Thupene ju hi la kola ase bapataiso Iesu hnei Ioane, hnene la ua i Akötresie hna troxomi Iesu kowe la hnapapa ne Iudra. Nyimu ewekë nyine tro Iesu a pane mekun, ke ame lo kola bapataiso nyidrë, hna “fe pi [ . . . ] la hnengödrai.” (Mataio 3:16) Ijine tro nyidrëti a mekune hmaca lo itre ewekë hna inin, me kuca e hnengödrai. Eje hi, nyimu ewekë nyine tro nyidrëti a pane mekun!

Hnei Iesu hna lapa 40 lao drai me 40 lao jidr ngöne la hnapapa. Nge goi tha xeni fe nyidrë ngöne la ijine cili. Matre ame ju hi la Iesu a meci hnei pi xen, traqa pi hi Satana Diabolo troa tupathi nyidrë, öni angeic: “Maine nekö i Akötresieti nyipë, qaja ju kowe la itre etë celë troa nyi falawa.” (Mataio 4:3) Ngo atre hi Iesu ka hape, tha meköti kö troa huliwane la mene i nyidrë thatraqai nyidrë, matre tha kei thenge kö nyidrë.

Ngo tha cile kö Diabolo, hnei angeic hmaca hna thelejën troa tupathi Iesu. Hnei angeic hna upi Iesu troa sesë qa hune la gaa draië ne la uma ne hmi. Ngo tha pi mama fë mene kö Iesu. Hnei nyidrëti pe hna qaja la Itre Hna Cinyihan, me amamane ka hape, ka ngazo la troa tupathi Akötresie tune lai.

Thupene lai, hnei Diabolo hna kuca la hnaakönine itupath, thatre kö së la aqane kuca i angeic, ngo hnei angeice pe hna amamai nyidrë “la nöjei baselaia ne la fen memine la lolo ne itre ej,” me hape: “Tro ni a hamë nyipë la nöjei ewekë celë e tro nyipë a sa iwatingöneca, me thili koi ni.” Ngo catre hmaca kö la aqane xele i Iesu, matre öni nyidrë: “Tro pi Satana!” (Mataio 4:8-10) Tha hnei Iesu kö hna kei kowe la itupath, ke atre hi nyidrë ka hape, Iehova casi hi la nyine troa nyihluen. Eje hi, hnei nyidrëti hna iën troa nyipici koi Akötresie.

Hetre ini nyine tro sa xom qa ngöne la itre itupathi cili, me qa ngöne la aqane sa i Iesu. Eje hi, ka mele Diabolo, ngo thatreine kö së öhnyi angeic. Nge kolo fe a amaman laka, ewekë i Satana la nöjei musi ne fen, nge angeic a musi kow. Ke maine tha eje ju, tha tro kö a ketre itupathe koi Iesu.

Ketre, hnei Diabolo hna qaja ka hape, atreine hi angeic nyithupene koi Iesu e tro nyidrëti a aca thili koi angeic, ene la troa hamë Iesu la nöjei baselaia ne fen. Ketre tun, tro fe Diabolo a hane tupathi së, ma tro angeic a amë qëmeke së la itre jëne troa trene mani, maine troa mus, maine hlemu pena. Ngo tro hë sa inamacan e tro sa xötrethenge la tulu i Iesu, ene la troa nyipici koi Akötresie, ngacama traqa ju hë la nöjei pengöne itupath! Ngo the thëthëhmine kö laka, hnei Diabolo hna nue Iesu, “me thele ijine troa tupathi nyidrëti hmaca.” (Luka 4:13) Ma tro fe a hane traqa koi së, haawe, epi tro pala hi sa hmek.