Thupene la 40 lao drai hnine la hnapapa, nge qëmekene tro nyidrë a bëek e Galilaia, hnei Iesu hna pane jea koi Ioane, lo atre bapataiso nyidrë. Matre ame la Iesu a easenyi angeic, öni Ioane koi itre ka ce me angeic ka hape: “Hanawange la Neköi Mamoe i Akötresie, atre apatrene la ngazo ne la fen! Nyidrëti hi lo hnenge hna qaja ka hape, ‘Tro ha draië kö hung la atre traqa thupeng, ke pa i nyidrëti kö mel.’ ” (Ioane 1:29, 30) Ngacama nango tru kö Ioane hui Iesu, ngo atrehmekune hi angeic ka hape, pa i Iesu kö mel e hnengödrai.

Itre wiik qëmekene lai, lo kola traqa hnei Iesu troa bapataiso, tha nyipi mama kö koi Ioane ka hape, Iesu la Mesia. Öni angeic: “Goi thatre fe ni la atre cili, ngo ame la kepin matre bapataisone jë ni la atr ngöne la tim, tre matre troa atre nyidrë e Isaraela.”—Ioane 1:31.

Ame hnei Ioane hna nyiqaane qejepengön koi itre ka dreng la ewekë ka traqa lo angeic a bapataiso Iesu, öni angeic: “Hnenge hna öhne la ua a kola uti qa hnengödrai kösë piny, nge ej e hui nyidrë. Nge ngacama thatre kö ni la atre cili, ngo önine la Atre upi ni troa bapataiso hnei tim ka hape: ‘E öhne hë eö la uati a kola uti me lapa thene la ketre atr, nyëne hi la ka troa bapataiso hnei uati hmitrötr.’ Nge öhne hë ni lai, matre eni a anyipicine ka hape, nyidrëti hi la Nekö i Akötresie.”—Ioane 1:32-34.

Ngöne la drai thupen, ce Ioane me lue atre drei angeic, lo kola easenyi angeice hmaca hnei Iesu. Öni Ioane jë hi: “Hanawange la Neköi Mamoe i Akötresie!” (Ioane 1:36) Ame hnene la lue atre drei Ioane Bapataiso hna xötrethenge Iesu. Anederea la ketre, nge Ioane la ketre, ma angeice hi la atre qejepengöne la ijine cili. Nge kola mekune laka, ketre trejin me Iesu lae Ioane, ke nekö i Salome angeic, lo jini Maria, nge ame la ëjene la föi Salome tre, Zebedaio.

Matre ame la Iesu a xei me öhnyi Anederea me Ioane a ixötrethenge, öni nyidrë: “Nemene la hnei epon hna thel?”

Nyidroti a hnyinge jë ka hape: “Rabi, nyipëti a lapa ekaa?”

Sa jë hi Iesu ka hape: “Jë fe, matre öhne jë kö epon.”—Ioane 1:37-39.

Ma 4:00 e hnaipajö hë, matre hnei Anederea pë hë me Ioane hna afenesine la drai me Iesu. Nge pine laka, atraqatre la trenge madrine i Anederea, hnei angeic hna thele Simeona trejin me angeic, lo hna hëne fe ka hape, Peteru. Öni angeic: “Öhne hë nyio la Mesia.” (Ioane 1:41) Ame hnei Anederea hna tro sai Peteru koi Iesu. Itre hna melën e thupen a anyipicine laka, hnei Ioane hna hane fe kuca tun me Iakobo, trejin me angeic, me tro sai Iakobo koi Iesu; ngo tha qaja pi kö Ioane la aqane kuca i angeic.

 Ngöne la drai thupen, hnei Iesu hna öhnyi Filipo, atre Bethesaida. Götrane lai ka easeny kowe la öline kolopi ne la Hnagejë Ne Galilaia, nge e cili fe la zi i Anederea me Peteru. Iesu a hë Filipo jë me hape: “Xötrethenge ni jë.”—Ioane 1:43.

Ame hnei Filipo hna öhnyi Nathaniela, lo hna ati ëjen, Batolomaio. Öni Filipo jë hi: “Öhne hë huni lo atre hna qaja ngöne lo Trenge Wathebo i Mose, me hnine la itre hna cinyihan hnei itre Perofeta, ene Iesu neköi Iosefa, atre Nazareta.” Kola luelu hnei Nathaniela, matre öni angeic: “Ke hetre atre ka loi fe ka troa xulu qa Nazareta?”

Filipo a iele angeice jë me hape: “Jë fe, matre öhne jë kö eö.” Nge Iesu a öhne ka hape Nathaniela hë la, matre öni nyidrë: “Hane petre hi la ketre atre Isaraela ka pë thoi ngön!”

Sa jë hi Nathaniela ka hape: “Hnei nyipëti hna atre ni tune kaa?”

Öni Iesu: “Qëmekene tro Filipo a hë eö, hnenge hë hna öhnyi eö fene iwacua.”

Nathaniela a haine me hape: “Rabi, nyipëti hi la Nekö i Akötresie, nge nyipëti hi la Joxu ne Isaraela.”

Sa jë hi Iesu ka hape: “Mejiun hë eö ke hnenge hi hna qaja ka hape, öhnyi eö hë ni fene iwacua? Ngo tro kö eö a öhne la itre ewekë ka tru catre hmaca kö hune la.” Thupene lai, nyidrëti a sisinyi jë me hape: “Nyipici, eni a qaja hnyawa koi nyipunie, tro hë nyipunieti a öhne la kola fe la hnengödrai, nge itre angela i Akötresie a elë me uti kowe la Nekö i atr.”—Ioane 1:45-51.

Thupene ju hi lai, Iesu a feke pi me itretre drei nyidrë qa ngöne la itre Wetr ne Ioridrano, a tro Galilaia.