Thenge la hni ne la itre atr, isapengöne kö la aqane dreng angatr la itre trengewekë i Iesu, me itre hnei nyidrëti hna kuca. Nge hna mama hnyawa lai ngöne la ketre hnalapa e Galilaia. Hnene la ketre Faresaio, Simona la ëjen, hna hë Iesu troa xen, ma angeic jë a pi atre lo ka kuci iamamanyikeu. Iesu a kapa jë la ihë, ke ijine hi lai tro nyidrë a pane cainöj kowe la itre xa hna hën, tune lo aqane kuca i nyidrë me itre ka hle mani me itre ka kuca la ngazo.

Ngazo pe, tha hna kepe Iesu hnyawa kö. E Palestin, so catr la itre gojeny, matre e trongë ihnadro hë ketre, canga tro hi a idreuth me dro la lue ca i angeic. Matre, hna majemine köle timine la lue ca ne la atre hna hën, nyine hatrene ikep. Ngo tha hna tune kö koi Iesu. Nge goi tha idremi fe me nyidrë, me nei oelene la he i nyidrë tune lo hna majemin. Matre hapeu, nyipi ihë kö lai?

Kola ha nyiqane xen, nge elë hë la itre hna hëne kowe la laulau. Nge ame la angatr a xen, lö juetrë ju hi la ketre föe. Ka “hlemu ngazo [angeic] ngöne la traon.” (Luka 7:37) Eje hi laka, itre atr ka ngazo asë hi la nöjei atr, ngo ame kö angeic, tre ka kuci ngazo, ma ketre föe ne gojeny. Nge maine jë, hnei angeic hna drenge la itre ini qaathei Iesu, ene fe lo ihë i nyidrë koi ‘nöjei atr ka kucakuca me hace, matre tro nyidrë a aegöcatrenyi angatr.’ (Mataio 11:28, 29) Ma hna ketri angeice jë hnene la itre trengewekë i Iesu, me itre hnei nyidrëti hna kuca, celë hi ka upi angeic troa wai nyidrë.

Angeic a tro ju hutrö i Iesu, me sa iwatingöneca qëmekene la lue ca i nyidrë. Nge xölaxöla pi hi la itre trenge timidra i angeic kowe la lue ca i nyidrë, nge angeic a köle ju hnene la ihnaihe angeic. Angeic a dreme ju la lue ca i nyidrë, me köle oel ka pui loi. Simona a elemek, me hape: “Maine ketre perofeta ju la atre celë, tro nyidrëti lai a atre la pengöne la föe ka ketri nyidrë, laka, föe ka kuca la ngazo.”—Luka 7:39.

Atre hi Iesu la aliene hni Simona, matre öni nyidrë: “Simona, hetre ewekë nyine tro ni a qaja koi eö.” Öni angeic: “Öi Joxu, qaja jë!” Öni Iesu: “Hetrenyi la lue atr ka trene gufa kowe la ketre trahmany; matre 500 lao drenari la gufa i ketre, nge 50 i ketre. Nge ame hë la kola thatreine të la gufa hnei nyidro, hnene lo lai trahmanyi hna nue la lue gufa i nyidro. Matre, drei e nyidro la ka troa hnime catrëne lai trahmany?” Simona a sa jë göne hi matre ase pi, öni angeic: “Ma, kolo atr ka tru gufan.”—Luka 7:40-43.

Lolo hi la aqane sa i angeic, matre Iesu a goeëne jë lai föe me hape koi Simona: “Öhne hi eö la föe celë? Hnenge hna lö kowe la hnalapa i eö, ngo tha hane kö eö traqa fë tim göne la lue cang. Ngo hnene pe la föe celë hna köle la lue cang hnene la itre trenge timidra i eahlo, me ipene he i eahlo. Ketre, tha ase kö eö dremi ni, ngo ame la föe celë, qaane ju hi la hawa ne eni a lö, tha mano kö eahlo dreme la lue cang. Ketre mina, tha hane fe kö eö nei oele kowe la heng, ngo hnene la föe celë hna nei oele ka pui lolo kowe la lue cang.” Mama cile hi koi Iesu ka hape, ka nyipi ietra la föe celë. Matre nyidrëti a nyipune jë me hape: “Eni a qaja hnyawa koi eö laka, ngacama ka tru catre la itre ngazo i eahlo, ngo ase hë köletrij asë, ke atraqatre la ihnimi eahlo. Ngo  maine tha tru kö la ngazo hna nu, kolo lai a hape, co hi la ihnim.”—Luka 7:44-47.

Eje hi, tha Iesu kö a kapa la troa kuci ngazo. Nyidrëti pe a utipin me trotrohnine la itre ka kuca la itre ngazo ka tru, nge ka amamane e thupen la nyipi ietra, me thele iakeukawanyi thei nyidrë. Nge drei la kola akeukawane la hni ne la föe celë, la Iesu a hape: “Pë hë ngazo i nyipo . . . Hnene la lapaune i nyipo matre mele hë nyipo, ce tro jë memine la tingeting.”—Luka 7:48, 50.