Tha fene huliwa kö la hnei Iesu hna kuca lo nyidrëti a cainöj e Galilaia. Ngo ame lo Iesu a hape, “Tro fe ni a cainöjëne la itre maca ka lolo ne la Baselaia i Akötresie kowe la itre xa traon,” tha Iesu hmekuje kö a meku Galilaia. Matre nyidrëti a tro ju troa “cainöj e hnine la itre sunago ne Iudra.” (Luka 4:43, 44) Nge aqane kö, ke easë hë e treu Maac maine Eiperem, matre easenyi hë troa feet e Ierusalema.

Hnine la evangelia, hna qaja atrune la itre huliwa i Iesu e Galilaia, hune la itre huliwa i nyidrë e Iudra. Nge ngacama ala nyimu e Iudra la ka tha semesinene la maca i Iesu, ngo tha cile kö nyidrë troa catre cainöj, me kuca la loi ngöne la nöjei jë i nyidrë.

Traqa ha Iesu e Ierusalema, traone ka tru ne la nöje Iudra, troa feetëne la Paseka 31 M.K., Ngöne la götran gaa tru atr ezine la Hnë Lö i Itre Mamoe, hetre hnë si atraqatr hna acili ikapa xötreith, Bethesada la ëjen. Nyimutre la itre ka wezipo, me ka timek, me ka genyi ca ka traqa kowe la hnë sie cili. Pine nemen? Pine laka, itre atr a mekun ka hape, tro hi a aloine la itre trene mec, e tro angatr a lö hnine la tim e kola emuemu.

Drai Sabathi hë, nge hnine la hnë si, Iesu a goeëne la ketre trahmanyi ka wezipo a traqa koi 38 hë lao macatre. Öni Iesu: “Pi tro kö eö a hane egöcatr?” Önine lai atr: “Joxu, pëkö ka hane xomi ni kowe la tim e kola emuemu, nge ame la eni a ketre sipu tro, ketre a thipatrë ni.”—Ioane 5:6, 7.

Iesu a qaja jë la ketre ewekë ka asesëkötrëne lai atr, me nöjei atr ka drei nyidrë. Öni nyidrë: “Mejë jë, nge xome jë la ili i eö, nge tro jë.” (Ioane 5:8) Celë hi hnei angeic hna kuca. Matre ame ju hi la kola aloinyi angeic, hnei angeic hna xome la ili, me nyiqaane tro.

Maine ju, tro la angetre Iudra a ce madrine me angeic, ngo hnei angatre pe hna pi iameköti me hape: “Drai Sabathi la, hmitrötre tro eö a ajöne trongëne la ili eö.” Sa jë hi lai atre ka hape: “Ke hnene lo atre aloinyi ni hna upi ni ka hape: ‘Xome jë la ili i eö, nge tro jë.’ ” (Ioane 5:10, 11) Angatr a iqej ke hna aloine la ketre atr la drai Sabath.

Nge pine laka, angatr a pi atre, öni angatre jë hi: “Drei la ka upi eö troa xome la ili me tro’?” Hnauëne la angatr a hnyinge tun? Ke “lö hë [Iesu] nyipine la ka ala nyim,” nge thatre kö la atre hna aloin la ëje i Iesu. (Ioane 5:12, 13) Ngo e thupen, hnine la uma ne hmi, hnei angeice hmaca hna ixelë me Iesu, me atre la ëjene la atre aloinyi angeic ngöne la hnë si.

Angeic a thele ju lo angetre Iudra ka hnyinge koi angeic. Angeic a qaja ju ka hape, Iesu la ka aloinyi angeic. Matre ame ju hi la angatr a drenge lai, angatr a tro meköti ju koi Iesu. Angatre kö a thele la qaane mene i Iesu? Pëkö. Angatre hi a pi nyi zö i Iesu pine kuca la loi e Sabath, me akötrë nyidrë!