Semidrine hë lao macatre, thupene lo Iesu a hnyinge kowe la itre atre ini hnine la uma ne hmi. Kola ha xejë la 29 M.K. Ala nyimu la itre ka qeje Ioane, lo trejin me Iesu, ke ase së hë angeice cainöj ngöne la götrane kuë ne la Hneopegejë Ioridrano.

Ka ketre pengöne Ioane pine la aqane heetre me ithanata i angeic. Hna kuca la itre iheetre i angeic hnei pene kamela, nge hna sile la gö i angeic hnene la beletr hna kuca hnei kupeine öni. Ketre, angeic a öni sipa me iji miel ne hnitr. Nemene la maca hnei angeic hna tro fë? “Ietra ju, ke, calemi hë la Baselaia ne hnengödrai.”—Mataio 3:2.

Ame la maca hnei Ioane hna tro fë, ej a thue madrinene la itre ka traqa troa drei angeic. Matre ala nyimu la itre ka trotrohnine la enyipiewekëne troa ietra, ene la tro saze thiina me aqane mel, me nuetrije lo mele hnapan, kösë itre ewekë ka sis. Ame la itre ka traqa koi angeic, tre itre atre “Ierusalema, me angetre Iudra asë, me itre götrane nöje xötreith e Ioridrano.” (Mataio 3:5) Ala nyimu la itre ka ietra me ka traqa koi Ioane. Angeic a bapataiso angatre jë, ene la hna heti angatr hnine la Hneopegejë Ioridrano. Pine nemen?

Angeic a bapataisone la itre atr nyine nyihatren, maine nyine anyipicine ka hape, angatr a nyipi ietrane lo aqane ngazo i angatr kowe la isisinyikeu i Akötresie, ene lo isisinyikeu ne la Wathebo. (Itre Huliwa 19:4) Ngo tha angatr asë kö la itre ka ijije troa kapa la hatrene cili. Ke ame lo kola traqa koi angeic hnei itre hene ne hmi, me itre Faresaio, me itre Sadukaio, hnei Ioane hna hë angatr ka hape, “une hna mecin.” Öni angeic hmaca: “Wa wene jë pe matre amamane la ietra i nyipunie. Nge the mekune kö troa qaja e kuhu itre hni nyipunie, ka hape, ‘Aberahama la keme hun.’ Ke, eni a qaja koi nyipunie ka hape, atreine hi Akötresie nyi matra i Aberahama qa ngöne la itre etë celë. Të hë la ze hune la iwaan ne la itre sinöe. Matre ame la nöjei sinöe ka tha wa loi, tre tro ha satrij, me kuiëne kowe la eë.”—Mataio 3:7-10.

Nge pine laka, itre atr a drei Ioane, nge ka mene la maca hnei angeic hna tro fë, nge angeic fe a bapataisone la ka ala nyim, matre hnei itretre huuj me angetre Levi hna iup troa hnyingë angeic ka hape: “Drei eö?”

Sa jë hi Ioane ka hape, “Tha Keriso kö ni.”

Matre öni angatr, “Nga drei kö eö? Elia?”

Öni angeic: “Waea.”

Matre angatr a hnyinge hmaca jë ka hape: “Nga ketre perofeta hö eö?” Angatr a hnyinge tun, ke angatr a pi atre ka hape, ma angeice jë kö lo perofeta ka tru hnei Mose hna qaja.—Deuteronomi 18:15, 18.

Öni Ioane, “Waea!”

Angatr a nyiqaane iele Ioane jë me hape: “Nga drei kö eö? Pane qaja jë koi hun, matre atreine huni sa kowe la itre ka upi hun. Nge ame koi eö, ke drei eö?” Öni Ioane: “Eni hi la aqane ewekë ne la atre hë ngöne la hnapapa, kola hape: ‘Amekötine jë la jë i Iehova,’ tune lo hna qaja ha hnei Isaia perofeta.”—Ioane 1:19-23.

Öni angatre jë hi, “Nga hnauëne kö laka, eö a bapataisone la itre atr nge tha Keriso pe eö, maine Elia, maine ketre Perofeta hi?” Ka tru aliene la aqane sa i Ioane, öni angeic: “Eni a bapataiso hnei tim. Ngo hetre ketre atr nyipi nyipunie, hnei nyipunieti hna thatre, nge ka troa traqa thupeng.”—Ioane 1:25-27.

Atre hi Ioane ka hape, angeic a hnëkë gojeny, ene la troa xatuane la itre atr troa ajane la Mesia, lo hna troa acili Joxun. Öni Ioane göi nyidrë  ka hape: “Ame la atre traqa thupeng, tre, ka draië kö hung. Nge tha ijijinge kö troa senge la lue ibutre i nyidrë.” (Mataio 3:11) Ioane a qaja hmaca jë ka hape: “Tro ha draië kö hung la atre traqa thupeng, ke pa i nyidrëti kö mel.”—Ioane 1:15.

Haawe, ka ihmeku hnyawa lai memine la maca hna tro fë hnei Ioane ka hape, “Ietra ju, ke, calemi hë la Baselaia ne hnengödrai.” (Mataio 3:2) Kolo hi lai a qaja koi nöjei atr ka hape, easenyi hë matre xejë jë la huliwa ne la Joxu hnei Iehova hna troa acil, ene Iesu Keriso.