Thupene la sikisi lao treu ne cainöjë Iesu hnei Ioane Bapataiso, traqa pi hi nyidrë koi Ioane ngöne la Hneopegejë Ioridrano, nge 30 hë lao macatre i Iesu. Hnauëne la nyidrëti a wai Ioane? Tha göi tro kö a wai angeic, me hnyingëne la huliwa i Ioane. Nyidrëti pe a traqa troa bapataiso nyidrë.

Trotrohnine hi së la kepin matre sa jë Ioane ka hape: “Eni la hnei nyipë hna troa bapataison, nge nyipëti pena ha a traqa koi ni?” (Mataio 3:14) Atre hi Ioane ka hape, Iesu la nekö hnimina i Akötresie. Ma angeice jë a mekune lo angeic a enienije madrin ngöne la hni i Elisabeth, lo Maria a wai thine i angeic, nge kola upune Iesu. Tha luelue kö së laka, Elisabeth la ka porotrikëne lai koi Ioane. Nge ma drenge hë angeic lo hna qaja hnei Gaberiela koi Maria, me ijine mama la itre angela koi itretre thupë öni.

Ketre, atre hi Ioane ka hape, ame la bapataiso hnei angeic hna kuca, tre göi itre ka ietrane la ngazo. Ngo eje hi laka, pë fe kö ngazo i Iesu. Matre, ngacama Ioane a qeje jol, ngo Iesu a iele angeic me hape: “Enehila ju hi, ke, celë hi aqane troa eatrën asë la itre ewekë ka meköt.”—Mataio 3:15.

Pine nemen matre loi e troa bapataiso Iesu? Tha göne kö troa ietra, ngo nyine tro pe a anyipicine laka, ase hë nyidrëti mekun troa kuca la aja ne la Keme i nyidrë. (Heberu 10:5-7) Ke atre tratrau sinöe Iesu, ngo enehila, ijine hë tro nyidrëti a xejë la huliwa i Keme i nyidrë e hnengödrai. Ngo ame koi eö, Ioane kö a treqene la ketre hatren la kola bapataiso Iesu?

Hnei Ioane e thupen hna qaja ka hape: “Önine la Atre upi ni troa bapataiso hnei tim ka hape: ‘E öhne hë eö la uati a kola uti me lapa thene la ketre atr, nyëne hi la ka troa bapataiso hnei uati hmitrötr.’ ” (Ioane 1:33) Haawe, Ioane a treqene tro la uati hmitrötre i Akötresie a uti kowe la ketre atr hnei angeic hna troa bapataison. Matre, ame ju hi la Iesu a elë qa ngöne tim, tha sesëkötre kö Ioane troa öhne “la  uati Akötresie, [a] kola uti kösë piny, me traqa hui [Iesu].”—Mataio 3:16.

Ngo hetre ketre hatren. ‘Hna fe la hnengödrai’ koi nyidrë. Kola hapeue lai? Kola hape, ame ju hi la Iesu a xomi bapataiso, mekune hmaca jë hi nyidrë lo mele i nyidrë e hnengödrai. Haawe, Iesu hmaca ha mekune lo nyidrëti a ketre u, ketre nekö i Iehova, memine lo itre nyipici hnei Akötresie hna ini nyidrë.

Nge ame la kola bapataiso Iesu, mexeme pi hi la aqane ewekë e hnengödrai, kola hape: “Nekönge hniminange lai, eni a madri nyën.” (Mataio 3:17) Drei la ka ewekë? Tha Iesu kö; ke ce nyidrëti me Ioane. Akötresie la ka ithanata. Haawe, Iesu la Nekö i Akötresie, ngo tha Akötresieti kö nyidrë.

Pane mekune jë, ngacama ketre atr Iesu, ngo nyidrëti la nekö i Akötresie, tui Adramu lo pane atr. Thupene la hna pane qejepengöne lo bapataiso i Iesu, hnei Luka, lo atre drei Iesu, hna cinyihan ka hape: “Ame hë la Iesu a nyiqaane xejë la huliwa i nyidrë, tre kola 30 lao macatre i nyidrë, nge kola mekune laka, nyidrëti la nekö i Iosefa, nekö i Heli, . . . nekö i Dravita, . . . nekö i Aberahama, . . . nekö i Noa, . . . nekö i Adramu, nekö i Akötresie.”—Luka 3:23-38.

Tui Adramu, Iesu fe la “nekö i Akötresie” ngacama ketre atr nyidrë. Matre, qaane lo kola bapataiso Iesu, ketre pengöne ju hi la aqane imelekeu i nyidrë me Akötresie, ke nekö i Akötresieti hë nyidrë. Haawe, ijiji Iesu hë troa inine la itre atr la itre nyipici qaathei Akötresie, me amamane koi angatr la jë ne mel. Iesu hi lai a xejë la ketre iwaja ka troa xomi nyidrë kowe la mec. Tro nyidrë a nyi huuj thatraqai nöjei atr ka tha pexeje kö.