Madrine catre la 12 lao aposetolo troa cainöj ngöne la nöje Galilaia, me qaja asë koi Iesu la “itre ewekë hnei angatr hna kuca me qaja.” Matre kucakuca hë angatr. Eje hi, goi pë fe ijine i angatr troa hane xen, ke ala nyimu la itre atr ka traqa me tro. Matre öni Iesu jë hi: “Jë fe nyipunie, nge ce tro jë së kowe la ketre götrane gaa pë atr, matre tro sa pane mano.”—Mareko 6:30, 31.

Angatr a elë jë ngöne la ketre he, nge ma ka tha nanyi kö Kaperenauma. Itre aposetolo me Iesu a thele la ketre götran gaa pë mej, e koië ne la Hneopegejë Ioridrano, thupei Bethesaida. Ngo ala nyimu la ka öhnyi angatr, me ka drei mejene la ewekë cili. Matre hnene la ka ala nyimu hna xötrëne la ngönegejë, uti hë la götran hnë xepe hnei he.

Nge ame ju hi la Iesu a ut, nyidrëti a utipine ju la ka ala nyim, ke ceitu i angatr me itre mamoe ka pë atre thupën. Nge nyidrëti a nyiqaane “ini angatr la itre ewekë ka nyimutre” göne la Baselaia. (Mareko 6:34) Nge nyidrëti fe a “aloine la itre trene mec.” (Luka 9:11) Ngo nango qea pi hë, öni itretre dreng koi Iesu ka hape: “Tha hna lapane kö la götrane celë, nge kola tro nyimenyime la traem, loi e troa pane upi angatre la kowe la itre traon ka easeny, matre itö a i angatr.”—Mataio 14:15.

Ngo öni Iesu jë hi: “Tha tro kö a upi angatr, ngo thue a i angatre jë pe.” (Mataio 14:16) Atre hë Iesu la hnei nyidrëti hna troa kuca, ngo nyidrëti pe a tupathi Filipo me hape: “Tro sa itö falawa ekaa koi angatr asë la?” Filipo la ka ijije troa sa, ke ka mel angeic ezine Bethesaida. Ngo nyine u la troa itö falawa nge ala 5 000 lao trahmany? Nge e troa e la itre föe me nekönatr, traqa jë kö koi ala 10 000! Matre öni Filipo jë hi: “Maine itö falawa ju së memine la lue hadredre lao drenari, [thupen ne la ca drai ne huliwa] tha ijije kö troa hamë isa ca falawa i angatr.”—Ioane 6:5-7.

Nge öni Anederea jë hi: “The së la ketre nekönatr trahmany, nge hetrenyi nyëne la faifi lao falawa me lue neköi i. Ngo nemene lai nge ala nyimu pe së?”—Ioane 6:9.

Kola traqa la ewekë cili hmekune lo treu maac maine Eiperem, itre hnepe ijine qëmekene la Paseka 32 M.K. Nge ngöne la ijine cili, kola cia lolo la haö. Matre Iesu a upe pi la itretre drei nyidrë troa kuci gurup ne 50 maine 100 lao atr, nge troa alapa angatr hune ihaö. Nyidrëti a xome pi la faifi lao falawa, me lue ie, me olene koi Akötresie. Thupene  lai, nyidrëti a thupa pi la falawa me thawa la ie. Ame hnei Iesu hna hamëne pi koi itretre dreng, nge angatr kowe la ka ala nyim. Nge hnei angatr asë hna isa xeni mej!

Thupene lai, öni Iesu koi itretre dreng: “Hleme hnyawane jë la itre munën, matre tha tro kö a luz.” (Ioane 6:12) Matre hnei angatr hmaca kö hna nyialiene la 12 lao trenge munën!