Traqa ha Iesu me itretre dreng e Bethesaida. Itre atr a tro fë koi nyidrë la trahmany ka timek, nge angatr a sipo Iesu troa ketr lai atr matre aloin.

Iesu a ea jë la wanakoime i angeic, me tro sai angeic tröne la traon. Thupene la nyidrëti a ase hnyiju kowe la alamekene lai atr, öni nyidrë: “Hetre ewekë kö hnei hmunë hna öhn?” Sa jë hi lai atr ka hape: “Eni a öhne la itre atr, kösë itre sinöe a tro.” (Mareko 8:23, 24) Thupene lai, Iesu a atë ju la lue ime i nyidrë hune la luemeke ne lai atr, nge goe hnyawa pi hi angeic. Nyidrëti a upi angeice jë koi hnalapa, me wathebo angeic troa lö kowe la traon.

Thupene lai, Iesu me itretre dreng a tro ju e kolopi, e Kaisaria Filipi. Ketre traon ka cil ngöne la gaa draië, ke hna xup ej a 350 m hune la hnagejë. Nge e troa xei e kolopi nge koië, kola cile la wetre Heremona ka si kiona. Matre traqa jë kö koi ije drai qëmekene tro angatr a traqa e cili, ke tro angatr a pane elëne la 40 km.

Ngöne gojeny, Iesu a pane ananyi angatr troa thith, ke naen maine treen pe hi lao treu qëmekene tro nyidrëti a mec, nge nyidrëti a sikusikune la itretre dreng. Eue hi lo, ala nyimu la itretre dreng ka trotriji nyidrë, nge itre xan a luelu me hnying. Ma tha trotrohnine kö angatr hnauëne la Iesu a xel ma joxu, me xel ma kuci iamamanyikeu troa amamai nyidrë.

Matre ame hë la itretre dreng a traqa kowe la götran hnei Iesu hna thith, öni nyidrë: “Ame kowe la itre atr, ke, drei la Nekö i Atr?” Öni angatr: “Hnei itre xan hna qaja ka hape, Ioane Bapataiso, öni itre xan, Elia, nge itre xan, Ieremia, maine ketre perofeta hi.” Eje hi, itre atr a mekune laka, Iesu la ketre hna amelene hmaca. Ngo aja i Iesu troa atre la mekuna i angatr, matre öni nyidrë: “Ngo drei ni koi nyipunie?” Canga sa jë hi Peteru ka hape: “Nyipëti hi la Keriso, Neköne la Akötresie ka ej.”—Mataio 16:13-16.

Iesu a qaja jë koi Peteru ka hape, loi e tro angeic a madrin, ke Akötresie a amamane lai koi angeic. Nge öni nyidrëti fe: “Eni hi a qaja hnyawa koi eö ka hape, eö la Peteru, nge hune la etë ka catre celë, tro ni a acile la ekalesiang, nge tha tro kö a mene la hua hune ej.” Iesu hi lai a qaja ka hape, qanyi nyidrëti kö acile la ekalesia, nge e tro la itre atren a mele nyipici e celë fen, tha tro kö a cipa angatr hnei hua. Nge nyidrëti a sisinyi jë koi Peteru ka hape: “Tro ni a hamë eö la itre kii ne la Baselaia ne hnengödrai.”—Mataio 16:18, 19.

Tha Iesu kö a acili Peteru hune la itre xa aposetolo, maine huliwa angeic nyine trepene la ekalesia. Iesu hmekuje hi la Etë ka nyitrepene la ekalesia hna troa acil. (1 Korinito 3:11; Efeso 2:20) Ngo eje hi laka, tro Peteru a kapa la köni kii. Nge tro angeic a madrine troa fe gojenyine  la itre atr ka isa pengön, kowe la Baselaia ne hnengödrai.

Tro Peteru a huliwane la pane kii ngöne la Penetekos 33 M.K., ene la troa amaman koi itretre Iudra ka ietra me itre ka sine la hmi i angatr, la nyine kuca matre mel. Nge tro angeic a huliwan la hnaaluen, göi troa aijijë angetre Samaria ka lapaun troa lö kowe la Baselaia i Akötresie. Nge e 36 M.K., tro Peteru a huliwane la hnaakönin, nyine fe gojenyine la itre atre ne fen hna tha xötrehatren, tui Konelio me itre xan.—Itre Huliwa 2:37, 38; 8:14-17; 10:44-48.

Iesu pala kö a ithanata, nge jole hë la mekuna ne la itretre dreng, ke nyidrëti a qaja la itre akötr me mec hnei nyidrëti hna troa melën e Ierusalema. Nge pine laka, tha trotrohnine kö angatr ka hape, troa amele Iesu hmaca e hnengödrai, hnei Peteru hna xom aconyi nyidrë, me nango ameköti nyidrë me hape: “Waea Joxu, the nue nyipëti kö troa akötr. Tha tro kö a traqa lai koi nyipë!” Ngo Iesu a thingetrö Peteru me hape: “Eö e hutröng Satana! Eö a pi sewe ni, ke tha eö kö a mekune la itre mekuna i Akötresie, ngo mekuna i atre pe.”—Mataio 16:22, 23.

Iesu a hëne jë la ka ala nyim me itre aposetolo, me qaja ka hape, tha ka hmaloi kö troa ketre atre drei nyidrë. Öni nyidrë: “Maine tro la ketre atr a pi xötrethenge ni, loi e tro angeic a pane xele angeice kö, me ajöne la sinöe ne iaxösisi i angeic, me xötrethenge ni fë o drai pala hi. Nge ame la atre thele troa amele angeice kö, tre tro ha luzi la mele i angeic, ngo ame la atr nue la mele i angeic pi ni, me pine la maca ka loi, tro hë angeic a mel.”—Mareko 8:34, 35.

Eje hi, maine aja ne la itretre drei Iesu troa amadrinë nyidrë, nyipiewekë tro angatr a catr me atreine nu asë. Öni Iesu: “Maine tro la ketre a hmahma e eni me itre trengewekëng ngöne la xötre ka tha nyipici celë nge ka ngazo, tro fe hë la Nekö i atr a hmahma e nyën la angeic a traqa ngöne la men ne la Keme i angeic, ce me itre angela ka hmitrötr.” (Mareko 8:38) Nge e tro Iesu a traqa, tro nyidrëti a “nyithupen kowe la itre atr, thenge la isa thiina i angatr.”—Mataio 16:27.