Iesu a tru e Nazareta, traon ka co nge ka tha hlemu. Ej ngöne la götrane kolopi e Iudra, ngöne la itre wetr ne Galilaia, nge ngöne la götrane kuë ne la hneopegejë ka tru hna hëne ka hape, Hnagejë Ne Galilaia.

Hnei Iosefa me Maria me Iesu hna fek qa Aigupito, ma kolo petre hi a lue macatre Iesu. Nge ame ngöne la ijine cili, kola mekune laka, nyëne casi hi la nekö i nyidro. Ngo e thupen, hna hnahone la itre xa trejin me Iesu, ene Iakobo, me Iosefa, me Simeona, me Iudra. Hnei Iosefa me Maria hna hnahone fe la itre jajiny, itre xa i Iesu. Matre sikisi lao jini Iesu.

Ngo hetre itre xa fami i Iesu. Atre hë së lo lue xan, Elisabeth me nekö i eahlo Ioane. Nanyi catre la hnalapa i nyidro, ke nyidroti a lapa ngöne la götrane kolojë ne Iudra. Ngo hetre ka lapa easeny, e Galilaia, ene Salome. Kola mekune laka, jini Maria angeic, matre angeice fe la ketre thine i Iesu. Hnei angeic hna ikötresai me Zebedaio, nge lue nekö i nyidro, ene Iakobo me Ioane, matre nyidro la lue xa trejin me Iesu. Thatre kö së ka hape, hnei Iesu jë kö hna ce mel me nyidro lo angatr a co, ngo ame pe, xecie hnyawa koi së laka, hnei angatr hna ce mel me ce huliwa, lo nyidroti a aposetolo i Iesu.

Haawe, kökötre catre hë la fami Iosefa, matre nyipiewekë tro angeic a catr huliwa. Angeice la ketre atre tratrau sinöe. Nge pine laka,  hnei Iosefa hna hetru Iesu kösë sipu nekö i angeic, hna hë Iesu pë hë ka hape, ‘neköne la atre tratrau sinöe.’ (Mataio 13:55) Hnei Iosefa hna ini Iesu la huliwa i angeic, matre ka maca hnyawa Iesu. Eje hi, hnei itre atre pë hë hna qeje Iesu ka hape: “Angeice hi lo ka tratrau sinöe.”—Mareko 6:3.

Hmi koi Iehova la ewekë ka tru ngöne la mele ne la fami Iosefa. Thenge lo hna amekötin hnene la Trenge Wathebo i Akötresie, tha mano kö qeje Akötresie hnei Iosefa me Maria kowe la itre nekö i nyidro, ‘ngöne la angatr a lapa hnalapa, me tro e cahu gojeny, me ngöne la angatr a meköl me hlë.’ (Deuteronomi 6:6-9) Ketre, hetre sunago e Nazareta, matre tha jole kö koi së troa mekune laka, hnei Iosefa hna majemine xome la hnepe lapa i angeic troa hmi e cili. E thupen, hna qaja pë hë göi Iesu ka hape, “tune lo hnei nyidrëti hna majemine e drai Sabath,” nyidrëti a lö hnine la sunago. (Luka 4:16) Nge madrine catr la fami celë troa anyimua tro e Ierusalema kowe la uma ne hmi i Iehova.