Tha hlë pala kö la itretre dreng thupene lo wene, nge kolo fe a traqa la ketre ewekë koi angatr. Kola fetra qa ngöne la itre hua la lue trahmanyi hna löth hnei dremoni, nge nyidroti a tro meköti koi Iesu! Casi hi la trahmanyi hna qaja atrun, ke ma ngazo catre la thiina i angeic hune lo ketre, nge ma ekö hë löthi angeic hnei dremoni.

Ka hleuhleu catre la atre cili, nge ka tro pë iheetr. E lai me jidr, angeice pala hi a “sue draië nyipine la itre hua, me hune la itre wetr, me sipu thupathupa la ngönetrei angeice hnei etë.” (Mareko 5:5) Ka ngazo catre la thiina i angeic, matre xou fe itre atr ma tro ezine la hnë kele wezipo. Hnei itre xan hna tupathe troa ceinën la lue im me lue ca i angeic, ngo hnei angeic pala hi hna thöne xecie la itre icein.

Matre ame hë la angeic a easenyi Iesu, angeic a kei ju kowe la lue ca i nyidrë, nge itre dremoni a uku angeic ju troa sue me hape: “Nyipëti a ue e celë, Iesu, Nekö Ne La Akötresie Ka Draië Catr? Sisinyi jë qëmeke i Akötresie ka hape, tha tro kö nyipëti a akötrë ni.” Iesu a amamane jë ka hape, musi kö nyidrë hui itre dremoni, ke öni nyidrë: “He dremoni, lö pi qa lai.”—Mareko 5:7, 8.

Ngo tha ca dremoni kö ka löthe lai atr, ke ame lo Iesu a hnyingën ka hape “Drei la ëje i eö?” Öni angeic: “Legeona, ke ala nyimu hun.” (Mareko 5:9) Ame la itre trongene isi i angetre Roma hna hëne ka hape, Legeona, kola qaja la itre thauzan lao sooc; matre trotrohnine hi së ka hape, nyimu dremoni ka löthe lai atr, me madrine fë la akötre i angeic. Thupene lai, itre dremoni a sipo Iesu matre, “tha tro kö a upi angatr kowe la hnaop ka jui nge ka thatrehmekun.” Eje hi, atre hnyawa hi angatr la pune koi angatr me Satana, tane i angatr.—Luka 8:31.

Tha nanyi kö qaa lai, kola susu trootro la 2 000 lao puaka, itre öni lai ka sis ngöne la Trenge Wathebo, matre hna wathebon koi angetre Iudra troa hetreny. Matre önine la itre dremoni: “Upi huni jë kowe la itro puaka, matre tro huni a löthi nyudren.” (Mareko 5:12) Iesu a helë angatr pi, ame hnei angatre hna  löthe la itro puaka. Matre hnene lo lai 2 000 lao puaka hna sesë qa hune git, me nunucil.

Nge ame ju hi la kola öhne lai hnene la itre ka axö öni, nyinyape pi hi angatr troa iqajakeun ngöne la traon me itre hlapa e trön. Ame hnene la itre atr hna tro ju troa wang. Nge traqa ju hi angatr a öhne lo lai atre hna löth, a ka egöcatr nge lolo hë la mekun. Nge goi heetre fe angeic, nge angeic a nango lapa ezine la lue ca i Iesu.

Qa ngöne lai, hnei itre ka öhn me drei mejene la ewekë ka traqa hna nyiqane xou, ke xou i angatr la hnei Iesu hna atreine kuca. Angatr a iele Iesu jë troa tro qa cili. Ngo ame ju hi la Iesu a elë hune he me tro, hnene lo atr hna löth hna thipi thenge Iesu. Ngo öni nyidrë: “Tro jë pe kowe la hnalapa i hmunë, me lapa i hmunë, nge qaja ju koi angatr la nöjei ewekë hnei Iehova hna kuca koi hmunë, memine la aqane utipi hmunë hnei nyidrë.”—Mareko 5:19.

Hnei Iesu hna majemine wathebone la itre atr hna aloin troa iqajakeun la hnei nyidrë hna kuca. Xele kö nyidrë tro la itre atr a lapaun hnene hi la hna drenge la itre ewekë nyine hain. Ngo tha hna tune kö e celë, ke ame lai atre hna löth, angeice casi hi la ka anyipicine la mene i Iesu, nge ijiji angeic fe troa cainöj kowe la itre atr ka thatre Iesu. Ketre, tro fe angeice lai a apëne la itre ithanata hna amejëne qa ngöne la mec ne la itro puaka. Matre hnei angeic hna tro me cainöj ngöne la Dekapoli la ewekë hnei Iesu hna kuca koi angeic.