Ame ngöne la tronge i angatr qa Iudra a tro Galilaia, hnei Iesu me itretre drei nyidrë hna kolopi thenge, e Samaria. Hmanono hë angatr hna tro. Nge midi hë, matre angatr a pane mano ju ezine la traon e Sikara, hmekune lo hnë tha tim hna sin a traqa koi itre thauzan lao macatre. Ma hna sine hnei Iakobo, maine hnei angeice pena hna upi itre xan. Ka cile pala kö la hnë tha time cili e Naplouse.

Ame la Iesu a mano ezine la hnë tha tim, hnei itretre dreng hna tro kowe la traon ezin troa pane itö xen. Nge ngöne la ijine patre la itretre dreng, traqa pi la ketre föe ne Samaria troa tha tim. Öni Iesu jë hi: “Pane thue imeng.”—Ioane 4:7.

Tha ka ce mele kö la angetre Iudra me angetre Samaria, ke catrehnine catre la imekuhni thene la lue nöje cili. Matre kola sesëkötre hnene la föe, nge öni angeic: “Hnauëne kö laka, atre Iudra eö, nge eö a sipo timi koi ni, atre Samaria? Ngo Iesu a sa jë me hape: “Maine atre ju eö la ahnahna hna hamëne gufan hnei Akötresie, memine la atre qaja koi eö ka hape, ‘Pane sipo imeng,’ eö la ka troa sipo angeic, nge tro hë angeic a hamë eö la timi ne mel.” Önine jë hi lai föe: “Joxu, pëkö baketre i nyipë troa tha tim, nge ka jui pena. Nga tro nyipëti a jöe ekaa la timi ne mel? Nge [ . . . ] ka sisitria kö nyipë hui Iakobo qaaqaa hun? Hnei nyidrëti hna hamë huni la hnë tha timi celë, ene lo hnei nyidrë me itre nekö i nyidrë, me itre öni i nyidrë hna iji qa ngön.”—Ioane 4:9-12.

Matre öni Iesu jë hi ka hape: “Ame la atre iji qaa ngöne la timi celë, tro hmaca kö angeice lai a pi ij. Ngo ame la atre iji qaa ngöne la tim hnenge hna troa hamën, tha tro hmaca kö angeice lai a hane pi ij, nge tro la timi cili a tune la qeqe ne tim ka neni lapa thei angeic, nge ka hamë mele ka pë pun.” (Ioane 4:13, 14) Ngacama kucakuca catre Iesu, ngo hnei nyidrëti hna ce thawa memine la föe ne Samaria, la nyipici me itre trengewekë ne mel.

Matre önine jë hi la föe: “Joxu, nga thue imenge hö la timi cili, matre tha tro hmaca kö ni a hane pi ij, me traqa lapa troa tha tim.” Ngo ma Iesu pena ha enehila a saze ithanata, öni nyidrë: “Tro jë a hëne la föi eö, nge ce traqa pi epon.” Sa jë hi la föe ka hape: “Pë kö föeng.” Ngo pane mekune jë la aliene hni angeic la Iesu a qaja amamane ka hape, atre hnyawa hi nyidrë la pengö i angeic, öni nyidrë: “Nyipici la hnei eö hna qaja, pëkö föi eö. Ke hnei eö hna föene la faifi lao trahmany, ngo ame la trahmanyi eö enehila, tre tha föi eö kö.”—Ioane 4:15-18.

Canga trotrohnine ju hi angeic la itre trengewekë celë, matre angeic a hain me hape: “Joxu, mama hi ka hape, perofeta nyipë.” Ame hna mama pi laka, ka tru koi angeic la itre ini göi Akötresie. Hna mama tune kaa? Öni angeic: “Hnene la itre qaaqaa huni [angetre Samaria] hna nyihlue i Akötresie ngöne la wetre celë [wetr Gerizim, nge ka tha nanyi kö]  ngo önine pe la angetre Iudra ka hape, e Ierusalema hmekuje hi la hnë hmi koi nyidrë.”—Ioane 4:19, 20.

Iesu a qejepengöne jë ka hape, tha nyipiewekë kö la hnë hmi. Öni nyidrë: “Tro ha traqa la ijin laka, tha tro hmaca kö nyipunieti a nyihluene la Kem ngöne la wetre celë, maine e Ierusalema.” Nge nyidrëti a qaja hmaca jë ka hape: “Easenyi hë la hawa nge enehila hi, tro la itre nyipi hlu a nyihlue i Akötresie cememine la u me nyipici, ke Akötresieti a thele la itre atr  ka tun göi troa nyihlue i nyidrë.”—Ioane 4:21, 23, 24.

