Enehila, Iesu me itretre drei nyidrë a kolopi thenge troa sasaithe la nöje Galilaia. Nge hmekune la ijine wa wen la itre feja hnine la itre hlapa. Nge pine laka, itretre dreng a mecijiin, angatr a feje jë la itre xa he ne qitr, me ukekëth, me xen. Ngo drai Sabath la drai cili, nge itre Faresaio a thupëne hnyawa la hnei angatre hna kuca.

Eue hi lo, itre xa atre Iudra e Ierusalema a thele troa humuthi Iesu, ke öni angatr, ase hë nyidrë eni wathebo göi Sabath. Nge enehila, itre Faresaio a nyizö itretre dreng pine angatre ukekë qitr. Öni itre Faresaio: “Hanawang! Itretre drei eö a kuca la ketre ewekë hna wathebon e Sabath.”—Mataio 12:2.

Itre Faresaio a catre fë ka hape, ame la kola feje la itre qitr me ukekëth troa xen, tre kolo hi lai a menuë hlapa me lepelepe qitr. (Esodo 34:21) Pine laka, tria catre la aqane waipengöne angatre la huliwa, hace hë koi itre atr la drai Sabath. Ngo ame lo xötrei, hna acile la drai Sabath nyine madrin, me acatrene la lapaun. Matre Iesu a hamëne pi la lue ceitun nyine amekötine la mekuna i angatr, nge matre mama cile pi ka hape, tha celë kö la hnei Iehova hna amekötin göi drai Sabath.

Ame la ketre ceitun hna hamën hnei Iesu, tre ene lo ka traqa koi Dravita me itre atre i angeic. Ame ju hi lo angatr a pi xen, cile ju hi angatr ngöne la uma maano, nge angatr a xeni jë la itre areto nyine amamane koi Akötresie. Itre areto lai hna amë thatraqai itretre huuj hmekuj, ke itre areto hna xome qaathei Iehova, nge hne nyihnan hnei itre hna hnyipi san. Ngo ngöne la drai cili, tha hna jelengazo Dravita kö  me itre atre i angeic.—Levitiko 24:5-9; 1 Samuela 21:1-6.

Ame hnei Iesu hna hamëne la ketre ceitun, öni nyidrë: “Tha hnei nyipunieti kö hna e ngöne la Trenge Wathebo ka hape, ame ngöne la drai Sabath, itretre huuj a huliwa hnine la uma ne hmi nge tha hna jelengazo angatre kö?” Ngöne la Sabath, itre atre huuj a humu öni nyine tro fë huuj, me kuca la itre xa huliwa hnine la uma ne hmi. Öni Iesu jë hi: “Ngo eni a qaja hnyawa koi nyipunie, hetre atr ka sisitria catre kö hune la uma ne hmi.”—Mataio 12:5, 6; Numera 28:9.

Iesu a qaja hmaca jë la itre hna Cinyihan, öni nyidrë: “Maine trotrohnine hnyawa ju nyipunie lo hna hape, ‘Ka tru koi ni la utipin hune la huuj,’ tha tro kö nyipunie a jelengazone la ka pë engazon.” Nyidrëti a nyipune me hape: “Ke Nekö i atr, la Joxu ne la Sabath.” Iesu hi lai a qaja la mus i nyidrë ka troa traqa, mus ka tingeting nge ka ca hadredre lao macatre.—Mataio 12:7, 8; Hosea 6:6.

Ekö hë Satana akötrë itre atr me thahluë angatr hnene la aqane musi angeic, musi ka iakötrë, nge ka isi catr. Iananyi catre lai memine la Sabath atraqatr, ijine musi Keriso, atre axapone la itre hni së!