Thupene la faipoipo e Kana, hnei Iesu hna tro e Kaperenauma. Ce Iesu me thine i nyidrë me itre jini nyidrë, ene Iakobo, me Iosefa, me Simeona, me Iudra.

Hnauëne la Iesu a tro Kaperenauma? Ketre traone lai ka tru hui Nazareta me Kana, nge hnë itrony hnei itre atr. Nge nyimutre la itretre drei Iesu ka mel ezine Kaperenauma. Qa ngöne lai, ijiji Iesu troa ini angatr ngöne la zi i angatr.

Ngöne lo Iesu e Kaperenauma, hnei nyidrë hna kuca la itre huliwa nyine hain. Matre ala nyimu la itre atr ka drei mejen. Ngo easenyi hë tro Iesu me itre sinatronge i nyidrë, itre atre Iudra ka nyipici, a elë Ierusalema troa feetëne la Paseka 30 M.K.

Ngo ame hë la angatr e hnine la uma ne hmi e Ierusalema, hnei angatr hna öhne la ketre thiina i Iesu.

Hnene lo Trenge Wathebo i Akötresie hna amekötin koi angetre Isaraela troa huujë öni hnine la uma ne hmi. Nge ame koi itre ka traqa qa gaa nany, nyipiewekë tro angatr a itö xen ngöne la ijine angatr e Ierusalema. Matre hnene la trenge wathebo hna aijijëne troa itö öni e Ierusalema, “maine kau, maine mamoe, maine [nani],” me itre xa ka nyipiewekë. (Deuteronomi 14:24-26) Qa ngöne lai, hnene la itre ka salem e Ierusalema, hna salemë öni me waco, ngöne la götrane gaa pë ihakun nge ka tru ne la uma ne hmi. Itre xan a qenatrekënö, me hën atrune la thupene la itre öni.

Matre elëhni jë hi Iesu, nge nyidrëti a trije pi la itre piesi ne la itre ka saze mani, me kapasaitrëne la itre laulau me itre cea i angatr, ame hnei nyidrëti hna helë angatr. Öni Iesu: “Xome pi qa la la itre ewekë celë! Nge loi ju hë hnei epuni hna xome la uma i Kaka nyine uma ne Salem!”—Ioane 2:16.

Ame ju hi la kola öhne lai hnei itretre drei nyidrë, mekune hmaca jë hi angatre lo hna perofetan göne la Nekö i Akötresie, kola hape: “Tro la ajang kowe la hnalapa i nyipë a mel e kuhu hning kösë eë.” Ngo önine jë hi la angetre Iudra ka hape: “Kuca jë la ketre iamamanyikeu nyine anyipicine ka hape, ijiji eö kö troa kuca la itre ewekë cili?” Sa jë hi Iesu ka hape: “Thëtrije pi la uma ne hmi, nge tro ni a acili eje hmaca ngöne la hnaakönine drai.”—Ioane 2:17-19; Salamo 69:9.

Angetre Iudra a mekune ka hape, Iesu a qaja lo uma ne hmi e Ierusalema, matre öni angatr: “Traqa koi 46 lao macatre ne kola xupe la uma ne hmi celë, nge tro pe kö eö a acil eje hmaca ngöne la köni drai hi?” (Ioane 2:20) Ngo Iesu pe e celë a qaja la ngönetrei nyidrë, me aceitunën me uma ne hmi. Matre köni macatre thupen, hnei itretre dreng hna mekune la itre trengewekë celë, lo kola amele nyidrëti hmaca.