Ala nyimu la itre atr ka traqa troa wai Iesu e Dekapoli, ngöne la götrane koië ne la Hnagejë Ne Galilaia. Angatr a traqa troa drei nyidrë, me aloine la itre meci angatr, nge kola isa ajö trengë kemej.

Ame ju hi la ketre drai, öni Iesu kowe la itretre dreng: “Eni a utipine la ka ala nyim, ke köni drai hë ne angatr a ce me eni, nge pëkö a i angatr. Nge maine tro ni a upi angatr nge ka mecijiin, tro hë angatr a kei e cahu gojeny, nge hetre itre xane pena ka traqa qaa gaa nany.” Matre önine jë hi la itretre dreng ka hape: “A tro së lai a öhne ekaa la itre falawa nyine troa thue a i angatr asë la, nge tha hna lapane kö la götrane celë?”—Mareko 8:2-4.

Sa jë hi Iesu ka hape: “Ije falawa i nyipunie?” Matre öni itretre dreng: “Seven, nge hetre itre neköi ie fe.” (Mataio 15:34) Thupene lai, Iesu a upe pi la ka ala nyimu troa ilapany. Nyidrëti a xome pi la falawa me ie, me thithi koi Akötresie, me hamë itretre dreng troa thawa kowe la ka ala nyim. Nge nyine hain laka, hnei angatr asë hna isa xeni mej. Nge munëne ju pe kö, seven lao trenge munën hna hlem, ngacama hna thuane la 4 000 lao trahmany, me itre föe me nekönatr!

Thupene la Iesu a ase upe la ka ala nyim, nyidrëti me itretre dreng a të jë hune he troa tro Magadala, e kuë ne la Hnagejë Ne Galilaia. E cili, hnene la itre xa Faresaio me itre Sadukaio hna thele troa tupathi Iesu. Angatr a sipo nyidrë troa kuca la ketre iamamanyikeu qaathei Akötresie.

Ngo trotrohnine hi Iesu la aliene la tronge i angatr, matre öni nyidrë: “E hejiheji hë, epuni a qaja ka hape, ‘Goeëne caha hnengödrai kola madra palulu, tro ha loi drai elany. Ngo e hmakanyi hë, epuni a hape, ka troa ngazo la drai, ke goeëne la hnengödrai kola madra palulu nge hetre iaw.’ Atreine hi nyipunie wangatrehmekune la pengöne la hnengödrai, ngo thatreine pe nyipunie wangatrehmekune la itre hatrene la hneijine celë.” (Mataio 16:2, 3) Thupene lai, Iesu a qaja ju kowe la itre Faresaio me Sadukaio ka hape, pëkö xa hatren koi angatr, ngo casi hi, hatrene i Iona.

Thupene lai, Iesu me itretre dreng a elë hmaca jë hune he me tro Bethesaida, götrane kolopi ne la hnagejë. Nge e cahu nyipin, mekune jë hi itretre dreng laka, thëthëhmine hë angatr xomi falawa, ke casi hi. Nge mekune hmaca jë hi Iesu lo ka traqa memine la itre Faresaio me Sadukaio ka sine la parti politik i Herodra, matre nyidrëti a hmekë itretre dreng me hape: “Wange pala kö nyipunie, hmekëne kö la levene ne la itre Faresaio memine la levene i Herodra.” Matre angatr a iqajakeune ka hape, pëkö falawa i angatr. Ngo drenge ju hi  Iesu, matre öni nyidrë: “Hnauëne laka nyipunie a iqajakeune ka hape, pëkö falawa?”—Mareko 8:15-17.

Eue hi lo, hnei Iesu hna thuane la itre thauzan lao atr. Matre maine ju, tro hi a trotrohnine hnei itretre dreng ka hape, tha nyidrëti kö a hnehengazo falawa. Matre öni nyidrë: “Tha mekune hë nyipunie lo eni a thupathupa lo faifi lao falawa kowe la ala 5 000 lao trahmany, nge ije trenge munën lo hnei nyipunieti hna hlem?” Sa jë hi angatr ka hape: “Truelof.” Nge öni Iesu hmaca: “Thëthëhmine fe hë nyipunie lo eni a thupathupa lo sevene lao falawa kowe lo ala 4 000 lao trahmany, nge ije trenge munën ka tru lo hnei nyipunieti hna hlem?” Öni angatr: “Seven.”—Mareko 8:18-20.

Matre Iesu a hnyinge jë ka hape: “A hnauëne laka, tha trotrohnine kö nyipunie ka hape, tha eni kö a qeje falawa? Ngo wange pala kö la leven ne la itre Faresaio me Sadukaio.”—Mataio 16:11.

Haawe, trotrohnine ju hi itretre dreng. Hna huliwane la leven nyine saze la farin me acipane la falawa. Nge e celë, Iesu a xome la leven nyine amamane la ewekë hna thuenyikön. Nyidrëti a hmekë itretre dreng troa thupëne la “itre ini hna hamën hnene la itre Faresaio me itre Sadukaio,” ke itre ini lai ka angazone la atr.—Mataio 16:12.