Ca macatre Ioane hë e kalabus. Nge e cili, angeic a drenge la itre ewekë ka mingöming hna kuca hnei Iesu. Pane mekune jë la aliene hni Ioane la kola qejepengöne hnei itretre drei angeic, la Iesu a amelene hmaca la nekö ne la sine föe ne Naina. Ngo aja i Ioane tro Iesu a qejepengöne koi angeic la aliene la nöjei ewekë cili. Matre Ioane a upe pi la lue atre drei i angeic. Troa u? Troa hnyingë Iesu ka hape: “Nyipëti hi lo Atr Ka Traqa, maine tro pala kö huni a treqene la ketre?”—Luka 7:19.

Hapeu, meköti kö tro angeic a hnyinge tun? Ka mele nyipici Ioane koi Akötresie, nge angeice lo ka öhne la ua i Akötresie a uti koi Iesu, me drenge la nyidrë a kepe Iesu ngöne lo ijine bapataiso, a traqa koi lue macatre hë enehila. Matre tha tro kö së a mekune ka hape, tëtë hë la lapaune i angeic. Ketre, maine nyipici ju ka hape, tëtë hë la lapaune i Ioane, tha tro jë kö Iesu lai a qaja aloinyi angeic. Ngo maine eje hi laka, tha luelue kö Ioane, ngo hnauëne hö la angeic a hnyinge tun?

Ma Ioane hi a ajane tro Iesu a qaja mekötine koi angeic ka hape, nyidrë la Mesia. Tro lai a thuecatre i angeic ngöne la ijine angeic a akötr hnine kalabus. Nge ma hetre ketre aliene la hnyinge i Ioane. Atre hi angeice la hna qaja hnene la itre hna perofetan hnine la Tusi Hmitrötr laka, tro la hna Iëne i Akötresie a Joxu me atre Iamele. Ngo itre treu hë la thupene lo kola bapataiso i Iesu, nge Ioane pala hi e hnine la kalabus. Celë hi matre Ioane a hnyinge ka hape, tro jë kö a hetre ka traqa thupe i Iesu, matre aeatrëne asë la itre hna perofetan göne la Mesia.

Tha hnei Iesu kö hna qaja kowe la itretre drei Ioane ka hape, ‘Eni hi la Atre ka traqa,’ ngo hnei nyidrëti pe hna amamane la itre nyine anyipicine laka, ce Akötresie me nyidrë. Hnei nyidrë hna amelene la itre atr qa ngöne la nöjei mec. Thupene lai, öni nyidrë kowe la lue atre drei Ioane ka hape: “Bëeke jë koi Ioane, nge qaja ju koi angeic la itre ewekë hnei epone hna drenge me öhn, laka, goe hë la itre timek, nge tro hë la itre ka genyi ca, nge loi hmaca ha la itre lepera, nge drenge hë la itre ka sim, nge mele hmaca ha la itre ka mec, nge itre ka pë ewekë fe a hane kapa la maca ka loi.”—Mataio 11:4, 5.

Nge ame la Ioane a hnyinge tun, ma angeic a mekune ka hape, hetre itre xa huliwa i Iesu, nge nyidrëti fe a troa thepe angeic qa hnine la kalabus. Ngo hnei Iesu hna qaja koi Ioane ka hape, tha tro kö angeic a treqene troa hetre itre xa iamamanyikeu.

Ame la kola tro hnene la lue atre drei Ioane, hnei Iesu hna qaja kowe la ka ala nyimu ka hape, draië kö Ioane hune la itre perofeta. Ioane la “maca” i Akötresie hna qaja ngöne Malaki 3:1. Nge angeice hi lo Elia perofeta hna qaja ngöne Malaki 4:5, 6. Öni Iesu: “Eni a qaja hnyawa koi nyipunie ka hape, pëkö atr hna hnahon hnei föe ka draië hui Ioane Bapataiso, ngo ame  la ka co ne la Baselaia ne hnengödrai tre, ka sisitria kö hui angeic.”—Mataio 11:11.

Ame la Iesu a qaja ka hape, tro la ka co ne la Baselaia ne hnengödrai a draië hui Ioane, nyidrëti hi lai a amamane ka hape, tha tro kö Ioane a sine la Baselaia ne hnengödrai. Hnei Ioane hna hnëkë gojenyi koi Iesu, ngo meci ju hi angeic qëmekene tro Iesu a fe gojenyi a tro hnengödrai. (Heberu 10:19, 20) Nge ngacama Ioane la ketre perofeta ka nyipici i Akötresie, ngo tro angeic elanyi a ketre jini ne Baselaia e celë fen.