Thupene la Gaberiela angela a ase qaja kowe la nekö jajiny ka hape, tro angeic a hnahone la nekönatr trahmany me ati ëje i nyën Iesu, nge tro hë nyën a Joxu epine palua, öni Maria: “Ngo tro lai a traqa tune kaa, ke tha ka ce meköle pala kö ni me trahmany?”—Luka 1:34.

Sa jë hi Gaberiela ka hape: “Tro la uati hmitrötr a lapa hui eö, nge tro la men ne la Akötresie Ka Draië Catr a hakuthi eö. Celë hi matre, troa hëne la atr hna hnahon ka hape, hmitrötr, Nekö i Akötresie.”—Luka 1:35.

Gaberiela a qaja hmaca jë la ketre ewekë, ma göi troa xatua Maria troa kapa la maca hnei angeic hna tro fë. Öni angeic: “Nge goeën! Upune hë Elisabeth, sinee i eö, nge sikisi hë lao treu i eahlo. Tro eahlo a hnahone la ketre nekönatr trahmany, ngacama qatre föe hë eahlo, nge hna hë eahlo lo ka hape, ka tha hnaho. Ke pëkö ketre ewekë hna thatreine kuca hnei Akötresie.”—Luka 1:36, 37.

Kapa ju hi Maria la maca i Gaberiela, ke öni angeic: “Hanawang! Hlue i Iehova ni! Epi traqa koi ni thenge la hnei nyipëti hna qaja.”—Luka 1:38.

Tro hmaca pi hi Gaberiela, nge Maria a hnëkë troa wai Elisabeth! Eahlo a mele me Zakaria föi eahlo ezine Ierusalema, ngöne la itre wetr ne Iudra. Ma troa könitre maine foa lao drai ne tro hnei Maria.

Traqa ha Maria thei Zakaria. Ame ju hi la angeic a lö, angeic a ibozu jë me Elisabeth, trejin me angeic. Nge tiqa ju hi Elisabeth hnei uati hmitrötr, matre öni eahlo jë hi koi Maria: “Manathithi hë eö hune la nöjei föe asë, nge manathithi la nekönatr hnei eö hna troa hnahon. Nge nemene ni matre troa kapa la manathithi celë, laka, kola wai ni hnene la thine ne la Joxung? Ke hanawang! Ame la kola traqa kowe la lue hnangenyënge la ibozu i eö, hnene la nekönatr hna enij madrine e kuhu hning.”—Luka 1:42-44.

Öni Maria jë hi cememine la hni ka ipië: “Eni a atrunyi Iehova, nge ka madrine pala hi la hninge göi Akötresie, Atre amele ni. Ke hnei nyidrëti hna goeëne la nekö jajiny, hlue i nyidrë, ka pë pengön. Nge hanawang! Qaane enehila nge ngöne la itre xötr epin, tro ha qeje ni ka hape, ka madrin, ke hnene la Trene Men Ka Sisitria hna kuca la itre ewekë ka tru thatraqai ni.” Eje hi, tha jole kö koi së troa wange laka, ngacama manathithi ka tru la hna kapa hnei Maria, ngo Akötresieti casi hi la hnei angeice hna atrun. Öni angeice hmaca kö, “hmitrötre la ëje i nyidrë. Nge ngöne la nöjei xötr atr asë, tro ha eje la utipine i nyidrë kowe la itre ka xoue nyidrë.”—Luka 1:46-50.

Maria pala hi a atrunyi Akötresie me hape: “Hnei nyidrëti hna kuca la itre huliwa ka men hnene la ime i nyidrë, me isa ijene la itre ka pi tru fë mekun e kuhu itre hni angatr. Nyidrëti fe a thaipiëne la itre atr ka mus qa hune la therone i angatr, me adraiëne la itre ka ipië. Nyidrëti a amejine la itre ka mecijiin hnei itre ewekë ka lolo, ngo hna cipane pë hë kowe la itre trenamo, me helë angatr. Hnei nyidrëti hna xatua Isaraela, hlue i nyidrë, me anyipicine laka, mekune pala kö nyidrë lo hnei nyidrëti hna qaja, ene la troa hetre utipin epine palua.”—Luka 1:51-55.

Köni treu ne pane ce lapa Maria me Elisabeth, ma göi tro jë a xatua eahlo ngöne la itre wiik tixenuë ne lapa fë upune. Ka mingöminge catr la troa wange la lue föe cili ka lapaun, lue ka upune jëne Akötresie, a kola itö ixatua ngöne la ijine ka tru ne la mele i nyidro!

Nge pane mekune jë la aqane atrunyi Iesu qëmekene troa hnaho nyidrë. Hnei Elisabeth hna hë nyidrë “Joxung,” nge hnene la nekönatr hnine  la hni eahlo hna “enij madrin” la kola fetra hnei Maria. Ngo tro pe sa ce wange laka, aqane ujë lai ka nanyi catr memine la aqane tro la itre atr epin a ujë koi Maria me nekö i angeic.