroti hna qeje nyidrë ngöne la nöj asë.

Nge ame ju hi la nyidroti a tro, hnei itre atr hna traqa fë koi Iesu la ketre hum, hna löthe hnei dremoni. Matre Iesu a helëne pi lai dremoni, nge nyiqaane ithanata jë hi angeic. Itre atr a haine la ewekë ka traqa matre öni angatr: “Eahuni petre hi a hane öhne la ketre ewekë ka tun e Isaraela.” Ngo e cili fe la itre Faresaio, nge pine laka thatreine kö angatre jelethoine ka hape, hna aloine lai atr, angatr a silitrengathoine jë la qaane la mene i Iesu. Öni angatr: “Angeice lai a helëne la itre dremoni jëne la tane la itre dremoni.”—Mataio 9:33, 34.

Tha qea kö e thupen, nyidrëti a ce bëeke hmaca jë me itretre drei i nyidrë a tro Nazareta. Ngo ca macatre qëmeken, hnei Iesu hna hamë ini hnine la sunago e Nazareta. Nge hnene lo itre atr hna haine la aqane hamë ini i nyidrë, ngo ame pe, hnei angatr hna dreng akötrën me thele troa humuthi Iesu. Enehila, Iesu a thele troa xatuane hmaca lo itre atrene la zi nyidrë.

Matre e Sabath, nyidrëti a tro ju hnine la sunago troa hamë ini. Nge ala nyimu la itre ka hain me hnyinge ka hape: “Qa kaa la inamacane ne la trahmanyi celë?” Ngo öni angatre fe: “Tha neköne kö lo atre tratrau sinöe la? Nge tha Maria kö la ëje ne la thine i angeic? Nge tha itre jini angeic kö lo Iakobo me Iosefa me Simona me Iudra? Nge tha ce easë kö lo memine la itre xa i angeic? Nga hnei angeic hna atreine kuca tune kaa la itre ewekë cili?”—Mataio 13:54-56.

Itre atr a goeë Iesu ceitu me ketre atrene la nöj. Nge ma öni angatr, ‘ketre nekö i eahun hi lai, matre tro angeic a Mesia tune kaa?’ Ngacama nyimu ewekë ka anyipicine laka, Iesu la Mesia—tune la inamacan i nyidrë me itre iamamanyikeu i nyidrë—ngo pine la aqane waiewekë i angatr, xele kö angatr ma kapa ka hape, Iesu la Mesia. Eje hi, pine laka, hnei angatr hna ce mel me Iesu, goi tha lapaune fe la itre fami i nyidrë. Matre öni nyidrë: ‘Tha hna kapa kö la perofeta ngöne la zi angeic, me ngöne la sipu hnalapa i angeic.’—Mataio 13:57.

Iesu a haine la aqane pë lapaune i angatr, matre xalaithe hi la itre iamamanyikeu hnei nyidrë hna kuca e cili. Hnei nyidrë “hna ati ime hi, hune la itre xa ka wezipo me aloinyi angatr.”—Mareko 6:5, 6.