Haawe, ame la aja i Kem kowe la itre ka nyihlue i nyidrë, tre tha ene kö la hnë hmi i angatr, ngo aqane hmi angatre pe. Matre kola hain hnene lai föe, öni angeic: “Atre hi ni laka, tro la Mesia a traqa, lo hna hëne ka hape, Keriso. Nge e traqa ha nyidrë, tro hë nyidrëti a fe amamane hnyawa koi së la nöjei ewekë asë.”—Ioane 4:25.

Thupene lai, Iesu a qaja jë la ketre nyipici ka tru koi angeic, öni nyidrë: “Eni hi la atre cili.” (Ioane 4:26) Pane mekune ju! Ketre föe a traqa e midi troa tha tim, nge ketre pengöne kö la aqane nyipiewekë angeic hnei Iesu. Eje hi, nyidrëti a qaja mekötin koi angeic la ketre ewekë hnei nyidrëti hna juetrën—nyidrë la Mesia.

Hnene la itretre drei Iesu hna traqa fë xen qa Sikara. Angatr a itronyi me Iesu ngöne la hnë tha tim i Iakobo, lo götran hnei angatr hna nue nyidrë. Ngo enehila, nyidrëti a ithanata memine la ketre föe ne Samaria. Matre ame ju hi la kola traqa koi nyidrë hnei itretre dreng, hnene la föe hna nue la trengene tim, me tro kowe la traon.

Ame ju hi la angeic a traqa e Sikara, angeic a qaja asë jë la nöjei ewekë hnei Iesu hna qaja koi angeic. Angeic a madrine troa qaja ka hape: “Trohemi nyipunie ma hane wange la ketre atr ka qaja asë la itre ewekë hnenge hna kuca.” Nge ma nyine thue ajane la itre ka pi atre, öni angeic: “Ma nyidrëti hi la Keriso?” (Ioane 4:29) Hnyinge ka nyipiewekë catr, ke ewekë lai hna pi atre qane lo ijine i Mose. (Deuteronomi 18:18) Matre celë hi ka upe la itre atrene la traon troa tro koi Iesu.

Ngöne la ijine cili, itretre dreng a iele Iesu troa xeni la hnei angatr hna traqa fë. Ngo öni nyidrë: “Hetre ange kö, ngo thatre kö nyipunie.”  Matre öni itretre dreng: “Drei la ka thue a i nyidrë?” Iesu a qejepengöne hnyawa jë koi angatr, nge ini lai ka tru alien. Öni nyidrë: “Ange la troa kuca la aja ne la atre upi ni, me afenesine la huliwa i nyidrë.”—Ioane 4:32-34.

Tha Iesu kö a qaja la huliwa ne menuë bali, ke tro pala kö a treqen la foa lao treu. Ngo Iesu pe a qaja la huliwa ne ini itre atr, öni nyidrë: “Goeëne la hlapa, ijine tro ha menuën. Nge kolo ha kepe thupen hnene la atre menuë hlapa, me xawane la itre wen thatraqane la mele ka pë pun, matre tro la atre jumi feja me atre menuë hlapa a ce madrin.”—Ioane 4:35, 36.

Öhne hë Iesu la thangane la porotrike i nyidrë memine la föe ne Samaria. Ala nyimu hë la angetre Sikara ka lapaune koi nyidrë pine la hna anyipicine hnene lai föe, lo öni angeic: “Hnei nyidrëti hna qaja asë la itre ewekë hnenge hna kuca.” (Ioane 4:39) Matre ame la angatr a tro qa Sikara kowe la hnë tha tim, hnei angatr hna alapa Iesu, me sipo itre xa ini. Ame hnei Iesu hna kapa la sipo i angatr, me lapa e Samaria koi lue drai.

Ala nyimu hë la angetre Samaria ka mejiune koi nyidrë qa ngöne la hnei angatre hna dreng. Matre öni angatre kowe lai föe ka hape: “Tha eahuni hmaca kö a lapaune pine la itre trenge ithanata i eö; ngo ketre drenge fe hë hun, nge xecie fe hë koi huni laka, nyidrëti hi la atre amelene la fen.” (Ioane 4:42) Eje hi, tulu ka loi koi së la föe ne Samaria göi aqane troa anyipici Keriso, me thue aja ne la itre ka drei së troa pi atre la itre xa ithuemacany.

The thëthëhmine kö laka, foa pe kö lao treu matre traqa pi la ijine menu—ma kolo jë a qaja lo ijine menuë bali. Kola kuca lai hmekune la lue treu Maac maine Eiperem. Haawe, trotrohnine hi së ka hape, easë ngöne la treu Nofeba maine Diseba. Kolo hi lai a amamane laka, thupene la hna feetëne la Paseka 30 M.K., hnei Iesu me itretre dreng hna lapa koi eitre lao treu e Iudra, matre inin me bapataisone la itre atr. Ngo angatre hë la a tro kolopi kowe la zi i angatr e Galilaia. Nemene la ka treqe angatr e cili?